തിരുവനന്തപുരം: സംസ്ഥാനത്ത് ഭരണമാറ്റം ഉണ്ടായപ്പോൾ, സത്യപ്രതിജ്ഞചെയ്ത അന്നുതന്നെ വി.ഡി. സതീശൻ സർക്കാർ ആർ.എസ്.എസ് അജണ്ടകൾക്ക് തുടക്കമിട്ടതായി പ്രതിപക്ഷ നേതാവ് പിണറായി വിജയൻ ആരോപിച്ചു. കോൺഗ്രസും ബി.ജെ.പിയും ഒരേ പാതയിലൂടെയാണ് സഞ്ചരിക്കുന്നതെന്നും അദ്ദേഹം കുറ്റപ്പെടുത്തി. വന്ദേമാതരത്തിന്റെ ആദ്യ രണ്ട് വരികൾക്കപ്പുറമുള്ള ഭാഗങ്ങൾ പ്രത്യേക മതവിഭാഗവുമായി ബന്ധപ്പെട്ടതാണെന്നും, അത് ഒരു മതേതര രാഷ്ട്രത്തിന് യോജിച്ചതല്ലെന്നും അദ്ദേഹം ചൂണ്ടിക്കാട്ടി. വന്ദേമാതര ആലാപനം വെറുമൊരു വിവാദ വിഷയമല്ലെന്നും, മതേതരത്വത്തെ ഭരണകൂടം എങ്ങനെ കാണുന്നു എന്ന കാതലായ പ്രശ്നമാണ് ഇവിടെ ഉയരുന്നതെന്നും അദ്ദേഹം പറഞ്ഞു.
ഓഗസ്റ്റ് 15-ന് വന്ദേമാതരം പൂർണ്ണമായി ആലപിക്കണമെന്ന് നിർദ്ദേശിച്ച് സർക്കുലർ പുറത്തിറക്കിയ ഏക സംസ്ഥാനം കേരളമാണെന്നും, വി.ഡി. സതീശൻ സർക്കാർ സംഘപരിവാർ അജണ്ടകളോട് ഒത്തുതീർപ്പ് ഉണ്ടാക്കുകയാണെന്നും അദ്ദേഹം കുറ്റപ്പെടുത്തി. ഉന്നത വിദ്യാഭ്യാസ രംഗം പൂർണ്ണമായി ആർ.എസ്.എസിന്റെ വരുതിയിലായിട്ടും മുഖ്യമന്ത്രിയോ ഉന്നത വിദ്യാഭ്യാസ മന്ത്രിയോ ഒരക്ഷരം മിണ്ടുന്നില്ല. അവകാശങ്ങൾക്കായി സമരം നടത്തുന്ന വിദ്യാർത്ഥി സമൂഹത്തെ വേട്ടയാടുകയും, പ്രക്ഷോഭങ്ങളിൽ ഏർപ്പെടുന്നവർക്കെതിരെ വധശ്രമം അടക്കമുള്ള ഗുരുതരമായ വകുപ്പുകൾ ചുമത്തുകയുമാണ്.
പി.എം. ശ്രീ പദ്ധതി പൂർണ്ണമായും കാവിവൽക്കരണ നീക്കമാണെന്ന് അദ്ദേഹം ചൂണ്ടിക്കാട്ടി. കഴിഞ്ഞ നിയമസഭാ തിരഞ്ഞെടുപ്പ് വരെ ഇത്തരമൊരു ആശങ്ക നിലനിന്നിരുന്നില്ലെങ്കിലും, ഇത് നടപ്പിലാക്കാൻ യു.ഡി.എഫ് സർക്കാർ തീരുമാനിക്കുകയായിരുന്നു. പുതിയ തലമുറയിൽ സംഘപരിവാർ പ്രത്യയശാസ്ത്രങ്ങൾ അടിച്ചേൽപ്പിക്കാനുള്ള ആർ.എസ്.എസ് താല്പര്യമാണിത്.
വായുവും കടലും സ്വകാര്യ കുത്തകകൾക്ക് അടിയറവ് വെക്കാനാണ് നീക്കങ്ങൾ നടക്കുന്നത്. ചങ്ങാത്ത മുതലാളിത്തത്തിന്റെ വികൃതമായ ഉദാഹരണമായി നാടിനെ മാറ്റാനാണ് ഭരണകൂടത്തിന്റെ ശ്രമം. സർക്കാരിന്റെ നയങ്ങളിൽ ഗുരുതരമായ പാളിച്ചകളുണ്ട്. പൊതുഗതാഗതത്തെ വെറുമൊരു കച്ചവടമായി കാണരുതെന്നും അതിന് വലിയ സാമൂഹിക പ്രതിബദ്ധതയുണ്ടെന്നും അദ്ദേഹം ഓർമ്മിപ്പിച്ചു. കെ.എസ്.ആർ.ടി.സി എങ്ങനെയാണ് പ്രതിസന്ധിയിലായത് എന്ന സാഹചര്യം പരിശോധിക്കണം. കോർപ്പറേഷനെ സാമ്പത്തികമായി എങ്ങനെ ശ്വാസം മുട്ടിക്കാം എന്നാണ് ഇപ്പോഴത്തെ സർക്കാർ ചിന്തിക്കുന്നത്. ബസുകളിൽ ഇന്ധനം നിറയ്ക്കാൻ പോലും സാമ്പത്തികമില്ലാത്ത സ്ഥിതിയാണുള്ളത്. നിലവിൽ കേവലം 2663 ബസുകൾ മാത്രമാണ് സംസ്ഥാനത്തുടനീളം സർവീസ് നടത്തുന്നത്. ആവശ്യമായ സ്പെയർ പാർട്സുകൾ വാങ്ങാനോ അറ്റകുറ്റപ്പണികൾക്കോ ഫണ്ടില്ലാതെ അറുന്നൂറിലധികം ബസുകൾ കട്ടപ്പുറത്ത് കിടക്കുകയാണ്. വിരമിച്ച ജീവനക്കാരുടെ പെൻഷൻ കൃത്യമായി വിതരണം ചെയ്യാൻ സർക്കാർ തയ്യാറാകുന്നില്ലെന്നും അദ്ദേഹം പറഞ്ഞു.
ഓണക്കാലത്ത് കെ.എസ്.ആർ.ടി.സിക്ക് 10 കോടി രൂപയുടെ സർവ്വകാല റെക്കോർഡ് വരുമാനം ലഭിച്ചുവെന്ന് സർക്കാർ കൊട്ടിഘോഷിച്ചതും വെറും പ്രചാരണം മാത്രമാണ്. സൗജന്യ യാത്രകൾക്കുള്ള സീറോ ടിക്കറ്റ് നിരക്കുകൾ കൂടി ചേർത്തുള്ള നാല് കോടിയോളം രൂപയുടെ വ്യാജ കണക്കാണ് ഇതിൽ ഉൾപ്പെടുത്തിയത്. യഥാർത്ഥത്തിൽ ടിക്കറ്റ് വരുമാനമായി ലഭിച്ചത് ആറ് കോടി രൂപ മാത്രമാണ്. നിലവിൽ 2692 കോടി രൂപയുടെ ബാധ്യതയിലാണ് സ്ഥാപനം പ്രവർത്തിക്കുന്നത്. വായ്പ തിരിച്ചടവുകൾക്ക് മാത്രമായി ദിവസേന ഒരു കോടി പത്തുലക്ഷം രൂപ ആവശ്യമായി വരുന്നുണ്ട്. യു.ഡി.എഫ് ഭരണത്തിൽ കെ.എസ്.ആർ.ടി.സിയുടെ കടം 3100 കോടി രൂപയിലേക്ക് ഉയർത്തിയെന്നും പിണറായി വിജയൻ കുറ്റപ്പെടുത്തി.
