ഇടുക്കി: ജില്ലയിൽ പെയ്യുന്ന കനത്ത മഴയെത്തുടർന്ന് വട്ടവട കൊട്ടക്കമ്പൂരിൽ താൽക്കാലിക ഷെഡ്ഡിന് മുകളിലേക്ക് മണ്ണിടിഞ്ഞുണ്ടായ അപകടത്തിൽ രണ്ട് പേർ മരിച്ചു. ബാലകൃഷ്ണൻ പെരുമാൾ (50), ബന്ധുവായ ചിന്നു (35) എന്നിവരാണ് മരണപ്പെട്ടത്. വൈദ്യുതാഘാതമേറ്റതാണ് മരണകാരണമെന്നാണ് പ്രാഥമിക നിഗമനം. അതിശക്തമായ മഴയിൽ മണ്ണും മലവെള്ളവും ഒലിച്ചെത്തി ഇവർ നിന്നിരുന്ന ഷെഡ് പൂർണ്ണമായി തകർന്നു വീഴുകയായിരുന്നു.

ദുരന്തത്തിൽ ബാലകൃഷ്ണന്റെ ഭാര്യ മാരിയമ്മാളിന് ഗുരുതരമായി പരിക്കേറ്റു. ഇവരെ ഉടൻതന്നെ വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റി. ഉച്ചകഴിഞ്ഞ് മൂന്ന് മണിയോടെയായിരുന്നു സംഭവം. കൃഷിയിടത്തിൽ വിശ്രമിക്കാൻ തയാറാക്കിയ ഷെഡ്ഡിലേക്ക് മണ്ണൊലിപ്പ് ഉണ്ടാവുകയായിരുന്നു. ഈ സമയം മൂന്നുപേരും ഷെഡിനകത്ത് തന്നെയുണ്ടായിരുന്നു. സമീപപ്രദേശങ്ങളിൽ മറ്റ് നാശനഷ്ടങ്ങളോ അപകടങ്ങളോ റിപ്പോർട്ട് ചെയ്തിട്ടില്ല. സംഭവസ്ഥലത്ത് നിലവിൽ മഴ ശമിച്ചിട്ടുണ്ട്.

അതേസമയം, കോട്ടയം ജില്ലയിലും അതിശക്തമായ മഴയാണ് പെയ്യുന്നത്. ജില്ലയുടെ കിഴക്കൻ മേഖലകളായ തീക്കോയി, തലനാട്, വാഗമൺ എന്നിവിടങ്ങളിലാണ് മഴ കനത്തുപെയ്യുന്നത്. കനത്ത മഴയെത്തുടർന്ന് മീനച്ചിലാറ്റിൽ ജലനിരപ്പ് അപകടകരമായ രീതിയിൽ ഉയർന്നു. തീക്കോയി–വാഗമൺ പാതയിലെ കാരികാട് ടോപ്പിൽ മണ്ണിടിഞ്ഞ് രണ്ട് കാറുകൾക്ക് മുകളിലേക്ക് വീണെങ്കിലും വാഹനങ്ങളിലുണ്ടായിരുന്ന യാത്രക്കാർ പരിക്കേൽക്കാതെ സുരക്ഷിതരായി രക്ഷപ്പെ

ട്ടു.