കൊച്ചി: റിപ്പോർട്ടർ ടിവിയുടെ വാർത്ത മെറ്റ നീക്കം ചെയ്ത സംഭവത്തിൽ കടുത്ത വിയോജിപ്പ് രേഖപ്പെടുത്തി സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ. മുഖ്യമന്ത്രിയുടെ നിഴൽ ദൃശ്യങ്ങൾ മാത്രമേ മാധ്യമങ്ങൾക്ക് ഉപയോഗിക്കാൻ അനുവാദമുള്ളൂ എന്ന അങ്ങേയറ്റത്തെ കാടത്തപരമായ അവസ്ഥയിലേക്ക് കേരളം തരംതാണിരിക്കുകയാണെന്ന് അദ്ദേഹം കുറ്റപ്പെടുത്തി. മുഖ്യമന്ത്രിയുടെ പേരോ ചിത്രങ്ങളോ നൽകരുത്, നിഴൽ മാത്രം കാണിച്ചുകൊള്ളണം എന്ന സമീപനമാണ് ഭരണകൂടം സ്വീകരിക്കുന്നത്. കേന്ദ്രത്തിൽ നരേന്ദ്ര മോദി നടപ്പാക്കുന്നതിന് സമാനമായ മാധ്യമവേട്ടയാണ് കേരളത്തിൽ മുഖ്യമന്ത്രി വി.ഡി. സതീശൻ പയറ്റുന്നതെന്നും അദ്ദേഹം പറഞ്ഞു.
മന്ത്രിമാരുടെ വിദേശപര്യടന വിവാദത്തിലും എം.വി. ഗോവിന്ദൻ നിലപാട് വ്യക്തമാക്കി. സ്പോൺസർമാരുടെ പണം വാങ്ങി മന്ത്രിമാർക്ക് വിദേശത്തുപോകാമെന്ന് മുഖ്യമന്ത്രി തന്നെ പരസ്യമായി പറഞ്ഞുകഴിഞ്ഞതാണ്. വരാനിരിക്കുന്ന നാല് മന്ത്രിമാരും ഇതേ രീതിയിലാണ് യാത്ര തിരിക്കുന്നതെങ്കിൽ അത് നാടിനെ അപകടകരമായ സാഹചര്യത്തിലേക്കാണ് നയിക്കുക. അഴിമതിയിലൂടെ ഭരണം കൊണ്ടുപോകാനാണ് സർക്കാരിന്റെ തീരുമാനം. മുഖ്യമന്ത്രിയും സണ്ണി ജോസഫും ഒരേ സ്വരത്തിലാണ് ഇക്കാര്യം പറഞ്ഞതെന്നും അദ്ദേഹം ചൂണ്ടിക്കാട്ടി.
സി.എം.ആർ.എൽ–എക്സാലോജിക് സാമ്പത്തിക ഇടപാടിൽ പ്രതിപക്ഷ നേതാവ് പിണറായി വിജയനെതിരെ നടക്കുന്ന അന്വേഷണത്തോടും അദ്ദേഹം പ്രതികരിച്ചു. പിണറായിക്കെതിരെ ഒരു തരിമ്പ് തെളിവുപോലും ആരുടെ പക്കലുമില്ല; സി.പി.ഐ.എമ്മിനെ രാഷ്ട്രീയമായി ഇല്ലായ്മ ചെയ്യുക മാത്രമാണ് ഇതിന്റെ ലക്ഷ്യം. മോദിയും ഇ.ഡിയും വി.ഡി. സതീശനും ചേർന്ന അവിശുദ്ധ കൂട്ടുകെട്ടാണ് ഇതിന് പിന്നിൽ പ്രവർത്തിക്കുന്നത്. തെളിവുകളുണ്ടെന്ന് വരുത്തിത്തീർക്കാൻ വ്യാജകഥകൾ ചമയ്ക്കുകയാണ്. കർത്തയിൽ നിന്ന് താൻ യാതൊരുവിധ സാമ്പത്തിക സഹായവും വാങ്ങിയിട്ടില്ലെന്നും എം.വി. ഗോവിന്ദൻ വ്യക്തമാക്കി. മെസ്സി വിഷയത്തിൽ അന്നത്തെ കായിക മന്ത്രിക്കെതിരെ വേണമെങ്കിൽ അന്വേഷണം നടക്കട്ടെ; ആരോപണങ്ങൾക്ക് യാതൊരു തെളിവുമില്ലാത്തതിനാൽ തങ്ങൾക്ക് തെല്ലും ഭയമില്ലെന്നും അദ്ദേഹം മാധ്യമങ്ങളോട് പറഞ്ഞു.
