തിരുവനന്തപുരം: സംസ്ഥാനത്ത് യു.ഡി.എഫ് ഭരണകൂടം ലൈഫ് ഭവനപദ്ധതിയെ തുരങ്കംവെച്ച് ഇല്ലാതാക്കാൻ ശ്രമിക്കുകയാണെന്ന് പ്രതിപക്ഷ നേതാവ് പിണറായി വിജയൻ. സാധാരണക്കാരോടും പാവപ്പെട്ടവരോടുമുള്ള ഈ സർക്കാരിന്റെ യഥാർത്ഥ മനോഭാവമാണ് ഇതിലൂടെ വ്യക്തമാകുന്നത്. താൻ മുഖ്യമന്ത്രിയായിരുന്ന കാലയളവിൽ ജനങ്ങളിൽ നിന്ന് ഏറ്റവും കൂടുതൽ ഉയർന്നുകേട്ടത് കിടപ്പാടം വേണമെന്ന ആവശ്യമായിരുന്നുവെന്നും, അതിന് ശാശ്വത പരിഹാരം കാണാനുള്ള ചിന്തയിൽ നിന്നാണ് ചരിത്രപരമായ തീരുമാനങ്ങൾ ഉണ്ടായതെന്നും അദ്ദേഹം പറഞ്ഞു.
നിർധനരായ ജനങ്ങൾക്ക് എങ്ങനെ അടച്ചുറപ്പുള്ള പാർപ്പിടം ഉറപ്പാക്കാം എന്ന ആലോചനയാണ് ലൈഫ് പദ്ധതിക്ക് ജന്മം നൽകിയത്. ഇന്ത്യയിൽത്തന്നെ ഇത്തരമൊരു സംരംഭം ആദ്യമായിരുന്നു. തുച്ഛമായ തുക നൽകി വീടുപണി തീർക്കാമെന്നാണ് മുൻകാലങ്ങളിൽ പല ഭരണാധികാരികളും കരുതിയിരുന്നത്; ഇത് ഗുണഭോക്താക്കളെ വലിയ കടക്കെണിയിലേക്കാണ് തള്ളിവിട്ടത്. മാന്യമായൊരു ഭവനം പൂർത്തിയാക്കാൻ ചുരുങ്ങിയത് നാല് ലക്ഷം രൂപയെങ്കിലും ആവശ്യമായി വരുമെന്ന തിരിച്ചറിവിലാണ് അത്രയും വലിയ തുക അനുവദിക്കാൻ സർക്കാർ തീരുമാനിച്ചതെന്ന് പിണറായി വിജയൻ വ്യക്തമാക്കി. രാജ്യത്ത് മറ്റൊരിടത്തും ഇത്രയും വലിയ സാമ്പത്തിക സഹായം നൽകിയിരുന്നില്ലെങ്കിലും, വേറെ സംസ്ഥാനങ്ങളിൽ ഇല്ലെന്ന കാരണത്താൽ കേരളം ഈ പദ്ധതിയിൽ നിന്ന് പിന്നോട്ടുപോയില്ല. അങ്ങനെയാണ് ലൈഫ് ഗുണഭോക്താക്കൾക്ക് നാല് ലക്ഷം രൂപ വീതം ലഭ്യമാക്കിയത്. കേന്ദ്ര വിഹിതം ഉപയോഗിച്ച് നിർമ്മിക്കുന്ന വീടുകളിൽ അവരുടെ ചിഹ്നങ്ങളും ചിത്രങ്ങളും നിർബന്ധമായും പതിപ്പിക്കണമെന്ന് കേന്ദ്ര സർക്കാർ നിബന്ധന വെച്ചിരുന്നു. എന്നാൽ ഗുണഭോക്താക്കളുടെ ആത്മാഭിമാനത്തെ മുറിവേൽപ്പിക്കുന്ന ഇത്തരം നടപടികൾ ഒഴിവാക്കണമെന്ന് ആവശ്യപ്പെട്ട് ഇടതുപക്ഷ സർക്കാർ അന്ന് ആ നീക്കത്തെ ശക്തമായി എതിർത്തു. ചിഹ്നങ്ങൾ വെക്കണമെന്ന് കേന്ദ്രം ശഠിച്ചപ്പോഴും വഴങ്ങാൻ കഴിയില്ലെന്ന ഉറച്ച നിലപാടിലായിരുന്നു എൽ.ഡി.എഫ്. ആ പ്രതിസന്ധിഘട്ടത്തിലും പദ്ധതി സ്തംഭിക്കാതെ മുന്നോട്ടുകൊണ്ടുപോകാൻ മുഴുവൻ സാമ്പത്തിക ബാധ്യതയും സംസ്ഥാനം തന്നെ ഏറ്റെടുക്കുകയായിരുന്നുവെന്നും അദ്ദേഹം ഓർമ്മിപ്പിച്ചു.
എന്നാൽ അധികാരം ലഭിച്ചയുടൻ ഈ വിഷയത്തിൽ യു.ഡി.എഫ് കൈക്കൊണ്ട വിട്ടുവീഴ്ചാ സമീപനം മന്ത്രിമാരുടെ വാക്കുകളിലൂടെത്തന്നെ പുറത്തുവന്നുകഴിഞ്ഞു. കേന്ദ്രത്തിന്റെ താല്പര്യങ്ങൾക്ക് മുന്നിൽ യു.ഡി.എഫ് ഓച്ഛാനിച്ച് നിൽക്കുന്നതിൽ ഒട്ടും അത്ഭുതപ്പെടാനില്ല. ഭരണം കിട്ടിയാൽ ലൈഫ് പദ്ധതി തന്നെ പൂർണ്ണമായും നിർത്തലാക്കുമെന്ന് നേരത്തെ പ്രഖ്യാപിച്ചവരാണ് യു.ഡി.എഫുകാർ. വീടുകളിൽ താമസിക്കുന്ന സാധാരണക്കാരുടെ അന്തസ്സ് കളങ്കപ്പെടുത്താൻ കേന്ദ്ര സർക്കാരിനൊപ്പം കൂട്ടുനിൽക്കുകയാണ് യു.ഡി.എഫ് ചെയ്യുന്നതെന്നും അദ്ദേഹം കുറ്റപ്പെടുത്തി.
മുൻ സർക്കാരിന്റെ കാലത്ത് കമ്പോളത്തിലെ വിലക്കയറ്റം നിയന്ത്രിക്കാൻ ഫലപ്രദമായ വിപണി ഇടപെടലുകൾ നടത്തിയിരുന്നു. എന്നാൽ ഇപ്പോൾ ജനജീവിതം ദുസ്സഹമാക്കി നിത്യോപയോഗ സാധനങ്ങൾക്ക് വൻ വിലക്കയറ്റമാണ് അനുഭവപ്പെടുന്നത്; ഇതിനെതിരെ സംസ്ഥാന ഭരണകൂടം ഒന്നും ചെയ്യുന്നില്ല. നിലവിലെ അപ്രഖ്യാപിത പവർകട്ടിന് കാരണം സർക്കാരിന്റെ പിടിപ്പുകേടും കെടുകാര്യസ്ഥതയുമാണ്. ഒരു ദിവസം എത്രയോ തവണയാണ് ഇപ്പോൾ കറന്റ് പോകുന്നത്. കഴിഞ്ഞ പത്ത് വർഷക്കാലം കേരളത്തിൽ പവർകട്ട് എന്നത് ഉണ്ടായിരുന്നേയില്ലെന്നും പിണറായി വിജയൻ ചൂണ്ടിക്കാട്ടി.
