തിരുവനന്തപുരം: പിണറായി വിജയനെതിരായ അന്വേഷണത്തിൽ എൻഫോഴ്സ്മെന്റ് ഡയറക്ടറേറ്റിന് (ഇ.ഡി) യാതൊരു വിശ്വാസ്യതയുമില്ലെന്നും കോൺഗ്രസിന്റേത് വ്യക്തമായ ഇരട്ടത്താപ്പാണെന്നും കെ.കെ. ശൈലജ. തങ്ങളുടെ നേതാക്കൾക്കെതിരെ കേന്ദ്ര ഏജൻസികൾ വരുമ്പോൾ ഇ.ഡി നടപടികൾ തെറ്റാണെന്ന് വാദിക്കുന്ന കോൺഗ്രസ്, സി.പി.ഐ.എമ്മിനെ ലക്ഷ്യമിടുമ്പോൾ അതേ ഇ.ഡിയെ ന്യായീകരിക്കുന്നത് കാപട്യമാണ്. മന്ത്രിമാരുടെ വിദേശ സന്ദർശനങ്ങളെക്കുറിച്ചും അവർ നിലപാട് വ്യക്തമാക്കി. മന്ത്രിമാർക്ക് വിദേശത്ത് പോകാൻ അവകാശമുണ്ട്, എന്നാൽ അതിന്റെ സാമ്പത്തിക ബാധ്യത സർക്കാർ ഖജനാവിനാണോ എന്നതാണ് പ്രധാന വിഷയം. നിയമപരമായ തടസ്സങ്ങൾ ഒരുപക്ഷേ ഇതിൽ ഉണ്ടായേക്കില്ലെങ്കിലും, ഉയർത്തിപ്പിടിക്കേണ്ടത് രാഷ്ട്രീയ ധാർമ്മികതയാണെന്ന് അവർ ഓർമ്മിപ്പിച്ചു.
ഇ.ഡിയുടെ ശുപാർശ സ്വീകരിക്കണമോ നിരസിക്കണമോ എന്നത് പൂർണ്ണമായും സംസ്ഥാന സർക്കാരിന്റെ വിവേചനാധികാരത്തിൽ വരുന്ന കാര്യമാണെന്ന് ഡോ. തോമസ് ഐസക് ചൂണ്ടിക്കാട്ടി. നിലവിൽ സംസ്ഥാനത്ത് നടക്കുന്നത് വ്യക്തമായ ബി.ജെ.പി - യു.ഡി.എഫ് രഹസ്യ ധാരണയാണെന്നും അദ്ദേഹം ആരോപിച്ചു.
അതേസമയം, അടിസ്ഥാനമില്ലാത്ത ഈ കേസ് ആര് അന്വേഷിച്ചാലും ഒന്നും സംഭവിക്കാൻ പോകുന്നില്ലെന്ന് സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ പ്രതികരിച്ചു. സർക്കാരിന്റെ ഈ നീക്കം ബി.ജെ.പിയുമായുള്ള ഡീലിന്റെ ഭാഗമാണെന്ന് സി.പി.ഐ.എം കേന്ദ്ര കമ്മിറ്റിയംഗം തോമസ് ഐസക് ആവർത്തിച്ചു. ഇ.ഡി വെറുമൊരു 'കേഡി' മാത്രമാണെന്നായിരുന്നു സംസ്ഥാന സെക്രട്ടേറിയറ്റ് അംഗം എം.വി. ജയരാജന്റെ പരിഹാസം. പിണറായി വിജയൻ സി.പി.ഐ.എമ്മിന്റെ കരുത്തും നെടുംതൂണുമാണെന്ന് ഇ.പി. ജയരാജനും വ്യക്തമാക്കി.
യാതൊരു തെളിവുകളുമില്ലാതെ പ്രസ്ഥാനത്തിനെതിരെ കടന്നാക്രമണം നടത്തുകയാണെന്നും, ഇത്തരം വിലകുറഞ്ഞ നീക്കങ്ങൾ കൊണ്ട് പാർട്ടിയെ തകർക്കാമെന്ന് ആരും കരുതേണ്ടെന്നും എം.വി. ഗോവിന്ദൻ മുന്നറിയിപ്പ് നൽകി. അത്തരം വ്യാമോഹങ്ങൾ നരേന്ദ്ര മോദിക്കും വി.ഡി. സതീശനും വേണ്ടെന്നും, ഇതിനെതിരെ അതിശക്തമായ ജനകീയ പ്രതിഷേധങ്ങൾ ഉയർന്നുവരുമെന്നും അദ്ദേഹം പറഞ്ഞു. ഏത് കടന്നാക്രമണങ്ങളെയും അതിജീവിക്കാനുള്ള കരുത്ത് പാർട്ടിക്കുണ്ട്. പിണറായി വിജയനെതിരെയുള്ള ആരോപണങ്ങൾ ആര് അന്വേഷിച്ചാലും കാര്യമില്ല, കാരണം ഈ ആരോപണങ്ങൾക്ക് യാതൊരു വസ്തുതാപരമായ പിൻബലവുമില്ല. നിയമപരമായും രാഷ്ട്രീയമായും ഈ വേട്ടയാടലിനെ ചെറുക്കും. ഒരു തരിമ്പുപോലും തെളിവില്ലാത്ത ഈ കേസിൽ ആരും ഒളിച്ചോടേണ്ട കാര്യമില്ല. ഇ.ഡിക്ക് നൽകിയെന്ന് പറയപ്പെടുന്ന മൊഴികൾ അന്നുതന്നെ സാക്ഷികൾ നിഷേധിച്ചതാണ്. എക്സാലോജിക്കിനെ മറയാക്കി പിണറായിയെ കുരുക്കുക മാത്രമാണ് ലക്ഷ്യമെന്ന് പാർട്ടി മുൻപേ മുന്നറിയിപ്പ് നൽകിയിരുന്നതാണെന്നും എം.വി. ഗോവിന്ദൻ കൂട്ടിച്ചേർത്തു.
