തിരുവനന്തപുരം: മുൻ മുഖ്യമന്ത്രി പിണറായി വിജയൻ കാട്ടിയ അഴിമതിയുടെ അതേ വഴിയിലൂടെ തന്നെയാണ് വി.ഡി. സതീശനും നീങ്ങുന്നതെന്ന് ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ. അഴിമതിയില്ലാത്തൊരു നാട് വാഗ്ദാനം ചെയ്ത് അധികാരത്തിൽ വന്ന ഭരണകൂടമാണിത്. എന്നാൽ 140 ദിവസങ്ങൾ പിന്നിടുമ്പോൾ ജനങ്ങൾക്കു മുന്നിൽ തെളിയുന്ന യാഥാർത്ഥ്യങ്ങൾ എന്തൊക്കെയാണെന്ന് പരിശോധിക്കപ്പെടണമെന്നും, ഇക്കാര്യത്തിൽ കൃത്യമായ രാഷ്ട്രീയ സംവാദം നടക്കണമെന്നാണ് ബി.ജെ.പി നിലപാടെന്നും അദ്ദേഹം വ്യക്തമാക്കി.
ഇത്തരം അപചയം നിറഞ്ഞ രാഷ്ട്രീയ ശൈലികൾ അവസാനിപ്പിക്കേണ്ട സമയമായി. മാസപ്പടി ഇടപാട് പച്ചയായ രാഷ്ട്രീയ അഴിമതിയാണ്; അവിടെ വൻ കൊള്ള നടന്നുവെന്നതിൽ ആർക്കും യാതൊരു സംശയവുമില്ല. പിണറായി അഴിക്കുള്ളിലാകണമെന്ന് പരസ്യമായി ആവശ്യപ്പെട്ട രാഹുൽ ഗാന്ധിയുടെ പാർട്ടി നയിക്കുന്ന സർക്കാരിന് ഇപ്പോൾ കാര്യങ്ങൾ രഹസ്യമാക്കിവെക്കാനാണ് താല്പര്യം. കേസിൽ വിജിലൻസ് നടപടികളോ എഫ്.ഐ.ആറോ ഉണ്ടാകുന്നില്ല.
ഇതിന് പിന്നിലെ യഥാർത്ഥ കാരണമെന്താണെന്ന് പൊതുസമൂഹം ചോദിക്കുന്നുണ്ട്. എന്തുകൊണ്ടാണ് എഫ്.ഐ.ആർ രജിസ്റ്റർ ചെയ്യാൻ മടിക്കുന്നതെന്ന് മുഖ്യമന്ത്രിയും ആഭ്യന്തര വകുപ്പ് മന്ത്രിയും വ്യക്തമാക്കണം. നടന്ന ക്രമക്കേടുകളെല്ലാം മൂടിവെക്കാനാണ് കോൺഗ്രസ് സർക്കാരിന്റെ ശ്രമം. തെരഞ്ഞെടുപ്പ് കാലത്ത് അയ്യപ്പസ്വാമിയുടെ പേരിൽ ഗാനങ്ങൾ ആലപിച്ച് വോട്ട് തേടിയ കോൺഗ്രസുകാർ സന്നിധാനത്തെ സ്വർണ്ണക്കൊള്ളയുമായി ബന്ധപ്പെട്ട വിവാദങ്ങളിൽ മൗനത്തിലാണ്.
ഭരണകൂടം ദേവസ്വം ബോർഡുമായി നിരന്തരം ഏറ്റുമുട്ടുന്നു. ഒരു വശത്ത് ചാർട്ടേഡ് വിമാനയാത്രകളും മറുവശത്ത് ആഡംബര റേഞ്ച് റോവർ കാറുകളുമാണ്. ഇരട്ടത്താപ്പും ധൂർത്തും യഥേഷ്ടം തുടരുകയാണ്. ചുരുക്കത്തിൽ പിണറായി വിജയന്റെ അതേ അഴിമതി തന്നെയാണ് വി.ഡി. സതീശനും ആവർത്തിക്കുന്നത്. കേരളീയരെ വിഡ്ഢികളാക്കുന്ന സമീപനമാണ് സി.പി.ഐ.എമ്മും കോൺഗ്രസും ഒത്തുചേർന്ന് സ്വീകരിക്കുന്നത്. സമുദായവും മതവുമാണ് എല്ലാറ്റിനും കാരണമെന്ന് മുസ്ലിം ലീഗ് നേതൃത്വം വാദിക്കുന്നു.
എന്നാൽ അതേ ലീഗ് നേതാക്കളാണ് സൗദി പ്രവാസിയുടെ ഉടമസ്ഥതയിലുള്ള റേഞ്ച് റോവർ കാറിൽ ദേശീയ പതാക കെട്ടി പറക്കുന്നത്. സി.എം.ആർ.എൽ ഡയറിയിലെ 'മുരളീധരൻ' എന്ന പരാമർശത്തിൽ ബി.ജെ.പിക്ക് അഴിമതിയോട് യാതൊരു വിട്ടുവീഴ്ചയുമില്ല. ആരാണ് സാമ്പത്തിക തിരിമറി നടത്തിയതെന്ന് കൃത്യമായി അന്വേഷിക്കുകയാണ് വേണ്ടത്; അന്വേഷണം നടത്തേണ്ടത് തങ്ങളുടെ ചുമതലയല്ലല്ലോയെന്നും അദ്ദേഹം ചൂണ്ടിക്കാട്ടി.
ബി.ജെ.പി ഒരു അന്വേഷണ ഏജൻസിയല്ല. ആദ്യം പിണറായി വിജയനെ പ്രതിയാക്കി പോലീസ് എഫ്.ഐ.ആർ രജിസ്റ്റർ ചെയ്യട്ടെ. പോലീസിന്റെ കണ്ടെത്തലുകളിൽ ഏതെങ്കിലും ബി.ജെ.പി നേതാവ് പണം വാങ്ങിയതായി തെളിഞ്ഞാൽ അവർക്കെതിരെയും എഫ്.ഐ.ആർ ചുമത്താം. പോലീസ് എഫ്.ഐ.ആർ ഇട്ടാൽ പാർട്ടി തലത്തിൽ ആവശ്യമായ നടപടികൾ സ്വീകരിക്കുമെന്നും രാജീവ് ചന്ദ്രശേഖർ കൂട്ടിച്ചേർത്തു.
