കൊച്ചി: എൻ.സി.പി (എസ്), കോൺഗ്രസ് (എസ്) എന്നീ രാഷ്ട്രീയ കക്ഷികൾ തമ്മിൽ സംയോജിച്ച് പുതിയ രാഷ്ട്രീയ പാർട്ടിക്ക് രൂപം നൽകി. 'സി.എസ്.പി' (CSP) എന്നാണ് പുതിയ പാർട്ടിയുടെ പേര്. കോൺഗ്രസ് സെക്യുലർ പാർട്ടി, കോൺഗ്രസ് സോഷ്യലിസ്റ്റ് പാർട്ടി എന്നീ പേരുകൾ തെരഞ്ഞെടുപ്പ് കമ്മീഷന്റെ അംഗീകാരത്തിനായി സമർപ്പിച്ചിട്ടുണ്ട്. ഇന്നുമുതൽ ഒറ്റ പാർട്ടിയായി പ്രവർത്തിക്കുമെന്ന് മുൻ മന്ത്രി എ.കെ. ശശീന്ദ്രൻ പ്രഖ്യാപിച്ചു.
പുതിയ പ്രസ്ഥാനത്തിന്റെ പാർലമെന്ററി ബോർഡ് ചെയർമാനായി എ.കെ. ശശീന്ദ്രനെ ചുമതലപ്പെടുത്തി. ഇരുപാർട്ടികളുടെയും ലയനം ഔദ്യോഗികമായി പ്രഖ്യാപിക്കുന്ന വിപുലമായ പൊതുസമ്മേളനം ഒക്ടോബർ 24, 25 തീയതികളിലായി എറണാകുളത്ത് സംഘടിപ്പിക്കും.
യുവതലമുറയെ ആകർഷിക്കുന്ന തരത്തിലുള്ള പുതിയൊരു രാഷ്ട്രീയ സംവിധാനമാണ് ലക്ഷ്യമിടുന്നതെന്ന് എ.കെ. ശശീന്ദ്രൻ ട്വന്റിഫോറിനോട് മുൻപ് വ്യക്തമാക്കിയിരുന്നു. വാക്കും നോട്ടവും പ്രവർത്തനവും ചിന്താധാരയുമെല്ലാം ഒന്നിനൊന്ന് വ്യത്യസ്തവും പുതുമ നിറഞ്ഞതുമായിരിക്കണം. ഇതിന് അനുയോജ്യമായ ഒരു ഭരണഘടന തയ്യാറാക്കാനാണ് ശ്രമിക്കുന്നത്; അതുമായി ബന്ധപ്പെട്ട ചർച്ചകൾ പുരോഗമിക്കുകയാണെന്നും അദ്ദേഹം പറഞ്ഞിരുന്നു. പുതിയ കാലത്തിന്റെ പ്രതീക്ഷകളുമായി സഞ്ചരിക്കുന്ന ജനസമൂഹത്തിന് സംതൃപ്തി നൽകുന്ന രീതിയിലായിരിക്കണം മാറ്റങ്ങൾ. ഒപ്പമുള്ള അണികൾക്ക് ഇതിന്റെ പ്രാധാന്യം വ്യക്തമായി ബോധ്യപ്പെടുത്തിക്കൊടുക്കണം; നാളെ ഒരു ഘട്ടത്തിലും അവർക്ക് യാതൊരുവിധ സംശയങ്ങളും ഉണ്ടാകാൻ പാടില്ലെന്നുമായിരുന്നു പാർട്ടി രൂപീകരണത്തെക്കുറിച്ച് അദ്ദേഹം നേരത്തെ വ്യക്തമാക്കിയത്.
