കൊച്ചി: തെലങ്കാന ഭരണകൂടത്തിൽ നിന്ന് പാട്ടവ്യവസ്ഥയിൽ ലഭ്യമായ 187.7 ഏക്കർ ഭൂമി ബാങ്കുകളിൽ പണയപ്പെടുത്തി സാബു എം. ജേക്കബ് തട്ടിയെടുത്തത് 2000 കോടി രൂപയെന്ന് റിപ്പോർട്ട്. 2021-ൽ പ്രവർത്തനം ആരംഭിച്ച കിറ്റക്സ് അപ്പാരൽസ് എന്ന സ്ഥാപനത്തിന്റെ പേരിലാണ് സംസ്ഥാനം കണ്ട ഏറ്റവും വലിയ വായ്പാ കുംഭകോണം അരങ്ങേറിയിരിക്കുന്നത്. എസ്.ബി.ഐ ക്യാപ്സിന്റെ (SBI CAP) നേതൃത്വത്തിലുള്ള ബാങ്ക് കൺസോർഷ്യമാണ് ഈ വൻതുക വായ്പയായി അനുവദിച്ചത്.
തെലങ്കാന സ്റ്റേറ്റ് ഇൻഡസ്ട്രിയൽ ഇൻഫ്രാസ്ട്രക്ചർ കോർപ്പറേഷന്റെ അധീനതയിലുള്ള ഭൂമിയാണ് വായ്പയ്ക്കായി ബാങ്കുകൾക്ക് മുന്നിൽ ജാമ്യമായി വെച്ചത്. സ്വന്തമായി ഉടമസ്ഥാവകാശമില്ലാത്ത ഈ ഭൂമിക്ക് 3000 കോടി രൂപയുടെ വിപണി മൂല്യമുണ്ടെന്ന് കൃത്രിമമായി കാണിച്ചായിരുന്നു തട്ടിപ്പ്. ഈ ഭൂമിക്ക് പുറമെ കിറ്റക്സ് അപ്പാരൽസിന്റെ ബാങ്ക് രേഖകളും ഭാവിയിൽ ലഭിക്കുമെന്ന് അവകാശപ്പെട്ട വരുമാനക്കണക്കുകളുമാണ് അധിക ഈടായി സമർപ്പിച്ചത്.
എന്നാൽ, 2024-25 സാമ്പത്തിക വർഷത്തിൽ കിറ്റക്സ് അപ്പാരൽസിന്റെ ആകെ വരുമാനം 10 കോടി രൂപയിലും താഴെ മാത്രമാണ്. കമ്പനിയുടെ വ്യവസായ പ്രവർത്തനങ്ങൾ പൂർണ്ണതോതിൽ ആരംഭിച്ചിട്ടുപോലുമില്ല. ആസ്തികൾ പെരുപ്പിച്ചു കാട്ടിയും തെറ്റായ സാമ്പത്തിക കണക്കുകൾ നിരത്തിയും പൊതുമേഖലാ ബാങ്കുകളെ സാബു എം. ജേക്കബ് വഞ്ചിക്കുകയായിരുന്നു.റിപ്പോർട്ടർ ചാനലാണ് വാർത്ത പുറത്തുവിട്ടത്.
