കോട്ടയം: മുഖ്യമന്ത്രി വി.ഡി. സതീശൻ നടത്തിയ ചാർട്ടേഡ് വിമാനയാത്രയുമായി ബന്ധപ്പെട്ട വിവാദങ്ങളിൽ പ്രതികരണവുമായി നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ. ഇത്തരം ചെറിയ വിഷയങ്ങളെ അനാവശ്യമായി ഊതിപ്പെരുപ്പിക്കേണ്ടതില്ലെന്ന് അദ്ദേഹം വ്യക്തമാക്കി. ഗൗരവതരമായ ജനകീയ പ്രശ്നങ്ങളിൽ നിന്നും ശ്രദ്ധ തിരിച്ചുവിടരുത്. അടിയന്തരമായി പ്രകൃതിക്ഷോഭം നേരിടുന്ന ഒരു സാഹചര്യത്തിൽ മുഖ്യമന്ത്രിക്ക് അതിവേഗം സംഭവസ്ഥലത്തേക്ക് എത്തേണ്ടതുണ്ട്. അങ്ങനെയൊരു ഘട്ടത്തിൽ കൈകെട്ടി നോക്കിനിൽക്കാനാവില്ല. ഏത് യാത്രാമാർഗ്ഗമായാലും മുഖ്യമന്ത്രി അവിടെയെത്തണം, ആവശ്യമായ തീരുമാനങ്ങളെടുക്കണം, പ്രഖ്യാപനങ്ങൾ നടത്തണം. മന്ത്രിമാർ വിദേശയാത്രകൾ നടത്തുമ്പോൾ ഒട്ടേറെ ഔദ്യോഗിക ചട്ടങ്ങളുണ്ട്. അതെല്ലാം കൃത്യമായി പൂർത്തിയാക്കിയ ശേഷം മാത്രമേ വിദേശത്ത് പോകാൻ സാധിക്കൂ.
ഔദ്യോഗിക ആവശ്യങ്ങൾക്കായി ഔദ്യോഗിക നടപടികൾ പാലിച്ച് മാത്രമേ പോകാനാകൂ. കേന്ദ്ര സർക്കാരിന്റെ അനുമതിയും പൊളിറ്റിക്കൽ ക്ലിയറൻസും അടക്കമുള്ള കാര്യങ്ങൾ ഇല്ലാതെ യാത്ര സാധ്യമല്ല. ഇത്തരം ഔദ്യോഗിക ചട്ടങ്ങളെല്ലാം പാലിച്ചാണ് യാത്രകൾ സംഘടിപ്പിക്കുന്നത് എന്നിരിക്കെ ഇതെല്ലാം വലിയ തോതിൽ ചർച്ചയാക്കേണ്ടതുണ്ടോ എന്ന് സ്പീക്കർ ചോദിച്ചു. മുഖ്യമന്ത്രിയുടെ യാത്രയെക്കുറിച്ചുള്ള നിസ്സാര കാര്യങ്ങൾ സംസാരിച്ച് സമയം പാഴാക്കരുത്. തൊഴിലില്ലായ്മയും വിദ്യാഭ്യാസ പ്രശ്നങ്ങളും ഉൾപ്പെടെ നാടിനെ ബാധിക്കുന്ന നിരവധിയായ പ്രതിസന്ധികളാണ് യഥാർത്ഥത്തിൽ ചർച്ച ചെയ്യപ്പെടേണ്ടത്.
യാത്രയ്ക്ക് ഉപയോഗിച്ച വിമാനക്കമ്പനിയെ തനിക്ക് വ്യക്തമായി അറിയാമെന്നും അവർ സ്വന്തം മണ്ഡലത്തിലുള്ളവരാണെന്നും അദ്ദേഹം പറഞ്ഞു. കുട്ടികൾ മുതൽ മുതിർന്നവർ വരെയുള്ള ആ കുടുംബവുമായി അടുത്ത സൗഹൃദമുണ്ട്. അതെല്ലാം ചെറിയ കാര്യങ്ങളാണ്, വിട്ടുകളയണം. മന്ത്രി കെ.എം. ഷാജിയുടെ കാർ യാത്രയും വലിയ വിവാദമാക്കേണ്ടതില്ലെന്നും ജനങ്ങളുടെ യഥാർത്ഥ ജീവിതപ്രശ്നങ്ങൾ ചർച്ച ചെയ്യുകയാണ് വേണ്ടതെന്നും അദ്ദേഹം കൂട്ടിച്ചേർത്തു.
