തിരുവനന്തപുരം: ഭിന്നശേഷി വിഭാഗത്തിൽപ്പെട്ട വ്യക്തികൾ വാങ്ങുന്ന മോട്ടോർ വാഹനങ്ങൾക്ക് ഏർപ്പെടുത്തിയിരുന്ന നികുതി ഇളവിന്റെ ഉയർന്ന പരിധി സംസ്ഥാന സർക്കാർ ഏഴ് ലക്ഷത്തിൽ നിന്നും 15 ലക്ഷം രൂപയായി വർദ്ധിപ്പിച്ചതായി ഗതാഗത വകുപ്പ് മന്ത്രി സി.പി. ജോൺ അറിയിച്ചു.
ബുദ്ധിമാന്ദ്യം, ഓട്ടിസം, സെറിബ്രൽ പാൾസി ഉൾപ്പെടെ ഒന്നിലധികം വൈകല്യങ്ങൾ നേരിടുന്ന ആളുകൾ വാങ്ങുന്ന വാഹനങ്ങൾക്ക്, പരമാവധി ഏഴ് ലക്ഷം രൂപ വരെയുള്ള വാങ്ങൽ വിലയ്ക്കായിരുന്നു ഇതുവരെ മോട്ടോർ വാഹന നികുതിയിൽ ഇളവ് അനുവദിച്ചിരുന്നത്. എന്നാൽ 2026-27 സാമ്പത്തിക വർഷത്തെ പുതുക്കിയ ബജറ്റ് അവതരണ വേളയിൽ ഈ പരിധി 15 ലക്ഷം രൂപയായി ഉയർത്തുമെന്ന് സർക്കാർ ഉറപ്പുനൽകിയിരുന്നു.
ഈ ബജറ്റ് നിർദ്ദേശം പ്രാബല്യത്തിൽ വരുത്തുന്നതിന്റെ ഭാഗമായി, കേരള മോട്ടോർ വാഹന നികുതി നിയമത്തിൽ ആവശ്യമായ ഭേദഗതികൾ വരുത്തിക്കൊണ്ട് 2022-ലെ മുൻ ഉത്തരവ് പരിഷ്കരിച്ച് സർക്കാർ ഔദ്യോഗിക വിജ്ഞാപനം പുറത്തിറക്കിയതായി മന്ത്രി വ്യക്തമാക്കി.
