കണ്ണൂർ: കോൺഗ്രസ് നേതൃത്വത്തിലുള്ള ഭരണം തുടങ്ങിയതിൽ ഏറ്റവും കൂടുതൽ ആഹ്ലാദിക്കുന്നത് ആർ.എസ്.എസ് ആണെന്ന് സി.പി.ഐ.എം സംസ്ഥാന സെക്രട്ടേറിയറ്റ് അംഗം പി. ജയരാജൻ. കേരളത്തിൽ സ്വാധീനം ഉറപ്പിക്കാൻ ആർ.എസ്.എസിന് മുന്നിലുള്ള തടസ്സം സി.പി.ഐ.എം ആണെന്നും പാർട്ടിയെ തകർത്താൽ മാത്രമേ അവർക്ക് മുന്നേറാനാകൂ എന്നും അദ്ദേഹം ചൂണ്ടിക്കാട്ടി. പതിറ്റാണ്ടുകളായി കേരളത്തിൽ ആധിപത്യം സ്ഥാപിക്കാനുള്ള ശ്രമങ്ങൾ ആർ.എസ്.എസ് നടത്തുന്നുണ്ട്. 1940-കൾ മുതൽ സംസ്ഥാനത്ത് ശാഖകൾ ആരംഭിച്ച അവർ, രാജ്യത്ത് ഏറ്റവും കൂടുതൽ ശാഖകൾ പ്രവർത്തിക്കുന്നത് കേരളത്തിലാണെന്ന് അവകാശപ്പെടുന്നു. എന്നാൽ ഗുജറാത്തോ മധ്യപ്രദേശോ ആകുന്നതുപോലെ കേരളം മാറാതിരുന്നത് കോൺഗ്രസിന്റെയോ മുസ്‌ലിം ലീഗിന്റെയോ കരുത്തുകൊണ്ടല്ല; മറിച്ച് സംഘപരിവാർ അജണ്ടകൾക്കെതിരെ ജനങ്ങളെ സംഘടിപ്പിച്ച് സി.പി.ഐ.എം നടത്തിയ വീറുറ്റ പോരാട്ടങ്ങൾ മൂലമാണ്. കമ്മ്യൂണിസ്റ്റുകാരുടെ മാത്രം ചുമതലയാണിതെന്ന് കരുതുന്നില്ലെന്നും, കേരളത്തിന്റെ നവോത്ഥാന മൂല്യങ്ങൾ സംഘപരിവാർ വിരുദ്ധ ആശയങ്ങളുടെ വലിയ സ്രോതസ്സാണെന്നും അദ്ദേഹം ഓർമ്മിപ്പിച്ചു. ഈ പാരമ്പര്യത്തെ ഉൾക്കൊണ്ട് കമ്മ്യൂണിസ്റ്റുകാരും മാധ്യമപ്രവർത്തകർ ഉൾപ്പെടെയുള്ള വിവിധ വർഗ്ഗബഹുജന സംഘടനകളും ഒന്നിച്ചാണ് ആർ.എസ്.എസിനെ പ്രതിരോധിച്ചത്.

യു.എസിലെ മാഡിസൺ സ്ക്വയറിൽ ആർ.എസ്.എസ് തലവൻ മോഹൻ ഭാഗവത് മുന്നോട്ടുവെച്ച ‘ഏകത’ എന്ന ആശയത്തെയും ജയരാജൻ നിശിതമായി വിമർശിച്ചു. ആർ.എസ്.എസും സംഘപരിവാറും സമൂഹത്തിൽ ഉണ്ടാക്കുന്നത് ഐക്യമല്ല, വലിയ ഭിന്നിപ്പാണ്. ഉജ്ജയിനിലെ യുവ ധർമ്മ സൻസദിൽ ഭാഗവത് നടത്തിയ പ്രസംഗത്തെയും അദ്ദേഹം കുറ്റപ്പെടുത്തി. മതേതരത്വം പാശ്ചാത്യ ചിന്താഗതിയാണെന്നാണ് ഭാഗവതിന്റെ വാദം. എന്നാൽ ഇന്ത്യൻ ഭരണഘടനയുടെ ആദ്യ വരികളിൽത്തന്നെ ആലേഖനം ചെയ്യപ്പെട്ടതാണ് മതേതരത്വം. രാജാക്കന്മാർക്കെതിരെ മതപുരോഹിതന്മാർ നടത്തിയ പോരാട്ടങ്ങളിലൂടെയാണ് ഇന്ത്യയിൽ മതനിരപേക്ഷത വളർന്നതെന്ന വാദവും ഭാഗവത് ഉന്നയിച്ചു. ജാതിമത ഭേദമന്യേ ഉയർന്ന സാമൂഹിക അവബോധം ശ്രീനാരായണ ഗുരു വളർത്തിയെടുത്ത കേരളത്തിൽ, ഏകതയെക്കുറിച്ചും മതേതരത്വം പാശ്ചാത്യമാണെന്നും പറഞ്ഞ് വളരാനാണ് സംഘപരിവാർ നോക്കുന്നത്. ഇതിനായി വി.ഡി. സതീശൻ സർക്കാർ അവർക്ക് അനുകൂലമായ സാഹചര്യങ്ങൾ ഒരുക്കുകയാണെന്നും അദ്ദേഹം കുറ്റപ്പെടുത്തി.

മുൻ എസ്.എൻ.ഡി.പി ജനറൽ സെക്രട്ടറി സി. കേശവന്റെ ചരിത്രപരമായ നിലപാടുകൾ ഓർമ്മിപ്പിച്ചുകൊണ്ട് വെള്ളാപ്പള്ളി നടേശനെയും പി. ജയരാജൻ വിമർശിച്ചു. ഹിന്ദുമതം എന്നൊരു മതം നിലവിലില്ലെന്ന് പറഞ്ഞത് ശ്രീനാരായണ ഗുരുവാണ്. തിരുവിതാംകൂർ ഹിന്ദുരാജ്യത്തിൽ ഈഴവർക്കും ക്രിസ്ത്യാനികൾക്കും മുസ്‌ലിംകൾക്കും രക്ഷയില്ലെന്നും, സർ സി.പി. ഉള്ളിടത്തോളം കാലം സ്വാതന്ത്ര്യം സാധ്യമല്ലെന്നും സി. കേശവൻ പ്രഖ്യാപിച്ചിരുന്നു. സർ സി.പിയെ ഒരു ‘ജന്തു’വെന്ന് വിളിച്ച കേശവൻ, ജന്തു എന്നത് ഹിന്ദുവാണെന്ന് വിശദീകരിക്കുകയും ചെയ്തു. ഹിന്ദു എന്ന് സംബോധന ചെയ്യാൻ പോലും അന്ന് തയ്യാറാകാതിരുന്ന ചരിത്രമുള്ള സംഘടനയുടെ ഇപ്പോഴത്തെ ജനറൽ സെക്രട്ടറി വെള്ളാപ്പള്ളി നടേശൻ, നായാടി മുതൽ നമ്പൂതിരി വരെയുള്ളവർ ഒന്നിക്കണമെന്നും ഒപ്പം നസ്രാണികൾ കൂടി ചേരണമെന്നും പറയുന്നത് വിരോധാഭാസമാണെന്ന് അദ്ദേഹം പരിഹസിച്ചു.

സതീശൻ–കുഞ്ഞാലിക്കുട്ടി ഭരണം ആർ.എസ്.എസിന് തങ്ങളുടെ ആയുധങ്ങൾ രാകിമിനുക്കാനും വെടിമരുന്ന് ഉണക്കാനുമുള്ള അവസരമാണ് നൽകുന്നത്. മുസ്‌ലിം ലീഗ് ഇപ്പോൾ ഒരു 'മുസ്‌ലിം ബി.ജെ.പി'യായി മാറിക്കൊണ്ടിരിക്കുകയാണ്. വഖഫ് ബോർഡിൽ അമുസ്‌ലിംകളെ ഉൾപ്പെടുത്താൻ സതീശൻ-കുഞ്ഞാലിക്കുട്ടി ഭരണം തീരുമാനമെടുത്തിട്ടും ലീഗ് എന്തുകൊണ്ടാണ് വഖഫ് സംരക്ഷണ റാലി സംഘടിപ്പിക്കാത്തതെന്നും അദ്ദേഹം ചോദിച്ചു. ലീഗ് നേതൃത്വത്തിന് എല്ലാം കച്ചവട താല്പര്യങ്ങൾ മാത്രമാണ്. കെ.എം. ഷാജി അഴീക്കോട് എം.എൽ.എയായിരുന്ന കാലം മുതൽക്കേ നിയമലംഘനങ്ങൾ നടത്തിയ വ്യക്തിയാണ്; നിരവധി തവണ നിയമലംഘനം നടത്തി കോടതിയുടെ നടപടികൾ നേരിട്ടയാളാണ് അദ്ദേഹം. മന്ത്രിയായിരിക്കെ സ്വകാര്യ വ്യക്തിയുടെ കാർ ഉപയോഗിക്കുന്നത് അത്ഭുതപ്പെടുത്തുന്ന കാര്യമാണെന്നും ജനങ്ങളോടും വ്യവസ്ഥിതിയോടുമുള്ള തുറന്ന വെല്ലുവിളിയാണിതെന്നും ജയരാജൻ വിമർശിച്ചു.

പാർട്ടിയിൽ നടന്ന വിപുലീകരിച്ച സംസ്ഥാന കമ്മിറ്റി യോഗം അണികളിൽ വലിയ ആവേശവും ആത്മവിശ്വാസവുമാണ് പകർന്നുനൽകിയത്. പാർട്ടിക്കുള്ളിൽ നടന്ന ആരോഗ്യകരമായ സംവാദങ്ങൾ ഉൾപ്പാർട്ടി സമരത്തിന്റെ ഭാഗമാണ്. ഉൾപ്പാർട്ടി ചർച്ചകളിലൂടെ രൂപപ്പെട്ടതാണ് കേന്ദ്രകമ്മിറ്റിയുടെ റിപ്പോർട്ട്; അതിന്റെ ഭാഗമായാണ് യുവാക്കളെയും വനിതകളെയും ഉൾപ്പെടുത്തി പുതിയ പുനഃസംഘടന സാധ്യമാക്കിയത്. തെറ്റായ പ്രവണതകൾക്കെതിരെ ഇത്തരം തിരുത്തൽ പ്രക്രിയകൾ തുടരുമെന്നും പാർട്ടി കൂടുതൽ മൂർച്ചയുള്ള ആയുധമായി മാറണമെന്നും അദ്ദേഹം പറഞ്ഞു. ചില വിഷയങ്ങളിൽ തെറ്റിദ്ധാരണയുള്ള ആളുകളെ പാർട്ടിയുടെ കാഴ്ചപ്പാടിലേക്ക് തിരികെ കൊണ്ടുവരാൻ ശ്രമിക്കും. മാധ്യമ പ്രചാരണങ്ങളിലൂടെ സി.പി.ഐ.എമ്മിനുള്ളിൽ ആശയക്കുഴപ്പം ഉണ്ടാക്കാനാണ് നോക്കുന്നത്. മാധ്യമങ്ങൾ വഴി വരുന്ന വിമർശനങ്ങളെ പാർട്ടി ഗൗരവത്തോടെ കാണും. ഇപ്പോൾ മാധ്യമങ്ങൾ തന്നെ പുകഴ്ത്തുകയാണെങ്കിലും കുറച്ചു കഴിയുമ്പോൾ തരംതാഴ്ത്താൻ ശ്രമിക്കുമെന്നും സ്വപ്നലോകത്തല്ലാതെ യാഥാർത്ഥ്യബോധത്തോടെയാണ് താൻ ജീവിക്കുന്നതെന്നും അദ്ദേഹം പറഞ്ഞു. തന്നെ സെക്രട്ടേറിയറ്റിൽ ഉൾപ്പെടുത്തിയത് വൈകിയെന്ന് മറ്റുള്ളവർക്ക് തോന്നാമെങ്കിലും തനിക്കങ്ങനെ തോന്നിയിട്ടില്ലെന്നും അദ്ദേഹം വ്യക്തമാക്കി.

സി.പി.ഐ.എമ്മിനെ തകർക്കുക എന്ന ലക്ഷ്യത്തോടെയാണ് എൻഫോഴ്സ്മെന്റ് ഡയറക്ടറേറ്റ് (ഇ.ഡി) കേരളത്തിലേക്ക് എത്തിയിരിക്കുന്നത്. പിണറായി വിജയനെയും മുഹമ്മദ് റിയാസിനെയും കേസുകളിൽ കുടുക്കാൻ ശ്രമിക്കുന്നത് ഇതിന്റെ ഭാഗമാണ്; ഇത്തരം കേന്ദ്ര ഏജൻസികളുടെ നീക്കങ്ങളെ നിയമപരമായും രാഷ്ട്രീയമായും ശക്തമായി ചെറുത്തുതോൽപ്പിക്കുമെന്നും പി. ജയരാജൻ വ്യക്തമാക്കി.