തിരുവനന്തപുരം: ചാർട്ടേഡ് വിമാനയാത്രയുമായി ബന്ധപ്പെട്ട രാഷ്ട്രീയ വിവാദങ്ങളിൽ വിശദീകരണവുമായി മുഖ്യമന്ത്രി വി.ഡി. സതീശൻ. തന്റെ വിമാന യാത്രകൾക്കോ ഹെലികോപ്റ്റർ ഉപയോഗത്തിനോ സർക്കാരിന്റെ ഖജനാവിൽ നിന്ന് ഒരു രൂപ പോലും ചെലവഴിച്ചിട്ടില്ലെന്നാണ് മുഖ്യമന്ത്രിയുടെ അവകാശവാദം. ഒരു സ്വകാര്യ വ്യക്തി ഏർപ്പാടാക്കിയ വിമാനത്തിലായിരുന്നു യാത്രയെന്നും, അതിനായി പണം മുടക്കിയ വ്യക്തിയെ അനാവശ്യ വിവാദങ്ങളിലേക്ക് വലിച്ചിഴയ്ക്കാൻ ഉദ്ദേശിക്കുന്നില്ലെന്നും വാർത്താസമ്മേളനത്തിൽ അദ്ദേഹം പറഞ്ഞു.
മലപ്പുറത്തേക്കുള്ള വിമാനയാത്രാ ചെലവ് വഹിച്ച സ്പോൺസറുടെ പേര് വെളിപ്പെടുത്താൻ വിസമ്മതിച്ചുകൊണ്ടാണ് മുഖ്യമന്ത്രി ഉയർന്ന ആക്ഷേപങ്ങളെല്ലാം തള്ളിക്കളഞ്ഞത്. അടുത്ത സുഹൃത്തുക്കൾ ഇത്തരത്തിൽ സഹായിച്ചാൽ അതിൽ എന്താണ് തെറ്റെന്നും അദ്ദേഹം ചോദിച്ചു. മുൻ മുഖ്യമന്ത്രി പിണറായി വിജയനും രാജ്യത്തെ മറ്റ് മുഖ്യമന്ത്രിമാരുമെല്ലാം സ്വകാര്യ വിമാനങ്ങളിൽ മുൻപ് യാത്ര ചെയ്തിട്ടുണ്ടെന്ന് അദ്ദേഹം ചൂണ്ടിക്കാട്ടി. ഇത്തരം യാത്രകൾ സ്പോൺസർ ചെയ്യുന്ന വ്യക്തികളോ സംഘടനകളോ പകരമായി എന്തെങ്കിലും സർക്കാരിൽ നിന്ന് ആവശ്യപ്പെടുന്നവരല്ല. ഇനി ഏതെങ്കിലും ആനുകൂല്യങ്ങൾക്കായി അവർ ക്യൂവിൽ നിന്നാൽത്തന്നെ അത് വഴിവിട്ട് ചെയ്തുകൊടുക്കുന്ന രീതിയല്ല ഈ സർക്കാരിന്റേതെന്നും മുഖ്യമന്ത്രി വ്യക്തമാക്കി.
പ്രതിപക്ഷ നേതാവായിരുന്ന കാലത്ത് ഭരണകക്ഷിയിലെ മന്ത്രിമാരുടെ വിദേശ സന്ദർശനങ്ങളെ ജനം സസൂക്ഷ്മം നിരീക്ഷിക്കുന്നുണ്ടെന്ന് ഓർമ്മിപ്പിച്ച വി.ഡി. സതീശൻ, ഭരണത്തലവനായപ്പോൾ ഇത്തരം ചർച്ചകളുടെ ആവശ്യകതയെന്താണെന്നാണ് ചോദിക്കുന്നത്. ചാർട്ടേഡ് വിമാനയാത്ര വലിയ ചർച്ചയായ പശ്ചാത്തലത്തിലാണ് ഈ ന്യായീകരണങ്ങൾ. ഖജനാവിന് ഭാരമുണ്ടാകാതിരിക്കാനാണ് സ്പോൺസർഷിപ്പ് സ്വീകരിച്ചതെന്ന വാദവുമായി ചെലവുചുരുക്കലിനെക്കുറിച്ച് വിശദീകരിച്ചെങ്കിലും, മലപ്പുറം യാത്രയ്ക്ക് വിമാനം ഏർപ്പാടാക്കി നൽകിയത് ആരാണെന്ന് അദ്ദേഹം വ്യക്തമാക്കിയില്ല.
കൂടാതെ, മന്ത്രി കെ.എം. ഷാജിയുടെ റേഞ്ച് റോവർ ഉപയോഗത്തിലും മറ്റ് മന്ത്രിമാരുടെ വിദേശ പര്യടനങ്ങളിലും അനാവശ്യ വിവാദങ്ങൾ ഉണ്ടാക്കരുതെന്നും അദ്ദേഹം ആവശ്യപ്പെട്ടു. കെ.എം. ഷാജിക്ക് അനുവദിച്ചിരുന്ന ഔദ്യോഗിക വാഹനം പത്ത് വർഷത്തിലധികം പഴക്കമുള്ളതാണെന്നും അടിക്കടി കേടുപാടുകൾ സംഭവിക്കുന്നത് കാരണമാണ് സുഹൃത്തിന്റെ കാർ ഉപയോഗിക്കേണ്ടി വന്നതെന്നും മുഖ്യമന്ത്രി വിശദീകരിച്ചു. മന്ത്രിമാർക്ക് വിദേശത്തേക്ക് പോകാൻ ഭരണാനുമതി നൽകിയത് താൻ തന്നെയാണ്. ലോകത്തുണ്ടാകുന്ന വികസന മുന്നേറ്റങ്ങൾ നേരിട്ട് കണ്ടു മനസ്സിലാക്കാനും പഠിക്കാനുമാണ് അവർ പോയത്. ഇതിലൊന്നും സർക്കാർ ഖജനാവിൽ നിന്ന് പണം വിനിയോഗിച്ചിട്ടില്ലെന്നും അദ്ദേഹം കൂട്ടിച്ചേർത്തു. എന്നാൽ, ഈ സ്പോൺസർഷിപ്പുകൾ വൻകിടക്കാരുമായുള്ള അവിശുദ്ധ കൂട്ടുകെട്ടാണെന്നും ഭരണത്തിന്റെ ധാർമ്മികതയും സുതാര്യതയും പൂർണ്ണമായി നഷ്ടപ്പെട്ടെന്നും പ്രതിപക്ഷം ശക്തമായി ആരോപിക്കുന്നു.
