തിരുവനന്തപുരം: ആർ.എസ്.എസിന്റെ ലക്ഷ്യങ്ങളും താല്പര്യങ്ങളും കേരളത്തിൽ നടപ്പിലാക്കുന്നത് യു.ഡി.എഫ് സർക്കാരാണെന്ന് പ്രതിപക്ഷ നേതാവ് പിണറായി വിജയൻ. എല്ലാറ്റിനെയും പിന്നിൽ നിന്ന് നിയന്ത്രിക്കുന്നത് സംഘപരിവാറാണ്. ജനാധിപത്യ മൂല്യങ്ങളോട് യാതൊരു ബഹുമാനവുമില്ലാത്ത കൂട്ടരാണവർ. 'പി.എം. ശ്രീ' പദ്ധതി നടപ്പിലാക്കി വിദ്യാലയങ്ങളിൽ ആർ.എസ്.എസ് അജണ്ട അടിച്ചേൽപ്പിക്കുകയാണ്. കേരളത്തിൽ ബി.ജെ.പി ഭരണത്തിലല്ലെങ്കിലും ആർ.എസ്.എസ് ഇച്ഛിക്കുന്ന കാര്യങ്ങളെല്ലാം കൃത്യമായി നടപ്പാക്കപ്പെടുന്ന വിചിത്ര സാഹചര്യമാണുള്ളതെന്നും അദ്ദേഹം ആരോപിച്ചു.
സംസ്ഥാനത്തെ പൊതുവിദ്യാഭ്യാസ രംഗത്തും ഉന്നത വിദ്യാഭ്യാസ മേഖലയിലും ആർ.എസ്.എസ് നയങ്ങൾ കുത്തിനിറയ്ക്കുകയാണ്. യു.ഡി.എഫ് ഭരണം ഇതിന് പൂർണ്ണമായും കീഴടങ്ങിക്കഴിഞ്ഞു. ഉന്നത വിദ്യാഭ്യാസ രംഗം എങ്ങോട്ടാണ് പോകുന്നതെന്ന് പരിശോധിക്കണം. ഇതിനെതിരെ ഒരക്ഷരം പോലും ഉരിയാടാൻ മുഖ്യമന്ത്രിയോ ഉന്നത വിദ്യാഭ്യാസ മന്ത്രിയോ തയ്യാറായോ എന്നും അദ്ദേഹം ചോദിച്ചു. സംഘപരിവാർ ബന്ധമുള്ളവർക്ക് മുൻതൂക്കമുള്ള സെനറ്റുകളാണ് നിലവിൽ രൂപപ്പെടുന്നത്.
വഖഫ് ബോർഡിൽ രണ്ട് അമുസ്ലിം പ്രതിനിധികൾ വേണമെന്ന നിബന്ധന വന്നപ്പോൾ കേരള നിയമസഭ ഒറ്റക്കെട്ടായാണ് ഇതിനെതിരെ പ്രമേയം പാസാക്കിയത്. മുൻപ് എൽ.ഡി.എഫ് സർക്കാർ ഈ വിഷയത്തെ കോടതിയിൽ ചോദ്യം ചെയ്തിരുന്നു. പിന്നീട് തെരഞ്ഞെടുപ്പിൽ എൽ.ഡി.എഫ് പരാജയപ്പെടുകയും യു.ഡി.എഫ് ഭരണം വരുകയും ചെയ്തു. ഇതോടെ അമുസ്ലിം പ്രാതിനിധ്യമില്ലാത്ത ബോർഡ് റദ്ദാക്കണമെന്ന് ആവശ്യപ്പെട്ട് ഒരു ആർ.എസ്.എസുകാരൻ കോടതിയെ സമീപിച്ചു.
ഈ ഘട്ടത്തിൽ കോടതിയിൽ ഓടിയെത്തിയ യു.ഡി.എഫ് സർക്കാർ, രണ്ട് അമുസ്ലിം അംഗങ്ങളെ ഉൾപ്പെടുത്തി ബോർഡ് പുനഃസംഘടിപ്പിക്കാമെന്ന് സമ്മതിക്കുകയായിരുന്നു. ആർ.എസ്.എസിന്റെ അജണ്ടകൾ ഈ വിധത്തിൽ നടപ്പിലാക്കാൻ സംസ്ഥാന സർക്കാരിന് എന്തുകൊണ്ടാണ് ഇത്രയേറെ തിടുക്കമെന്ന് അദ്ദേഹം ആരാഞ്ഞു.
ആർ.എസ്.എസ് വേദികളിൽ മാത്രമാണ് വന്ദേമാതരം പൂർണ്ണരൂപത്തിൽ ആലപിക്കാറുള്ളത്. എന്നാൽ വന്ദേമാതരം പൂർണ്ണമായി ആലപിക്കണമെന്ന് നിഷ്കർഷിച്ച് സർക്കുലർ ഇറക്കിയ ഏക ഭരണകൂടം കേരളത്തിലേതാണ്. കോൺഗ്രസിന്റെ ആസ്ഥാന മന്ദിരത്തിലും ഇത് പൂർണ്ണമായി പാടി. ആർ.എസ്.എസ് അജണ്ടകളെ സ്വാഗതം ചെയ്യാൻ വല്ലാത്ത വ്യഗ്രതയാണ് കാണിക്കുന്നത്.
തെരഞ്ഞെടുപ്പ് കമ്മീഷൻ എങ്ങനെ പ്രവർത്തിക്കണമെന്നതിന് വ്യക്തമായ വ്യവസ്ഥകളുണ്ട്. നിഷ്പക്ഷമായി പ്രവർത്തിക്കേണ്ട സ്ഥാപനമാണത്. എന്നാൽ കമ്മീഷന്റെ പ്രവർത്തനരീതി സംബന്ധിച്ച് പുറത്തുവന്ന വിവരങ്ങൾ ജനാധിപത്യത്തിന്റെ അടിത്തറയെത്തന്നെ നിഷേധിക്കുന്ന തരത്തിലുള്ളതാണ്. ഭൂരിപക്ഷ തീരുമാനങ്ങളെ തള്ളിക്കളഞ്ഞുകൊണ്ടാണ് കാര്യങ്ങൾ അടിച്ചേൽപ്പിക്കുന്നത്. ഒരിക്കലും സംഭവിക്കാൻ പാടില്ലാത്തതും വിചിത്രവുമായ വഴിവിട്ട നീക്കങ്ങളാണ് അവിടെ അരങ്ങേറുന്നതെന്നും അദ്ദേഹം ചൂണ്ടിക്കാട്ടി.
തൊഴിലാളികൾക്കും ജീവനക്കാർക്കുമൊപ്പമാണ് എൽ.ഡി.എഫ് സർക്കാർ എക്കാലത്തും ഉറച്ചുനിന്നിട്ടുള്ളത്. എന്നാൽ ഇന്ന് സംസ്ഥാനത്ത് വ്യാപകമായി അനാവശ്യ സ്ഥലംമാറ്റങ്ങൾ നടക്കുകയാണ്. മാനുഷിക പരിഗണനകൾ ലവലേശമില്ലാതെ, പ്രയാസങ്ങൾ അനുഭവിക്കുന്നവരെപ്പോലും മനഃപൂർവ്വം മാറ്റുന്നത് തികച്ചും മനുഷ്യത്വരഹിതമായ നടപടിയാണ്.
കഴിഞ്ഞ പത്തോ ഇരുപതോ വർഷമായി സേവനമനുഷ്ഠിക്കുന്നവരെ മുൻ സർക്കാരുകൾക്ക് സ്ഥിരപ്പെടുത്താൻ കഴിഞ്ഞിട്ടില്ലെങ്കിൽപ്പോലും ജോലിയിൽ നിന്ന് പിരിച്ചുവിട്ടിരുന്നില്ല. എന്നാൽ ഈ സർക്കാർ അവരെ ജോലിയിൽ നിന്ന് പറഞ്ഞുവിടുകയാണ്. ജീവനക്കാരെ മുഖ്യ ശത്രുവായി കാണുന്ന സമീപനമാണ് സർക്കാരിന്റേത്. ജീവനക്കാരെ ദ്രോഹിച്ചുകൊണ്ട് മുന്നോട്ടുപോയാൽ നാട് അത് അംഗീകരിച്ചു തരില്ല. കോർപ്പറേറ്റുകളെ സഹായിക്കാനാണ് കേന്ദ്ര സർക്കാർ പുതിയ ലേബർ കോഡ് അടിച്ചേൽപ്പിച്ചത്. ദീർഘകാല പോരാട്ടങ്ങളിലൂടെ തൊഴിലാളിവർഗ്ഗം നേടിയെടുത്ത അവകാശങ്ങളെ ഒറ്റയടിക്ക് കവർന്നെടുക്കാനാണ് നീക്കമെന്നും അദ്ദേഹം പറഞ്ഞു.
