ആലപ്പുഴ: മുൻ മന്ത്രിയും എം.എൽ.എയുമായ ജി. സുധാകരനെതിരെ വീണ്ടും മാനനഷ്ടക്കേസ്. സി.പി.ഐ.എമ്മിന്റെ മുൻ ഏരിയ കമ്മിറ്റി അംഗം എ. ഷാനവാസാണ് സുധാകരനെതിരെ നിയമനടപടിയുമായി രംഗത്തെത്തിയത്. തനിക്ക് ലഹരി മാഫിയയുമായി അവിഹിത ബന്ധമുണ്ടെന്ന രീതിയിൽ സുധാകരൻ ഉന്നയിച്ച ആക്ഷേപങ്ങൾ ചൂണ്ടിക്കാട്ടിയാണ് പരാതി. 2022-ൽ ഷാനവാസിന്റെ ഉടമസ്ഥതയിലുള്ള ചരക്കുലോറിയിൽ നിന്ന് നിരോധിത പുകയില ഉൽപ്പന്നങ്ങൾ പിടികൂടിയിരുന്നുവെങ്കിലും തുടർന്ന് നടന്ന അന്വേഷണത്തിൽ ഈ കേസിൽ നിന്ന് അദ്ദേഹത്തെ കുറ്റവിമുക്തനാക്കിയിരുന്നു. ഈ പഴയ വിഷയം മുൻനിർത്തിയായിരുന്നു സുധാകരന്റെ പരാമർശം.
താൻ ലഹരിവസ്തുക്കൾ വിൽക്കുന്ന ആളാണെന്ന് സുധാകരൻ പരസ്യമായി അധിക്ഷേപിച്ചതായി ഷാനവാസ് റിപ്പോർട്ടറോട് പ്രതികരിച്ചു. സ്വന്തം ലോറി ഉപയോഗിച്ച് താൻ മയക്കുമരുന്ന് കടത്തുന്നുവെന്നും, ആലപ്പുഴയിലെ രാഷ്ട്രീയ ക്രിമിനലാണ് താനെന്നും അദ്ദേഹം വ്യാജപ്രചാരണം നടത്തി. ഇതിനെതിരെ ആലപ്പുഴ സി.ജെ.എം കോടതിയിൽ മാനനഷ്ടക്കേസ് ഫയൽ ചെയ്തിട്ടുണ്ട്. രണ്ട് വർഷം വരെ തടവുശിക്ഷ ലഭിക്കാവുന്ന കുറ്റകൃത്യമാണ് സുധാകരൻ ചെയ്തിട്ടുള്ളത്. ഇതിനുപുറമെ മാനഹാനിക്ക് പകരമായി ഒരു കോടി രൂപ നഷ്ടപരിഹാരമായി നൽകണമെന്നും താൻ ഹർജിയിലൂടെ ആവശ്യപ്പെട്ടിട്ടുണ്ടെന്ന് എ. ഷാനവാസ് വ്യക്തമാക്കി.
നേരത്തെയും ജി. സുധാകരനെതിരെ മൂന്ന് പ്രമുഖർ ഇത്തരത്തിൽ മാനനഷ്ടത്തിന് കേസ് കൊടുത്തിരുന്നു. ഡി.വൈ.എഫ്.ഐ ജില്ലാ സെക്രട്ടറി ജെയിംസ് സാമുവൽ, നഗരസഭയിലെ പ്രതിപക്ഷ നേതാവ് വി.ജി. വിഷ്ണു, ഡി.വൈ.എഫ്.ഐ മുൻ ജില്ലാ പ്രസിഡന്റ് അനസ് അലി എന്നിവരായിരുന്നു മുൻപ് പരാതിയുമായി കോടതിയിലെത്തിയത്. ഉയർന്നുവന്ന എല്ലാ പരാതികളെയും കോടതിയിൽ വെച്ച് നിയമപരമായി തന്നെ നേരിടുമെന്നായിരുന്നു ഈ വിഷയങ്ങളിൽ ജി. സുധാകരന്റെ മറുപടി.
