കൊച്ചി: മുൻ മുഖ്യമന്ത്രി പിണറായി വിജയനെ വേട്ടയാടി സി.പി.ഐ.എമ്മിനെ തകർക്കാനുള്ള ബി.ജെ.പിയുടെ രാഷ്ട്രീയ അജണ്ടയ്ക്ക് മുഖ്യമന്ത്രി വി.ഡി. സതീശൻ കുടപിടിക്കുകയാണെന്ന് സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ. എന്നാൽ ഇത്തരം നീക്കങ്ങളിൽ പാർട്ടിക്ക് തെല്ലും ആശങ്കയില്ലെന്നും അദ്ദേഹം വ്യക്തമാക്കി. നിയമപരമായി കേസെടുക്കാൻ സാധിക്കില്ലെന്നാണ് മുഖ്യമന്ത്രിയുടെ നിലപാട്. ഇ.ഡി പോലീസിന് നിർദ്ദേശം നൽകിയിട്ടും തമിഴ്നാടും പഞ്ചാബും ഉൾപ്പെടെയുള്ള ഇതര സംസ്ഥാനങ്ങൾ അത് മുഖവിലയ്ക്കെടുത്ത് നടപടിയിലേക്ക് കടന്നിട്ടില്ല. ഭരണഘടനാപരമായി അത്തരം സ്വതന്ത്ര നിലപാടുകൾ സ്വീകരിക്കാൻ സംസ്ഥാന സർക്കാരുകൾക്ക് പൂർണ്ണ അവകാശമുണ്ട്. കേരളത്തിന്റെ മുൻ ഭരണാധികാരിയെ ഉന്നംവെച്ച് പാർട്ടിയെ ഇല്ലാതാക്കാൻ ബി.ജെ.പിയുടെ ചട്ടുകമായി ഇ.ഡി നടത്തുന്ന വേട്ടയാടലുകൾക്ക് വി.ഡി. സതീശൻ സർക്കാർ കൂട്ടുനിൽക്കുന്നത് കൊടും കമ്മ്യൂണിസ്റ്റ് വിരുദ്ധതയാണെന്നും അദ്ദേഹം കുറ്റപ്പെടുത്തി.
വിമാനയാത്ര നടത്തുന്നതിനെയല്ല തങ്ങൾ ചോദ്യം ചെയ്യുന്നത്; മറിച്ച് വി.ഡി. സതീശന് വേണ്ടി ഈ ചാർട്ടേഡ് വിമാനങ്ങൾ സ്പോൺസർ ചെയ്യുന്നത് ആരാണെന്നാണ് അറിയേണ്ടതെന്ന് എം.വി. ഗോവിന്ദൻ ചോദിച്ചു. മാധ്യമപ്രവർത്തകർ ഈ വിഷയം ഉന്നയിക്കുമ്പോൾ അവരെ അധിക്ഷേപിച്ച് വാർത്താസമ്മേളനം ബഹിഷ്കരിക്കുകയാണ് മുഖ്യമന്ത്രി. മന്ത്രിമാരുടെ യാത്രാച്ചെലവുകൾ പോലും സ്പോൺസർഷിപ്പിലാണ് നടക്കുന്നത്. ഇത് സത്യപ്രതിജ്ഞാ ലംഘനവും ഭരണഘടനാ വിരുദ്ധവുമാണ്. ആറു കോടിയുടെ ആഡംബര കാറിൽ സഞ്ചരിച്ചാലേ കെ.എം. ഷാജിക്ക് ഉറക്കം വരൂ എന്ന സ്ഥിതിയാണ്. കേരളം ഇന്ന് ഒരു സ്പോൺസേർഡ് സംസ്ഥാനമായും വി.ഡി. സതീശൻ സ്പോൺസേർഡ് മുഖ്യമന്ത്രിയായും തരംതാണിരിക്കുന്നു. ഭരണത്തലവൻ തന്നെ ഇങ്ങനെയായാൽ ഉദ്യോഗസ്ഥവൃന്ദത്തിന്റെ സ്ഥിതി എന്താകുമെന്നും അദ്ദേഹം പരിഹസിച്ചു. കൊച്ചിയിൽ മുഖ്യമന്ത്രി രഹസ്യമായി കൂടിക്കാഴ്ച നടത്തിയ നിക്ഷേപകൻ ആരാണ്? നേരം പുലരുന്നത് മുതൽ അന്തിമയങ്ങുന്നത് വരെ കള്ളം മാത്രം പറയുന്ന മുഖ്യമന്ത്രി കോൺഗ്രസിനും പൊതുസമൂഹത്തിനും ഒരേപോലെ നാണക്കേടാണെന്നും അദ്ദേഹം പറഞ്ഞു.
ത്രിപുരയിൽ സി.പി.ഐ.എമ്മിനെ തോൽപ്പിച്ച് അധികാരം പിടിച്ചപ്പോൾ, യു.പി ജയിക്കുന്നതിനേക്കാൾ വലിയ പ്രത്യയശാസ്ത്ര വിജയമാണിതെന്ന് നരേന്ദ്ര മോദിയും അമിത് ഷായും പ്രഖ്യാപിച്ചിരുന്നു. ആശയപരമായ പോരാട്ടത്തിൽ ബി.ജെ.പി ജയിച്ചു എന്നായിരുന്നു അവരുടെ വീൺവാക്ക്. അടുത്ത ലക്ഷ്യം കേരളമാണെന്ന് വർഷങ്ങൾക്ക് മുൻപേ മോദിയും ഷായും മുന്നറിയിപ്പ് നൽകിയിരുന്നതാണ്. അതിന്റെ തുടർച്ചയായുള്ള ബി.ജെ.പിയുടെ കടന്നാക്രമണമാണ് ഇപ്പോൾ സംസ്ഥാനത്ത് അരങ്ങേറുന്നത്.
അദാനിയെയും അംബാനിയെയും ലോകത്തെ ഏറ്റവും വലിയ ധനികരാക്കുക മാത്രമാണ് നരേന്ദ്ര മോദിയുടെ പ്രധാന ലക്ഷ്യം. കോർപ്പറേറ്റ് കുത്തകകളിൽ നിന്ന് ലഭിക്കുന്ന കോടാനുകോടി രൂപയുടെ പിൻബലത്തിലാണ് കേരളമുൾപ്പെടെയുള്ള ഇടങ്ങളിൽ ഇടതുപക്ഷത്തെ ഞെരുക്കാൻ ബി.ജെ.പി ശ്രമിക്കുന്നത്. സാമ്പത്തിക ശക്തികൊണ്ടോ പണക്കൊഴുപ്പുകൊണ്ടോ ആർ.എസ്.എസിനെയും ബി.ജെ.പിയെയും തോൽപ്പിക്കാൻ തങ്ങൾക്ക് കഴിയില്ല. ജനങ്ങളാണ് തങ്ങളുടെ യഥാർത്ഥ അടിത്തറ. സാധാരണ ജനങ്ങളെ ചേർത്തുപിടിച്ചല്ലാതെ സി.പി.ഐ.എമ്മിന് മുന്നോട്ട് പോകാനാകില്ല. അവരെ പൂർണ്ണമായി വിശ്വാസത്തിലെടുത്തും ഒപ്പം നിർത്തിയും ഇത്തരം പ്രതിലോമകരമായ പ്രവണതകൾക്കെതിരെ ശക്തമായ പ്രതിരോധം തീർക്കുമെന്നും എം.വി. ഗോവിന്ദൻ പ്രഖ്യാപിച്ചു.
