തിരുവനന്തപുരം: സി.എം.ആർ.എൽ-എക്സാലോജിക് ഇടപാടിൽ പ്രത്യേക അന്വേഷണ സംഘത്തെ (എസ്.ഐ.ടി) ചുമതലപ്പെടുത്തിക്കൊണ്ട് പുറപ്പെടുവിച്ച ഉത്തരവിൽ പ്രകടമായ നിയമപരമായ പാളിച്ചകളുണ്ടെന്ന് ബി.ജെ.പി നേതാവ് ഷോൺ ജോർജ്. എൻഫോഴ്സ്മെന്റ് ഡയറക്ടറേറ്റ് (ഇ.ഡി) കത്ത് കൈമാറിയത് സംസ്ഥാന ഡി.ജി.പിക്കാണെന്നിരിക്കെ, ഇതിൽ ഇടപെടലുകൾ നടത്താൻ ആഭ്യന്തര മന്ത്രിക്ക് നിയമപരമായി യാതൊരു അധികാരവുമില്ലെന്ന് അദ്ദേഹം മാധ്യമങ്ങളോട് വ്യക്തമാക്കി.
ഈ കേസിൽ നേരിട്ട് ആരോപണം നേരിടുന്ന വ്യക്തിയാണ് ആഭ്യന്തര മന്ത്രി രമേശ് ചെന്നിത്തലയെന്നും, അങ്ങനെയുള്ള ഒരാളാണ് എഫ്.ഐ.ആർ ചുമത്തരുതെന്ന് ശഠിക്കുന്നതെന്നും ഷോൺ ജോർജ് വിമർശിച്ചു. പുറത്തുവന്ന ഡയറിക്കുറിപ്പുകളിൽ മുഖ്യമന്ത്രിയുടെ പേര് വരെയുണ്ട്. ഈ സാഹചര്യത്തിൽ മുഖ്യമന്ത്രിയെ ചോദ്യം ചെയ്യാൻ എസ്.ഐ.ടി ധൈര്യം കാണിക്കുമോയെന്നും അദ്ദേഹം സംശയം പ്രകടിപ്പിച്ചു.
പി.എ. മുഹമ്മദ് റിയാസ് ഉൾപ്പെട്ട അനധികൃത സ്വത്ത് സമ്പാദന കേസ് പത്തു വർഷം വരെ കഠിനതടവ് ലഭിക്കാവുന്ന അതീവ ഗുരുതരമായ ക്രിമിനൽ കുറ്റമാണ്. അതിൽ പ്രാഥമിക അന്വേഷണം നടത്താൻ നിയമപരമായ അനുമതിയില്ല. കേസ് അട്ടിമറിക്കാൻ പിണറായി നടത്തിയ ഗൂഢാലോചനയുടെ ഭാഗമാണ് പ്രാഥമിക അന്വേഷണം എന്ന വാദം. ഈ വിഷയത്തിൽ ഇ.ഡി പ്രാഥമിക ഘട്ട അന്വേഷണം ഇതിനോടകം പൂർത്തിയാക്കിയതാണ്; അതിനാൽ ഇനി അടിയന്തര നടപടികളാണ് ഉണ്ടാകേണ്ടത്. ഒരു കുറ്റകൃത്യം സംഭവിച്ചതായി ഒരു കേന്ദ്ര ഏജൻസി മറ്റൊന്നിനെ അറിയിച്ചാൽ തുടർനടപടികൾ സ്വീകരിക്കുകയാണ് വേണ്ടത്. സർക്കാരിന് തെല്ലെങ്കിലും ആർജ്ജവമുണ്ടെങ്കിൽ കേസ് സി.ബി.ഐക്ക് വിടാൻ തയ്യാറാകണമെന്നും അദ്ദേഹം ആവശ്യപ്പെട്ടു.
മുഖ്യമന്ത്രിയും ഈ തട്ടിപ്പുകേസിൽ പങ്കാളിയാണ്. ഒരു സി.ബി.ഐ അന്വേഷണം കൊണ്ടുമാത്രമേ യാഥാർത്ഥ്യങ്ങൾ പുറത്തുവരൂ. കേസിൽ ഉൾപ്പെട്ടിട്ടുള്ള രമേശ് ചെന്നിത്തല, വി.ഡി. സതീശൻ, പി.കെ. കുഞ്ഞാലിക്കുട്ടി, ഷിബു ബേബി ജോൺ എന്നിവർ തങ്ങളുടെ സ്ഥാനങ്ങൾ രാജിവെക്കണം. നേതാക്കൾ ഒത്തുചേർന്നുള്ള ഇടപാടുകളാണ് ഇവിടെ നടന്നത്. വിവാദ യൂട്യൂബറായ സാജൻ സ്കറിയയിൽ നിന്നാണ് ഈ രേഖകൾ തനിക്ക് ലഭ്യമായതെന്നും ഷോൺ ജോർജ് വെളിപ്പെടുത്തി.
തന്റെ പക്കലുള്ള രേഖകളിൽ ഒരു ബി.ജെ.പി നേതാവിന്റെയും പേരുകളില്ല. ഇനി ബി.ജെ.പി നേതാക്കളുടെ പേരുകൾ ഉണ്ടെങ്കിൽത്തന്നെ അവർക്കെതിരെയും അന്വേഷണം നടത്തട്ടെ. കേരള പോലീസ് തങ്ങളുടെ നിയന്ത്രണത്തിലല്ല പ്രവർത്തിക്കുന്നത്; ബി.ജെ.പിക്കാർക്ക് പ്രത്യേക നിയമങ്ങളൊന്നുമില്ലെന്നും തെറ്റ് ചെയ്തിട്ടുണ്ടെങ്കിൽ അന്വേഷണം നേരിടണമെന്നും അദ്ദേഹം പറഞ്ഞു.
സി.എം.ആർ.എൽ മാനേജിംഗ് ഡയറക്ടർ ശശിധരൻ കർത്തയുടെ ഡയറിയിൽ മുഖ്യമന്ത്രി വി.ഡി. സതീശന്റെ പേര് പരാമർശിച്ചിട്ടുണ്ടെന്ന് കാണിക്കുന്ന വിവരങ്ങൾ ഷോൺ ജോർജ് ഫേസ്ബുക്കിലൂടെ പുറത്തുവിട്ടിരുന്നു. മറ്റ് പ്രമുഖ രാഷ്ട്രീയ നേതാക്കളുടെ പേരുകൾക്കൊപ്പമുള്ള വി.ഡി. സതീശന്റെ പേരിന് നേരെ അഞ്ചുലക്ഷം രൂപയെന്നും ടിക്ക് മാർക്കും രേഖപ്പെടുത്തിയിട്ടുണ്ട്.
