തിരുവനന്തപുരം: കേരളത്തിൽ വൈദ്യുതി ഉപഭോഗം എക്കാലത്തെയും ഉയർന്ന നിരക്കിലേക്ക് കുതിച്ചുയരുന്നു. പീക്ക് സമയത്തെ ഉപയോഗത്തിൽ സ്വയം നിയന്ത്രണം കൊണ്ടുവരാൻ ഉപഭോക്താക്കൾക്ക് കെ.എസ്.ഇ.ബി നിർദ്ദേശം നൽകി. സർക്കാർ ഓഫീസുകളിലും ഉപയോഗം വെട്ടിച്ചുരുക്കണമെന്ന് കർശന നിർദ്ദേശമുണ്ട്. എയർ കണ്ടീഷണറുകളുടെ ഊഷ്മാവ് 25 ഡിഗ്രി സെൽഷ്യസോ അതിന് മുകളിലോ ആയി ക്രമീകരിക്കണം. അനാവശ്യമായ പ്രകാശാലങ്കാരങ്ങളും ലൈറ്റുകളും പൂർണ്ണമായി ഒഴിവാക്കേണ്ടതാണ്. വാട്ടർ അതോറിറ്റിയുടെ പമ്പിംഗ് ജോലികൾ പകൽ സമയത്തേക്ക് മാത്രമായി പരിമിതപ്പെടുത്തണമെന്നും, കൂടുതൽ ഊർജ്ജം ആവശ്യമുള്ള വൻകിട വ്യവസായശാലകളുടെ പ്രവർത്തനങ്ങൾ പകൽ സമയത്തേക്ക് മാറ്റണമെന്നും ഉത്തരവിൽ ആവശ്യപ്പെടുന്നു.
അതേസമയം, വേ ഗ്ലോബൽ ഇന്ത്യ പ്രൈവറ്റ് ലിമിറ്റഡ് എന്ന കമ്പനിയിൽ നിന്നും ഇന്ന് മുതൽ 200 മെഗാവാട്ട് വൈദ്യുതി അധികമായി ലഭിച്ചുതുടങ്ങുമെന്ന് കെ.എസ്.ഇ.ബി അറിയിച്ചു. വൈകുന്നേരം 6 മണി മുതൽ അർദ്ധരാത്രി 12 മണി വരെയുള്ള പീക്ക് സമയങ്ങളിലായിരിക്കും ഈ വൈദ്യുതി ലഭ്യമാകുക. അടുത്ത മാസം 31 വരെ പ്രാബല്യത്തിലുള്ള ഈ കരാർ പ്രകാരം യൂണിറ്റിന് 11 രൂപ നിരക്കിലാണ് സംസ്ഥാനത്തിന് വൈദ്യുതി ലഭിക്കുന്നത്. എൽ നിനോ പ്രതിഭാസം മൂലമുണ്ടായ കനത്ത മഴക്കുറവും ഉയർന്ന അന്തരീക്ഷ ചൂടും കാരണം വൈദ്യുതി ആവശ്യകത റെക്കോർഡ് നിലവാരത്തിൽ തുടരുകയാണ്. മുൻ വർഷങ്ങളിലെ സെപ്റ്റംബർ മാസത്തെ ഡിമാൻഡുമായി താരതമ്യം ചെയ്യുമ്പോൾ ഏകദേശം 1200 മെഗാവാട്ടിന്റെ വർദ്ധനവാണ് ഇത്തവണ ഉണ്ടായിട്ടുള്ളതെന്ന് ബോർഡ് വ്യക്തമാക്കി.
ദേശീയ തലത്തിൽ ഗ്രിഡ് കൺട്രോളർ ഓഫ് ഇന്ത്യ റിപ്പോർട്ട് ചെയ്ത 12,000 മെഗാവാട്ടിന്റെ കുറവ് ഇപ്പോഴും പൂർണ്ണമായി പരിഹരിക്കപ്പെട്ടിട്ടില്ല. രാജ്യത്താകെയുള്ള വൈദ്യുതി ആവശ്യം 5000 മെഗാവാട്ട് വരെ വർദ്ധിക്കാനും കാറ്റിൽ നിന്നുള്ള ഉൽപ്പാദനത്തിൽ 5000 മെഗാവാട്ടിന്റെ കുറവുണ്ടാകാനും സാധ്യതയുണ്ടെന്ന് ഗ്രിഡ് ഇന്ത്യ കഴിഞ്ഞ ദിവസങ്ങളിൽ മുന്നറിയിപ്പ് നൽകിയിരുന്നു. ഇതിനുപുറമെ, സമീപ ദിവസങ്ങളിലെ പീക്ക് സമയങ്ങളിൽ ഗ്രിഡ് ഫ്രീക്വൻസി അപകടകരമായ രീതിയിൽ താഴ്ന്നതായും കെ.എസ്.ഇ.ബി ചൂണ്ടിക്കാട്ടി.
