ആലപ്പുഴ: തന്നെ നിരന്തരമായി വ്യക്തിഹത്യ ചെയ്യാൻ ശ്രമിച്ചാൽ പല രഹസ്യങ്ങളും പരസ്യമായി തുറന്നുപറയേണ്ടിവരുമെന്ന് അമ്പലപ്പുഴ എം.എൽ.എ ജി. സുധാകരന് സി.പി.ഐ.എം നേതാവ് എ. ഷാനവാസിന്റെ മുന്നറിയിപ്പ്. പാർട്ടിയിൽ പ്രവർത്തിച്ചിരുന്ന ഘട്ടത്തിൽ ചെയ്യാൻ പാടില്ലാത്ത പല കാര്യങ്ങളും ജി. സുധാകരൻ തന്നെക്കൊണ്ട് ചെയ്യിപ്പിച്ചിട്ടുണ്ട്. തന്നെ ലഹരിക്കടത്തുകാരനായി ചിത്രീകരിച്ച് ആക്ഷേപിക്കുന്നത് തുടരുന്ന സാഹചര്യത്തിൽ സുധാകരനെതിരെ ഒരു കോടി രൂപ നഷ്ടപരിഹാരം ആവശ്യപ്പെട്ട് മാനനഷ്ടക്കേസ് ഫയൽ ചെയ്തതായും എ. ഷാനവാസ് ട്വന്റിഫോറിനോട് വ്യക്തമാക്കി.
മാനം എന്ന വികാരം തനിക്കെന്നപോലെ സുധാകരനും അദ്ദേഹത്തിന്റെ കുടുംബാംഗങ്ങൾക്കും ഒരുപോലെ ബാധകമായ കാര്യമാണ്. താൻ മയക്കുമരുന്ന് മാഫിയയുടെ ആളാണെന്ന തരത്തിലാണ് അദ്ദേഹം പൊതുവേദികളിൽ പ്രചരിപ്പിക്കുന്നത്. താൻ അത്തരം ഇടപാടുകൾ നടത്തിയിട്ടുണ്ടെങ്കിൽ അത് തെളിവുകളോടെ സ്ഥാപിക്കാൻ അദ്ദേഹത്തെ വെല്ലുവിളിക്കുകയാണ്. തന്നെക്കുറിച്ച് പറയുന്നത് മുഴുവൻ പച്ചക്കള്ളമാണ്. താനും അദ്ദേഹത്തിനെതിരെയുള്ള കാര്യങ്ങൾ പുറത്തുവിടാൻ തുടങ്ങിയാൽ കാര്യങ്ങൾ അതീവ വഷളാകും. സുധാകരന്റെ ശബ്ദരേഖകൾ ഉൾപ്പെടെയുള്ള നിർണ്ണായക തെളിവുകൾ തന്റെ കൈവശമുണ്ട്; ആവശ്യമെങ്കിൽ അതെല്ലാം പുറത്തുവിടും. പാർട്ടിയിലുണ്ടായിരുന്നപ്പോൾ പലരെയും ഉപയോഗിച്ച് അരുതാത്ത പലതും ചെയ്യിപ്പിച്ചത് സുധാകരനാണ്. ചില സന്ദർഭങ്ങളിലെങ്കിലും തങ്ങളും അത്തരം കാര്യങ്ങളിൽ ഭാഗമാകേണ്ടി വന്നിട്ടുണ്ട്. അതിൽ ഇപ്പോൾ കടുത്ത കുറ്റബോധവും അതോർക്കുമ്പോൾ വലിയ ദുഃഖവും തോന്നുന്നുണ്ടെന്നും ഷാനവാസ് പറഞ്ഞു.
ഷാനവാസിനെതിരെയുള്ള ലഹരിക്കടത്ത് ആരോപണം ജി. സുധാകരൻ ഇപ്പോഴും പൊതുവേദികളിൽ തുടർച്ചയായി ആവർത്തിക്കുന്ന സാഹചര്യത്തിലാണ് ഒരു കോടി രൂപയുടെ മാനനഷ്ടക്കേസുമായി അദ്ദേഹം മുന്നോട്ടുപോയിരിക്കുന്നത്.
