തിരുവനന്തപുരം: സി.എം.ആർ.എൽ - എക്സാലോജിക് സാമ്പത്തിക ഇടപാടിലെ ഇ.ഡി കത്തിന്റെ പശ്ചാത്തലത്തിൽ പ്രാഥമിക അന്വേഷണം പ്രഖ്യാപിച്ച സർക്കാർ നടപടിയെ രൂക്ഷമായി വിമർശിച്ച് ഡി.വൈ.എഫ്.ഐ സംസ്ഥാന പ്രസിഡന്റ് ചിന്താ ജെറോം. സംസ്ഥാനത്ത് അരങ്ങേറുന്നത് 'മോദി, ഇ.ഡി, വി.ഡി' കൂട്ടുകെട്ടിന്റെ അവിശുദ്ധ അജണ്ടയാണെന്ന് അവർ പരിഹസിച്ചു. ഒന്നെങ്കിൽ തങ്ങൾക്കൊപ്പം നിൽക്കുക, അല്ലെങ്കിൽ എതിർശബ്ദങ്ങളെ പൂർണ്ണമായി ഇല്ലാതാക്കുക എന്നീ രണ്ട് വഴികളാണ് മോദിയും വി.ഡിയും മുന്നോട്ടുവെക്കുന്നത്. മുഖ്യമന്ത്രിക്ക് വർഗ്ഗീയവിരുദ്ധ രാഷ്ട്രീയമുണ്ടെന്ന് കരുതുന്നില്ലെന്നും, ബി.ജെ.പി അനുകൂല നിലപാടാണ് അദ്ദേഹത്തിനുള്ളതെന്നും അവർ കുറ്റപ്പെടുത്തി. പിണറായി വിജയൻ എന്ന പൊതുപ്രവർത്തകനെ വേട്ടയാടാൻ തുടങ്ങിയിട്ട് എത്ര കാലമായെന്ന് ചോദിച്ച ചിന്ത, രാജ്യത്തെ ഏറ്റവും കരുത്തനായ കമ്മ്യൂണിസ്റ്റ് നേതാവിനെ തകർക്കാൻ ബി.ജെ.പിയോടൊപ്പം യു.ഡി.എഫ് സർക്കാർ കൈകോർക്കുകയാണെന്നും ആരോപിച്ചു.
മന്ത്രിമാരുടെ വിദേശ സന്ദർശനങ്ങളെയും അവർ കടുത്ത ഭാഷയിൽ വിമർശിച്ചു. സാധാരണക്കാരെ നോക്കി പരിഹസിക്കുന്ന സമീപനമാണ് മന്ത്രിമാർ സ്വീകരിക്കുന്നത്. യാത്ര സ്പോൺസർഷിപ്പിലാണെന്ന് യാതൊരു സങ്കോചവുമില്ലാതെയാണ് മുഖ്യമന്ത്രി പറയുന്നത്. കേരളത്തിലെ യു.ഡി.എഫ് ഭരണം വലിയ ദുരൂഹതകൾ നിറഞ്ഞ ഒന്നായി മാറി. ഭരണഘടനാപരമായ സത്യപ്രതിജ്ഞ ചെയ്ത മന്ത്രിമാർ പാലിക്കേണ്ട മാതൃകയാണോ ഇതെന്നും അവർ ചോദിച്ചു. കോർപ്പറേറ്റുകൾക്കും വൻകിട കോടീശ്വരന്മാർക്കും വേണ്ടി നിലകൊള്ളുന്ന, സ്പോൺസർമാരാൽ നിയന്ത്രിക്കപ്പെടുന്ന സർക്കാരാണിത്. മന്ത്രിമാരുടെ യാത്രകൾക്ക് പണം നൽകിയ ആ സ്പോൺസർമാർ ആരാണെന്ന് പരസ്യപ്പെടുത്താൻ തയ്യാറാകണം. അത്രമാത്രം വിശാലമനസ്സുള്ളവരാണ് ഈ സ്പോൺസർമാരെങ്കിൽ, നിലവിലെ പവർകട്ടിൽ ബുദ്ധിമുട്ടുന്ന സാധാരണക്കാർക്ക് ഓരോ ഇൻവെർട്ടർ വീതം സ്പോൺസർ ചെയ്യിക്കാൻ സാധിക്കുമോ എന്ന് പരിഹസിച്ച അവർ, ജനങ്ങളെ പരസ്യമായി അപമാനിക്കുന്ന നയമാണ് സർക്കാരിന്റേതെന്നും കൂട്ടിച്ചേർത്തു.
മന്ത്രി ഒ.ജെ. ജനീഷിനെ റോമാ സാമ്രാജ്യത്തിലെ നീറോ ചക്രവർത്തിയോടാണ് ചിന്ത ഉപമിച്ചത്. തനിക്ക് പഴയ തലമുറയുടെ ചിന്താഗതിയില്ലെന്നും മാനസിക ഉല്ലാസത്തിനായുള്ള യാത്രയായിരുന്നുവെന്നുമുള്ള മന്ത്രിയുടെ പ്രസ്താവനയെ അവർ ശക്തമായി എതിർത്തു. ഒരു ജനപ്രതിനിധി ആദ്യം പരിഗണിക്കേണ്ടത് ജനങ്ങളുടെ കണ്ണീരും ആവശ്യങ്ങളുമാണ്. നാട് വലിയൊരു ദുരന്തമുഖത്ത് നിൽക്കുമ്പോൾ ഇത്തരമൊരു പ്രതികരണം മന്ത്രിയുടെ ഭാഗത്തുനിന്ന് ഒരിക്കലും ഉണ്ടാകാൻ പാടില്ലായിരുന്നു. ഇതിനുപുറമെ, ക്യാമ്പസ് രാഷ്ട്രീയത്തിന് മൂക്കുകയറിടാൻ കേരള സർവകലാശാല തയ്യാറാക്കിയ കരട് മാർഗ്ഗരേഖയെയും അവർ വിമർശിച്ചു. വിദ്യാർത്ഥി ശബ്ദങ്ങളെ ഇല്ലാതാക്കാനാണ് സർക്കാർ ശ്രമിക്കുന്നത്. ജീവൻ നൽകിയും വിദ്യാർത്ഥികൾ ഈ നീക്കത്തെ പ്രതിരോധിക്കുമെന്നും ചിന്താ ജെറോം മുന്നറിയിപ്പ് നൽകി.
വിഷയത്തിൽ സർവകലാശാല നീക്കത്തിനെതിരെ എസ്.എഫ്.ഐ സംസ്ഥാന സെക്രട്ടറി പി.എസ്. സഞ്ജീവും രംഗത്തെത്തി. വിദ്യാർത്ഥി സംഘടനാ പ്രവർത്തനങ്ങൾ സംഘപരിവാറിന് സഹിക്കാൻ കഴിയാത്ത കാര്യമാണെന്ന് അദ്ദേഹം ചൂണ്ടിക്കാട്ടി. ക്യാമ്പസുകളിലെ രാഷ്ട്രീയ സംവാദങ്ങളാണ് അവിടുത്തെ സൗന്ദര്യം. പ്രായപൂർത്തിയായ വിദ്യാർത്ഥികളോട് എന്ത് പറയണമെന്നും പ്രവർത്തിക്കണമെന്നും കൽപ്പിക്കാൻ അധികാരികൾക്ക് എന്താണ് അവകാശമെന്ന് സഞ്ജീവ് ചോദിച്ചു. കരട് ചട്ടങ്ങളുമായി മുന്നോട്ട് പോകാനാണ് തീരുമാനമെങ്കിൽ വൈസ് ചാൻസലർ രാജിവെക്കും വരെ സർവകലാശാല ആസ്ഥാനത്ത് സമരം തുടരും. വിഷയം വിവാദമായപ്പോൾ കാര്യങ്ങൾ അറിഞ്ഞില്ലെന്ന വി.സിയുടെ വാദം പച്ചക്കള്ളമാണ്; വി.സി ഒപ്പിടാതെ സിൻഡിക്കേറ്റിന് മുന്നിൽ അജണ്ട വരില്ല. എസ്.എഫ്.ഐയെ തകർക്കുകയാണ് ലക്ഷ്യം. ഈ നീക്കം നടപ്പായാൽ അതിന്റെ നേട്ടം സംഘപരിവാറിനായിരിക്കും. പോലീസോ പട്ടാളമോ ആരു വന്നാലും എസ്.എഫ്.ഐ ഇതിനെ ചെറുത്തുതോൽപ്പിക്കുമെന്നും സഞ്ജീവ് വ്യക്തമാക്കി.
