തിരുവനന്തപുരം: സി.എം.ആർ.എൽ-എക്സാലോജിക് സാമ്പത്തിക ക്രമക്കേടുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി) സമർപ്പിച്ച കത്തിന്റെ അടിസ്ഥാനത്തിൽ സർക്കാരിന് ഔദ്യോഗിക നിയമോപദേശം ലഭിച്ചു. പ്രതിപക്ഷ നേതാവ് പിണറായി വിജയൻ, മുൻ മന്ത്രിയും എം.എൽ.എയുമായ പി.എ. മുഹമ്മദ് റിയാസ് എന്നിവർക്കെതിരെ അന്വേഷണം നടത്തുന്നതിൽ നിയമതടസ്സമില്ലെന്നാണ് അഡ്വക്കേറ്റ് ജനറൽ സർക്കാരിനെ അറിയിച്ചിരിക്കുന്നത്. ഏതുതരത്തിലുള്ള അന്വേഷണമാണ് നടത്തേണ്ടതെന്ന് സർക്കാരിന് സ്വയം നിശ്ചയിക്കാവുന്നതാണ്.
വിഷയത്തിൽ കേസെടുക്കണോ എന്ന കാര്യത്തിൽ വിജിലൻസിന് സ്വതന്ത്രമായി തീരുമാനമെടുക്കാം. ഇ.ഡി കൈമാറിയ കത്തിലെ വിവരങ്ങളും രേഖകളും ഒരു അന്വേഷണം ആരംഭിക്കുന്നതിന് തികച്ചും പര്യാപ്തമാണെന്നാണ് അഡ്വക്കേറ്റ് ജനറലിന്റെ വ്യക്തമായ നിലപാട്.
സി.എം.ആർ.എൽ കേസിൽ പിണറായി വിജയനടക്കമുള്ളവർക്കെതിരെ നടപടി ആവശ്യപ്പെട്ടുള്ള ഇ.ഡി ശുപാർശയിൽ അഡ്വക്കേറ്റ് ജനറലിന്റെ നിയമോപദേശം ലഭിച്ച ശേഷമേ മുന്നോട്ടുപോവുകയുള്ളൂവെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല മുൻപ് വ്യക്തമാക്കിയിരുന്നു. അഴിമതി നിരോധന നിയമപ്രകാരമുള്ള നടപടികളിലാണ് സർക്കാർ ഉപദേശം തേടിയതെന്നും മന്ത്രി അറിയിച്ചിരുന്നു.
കഴിഞ്ഞ ആഴ്ചയാണ് സി.എം.ആർ.എൽ-എക്സാലോജിക് ഇടപാടുകളുമായി ബന്ധപ്പെട്ട് ഇ.ഡി സംസ്ഥാന ഡി.ജി.പിക്ക് നിർണ്ണായക കത്തയച്ചത്. പിണറായി വിജയൻ, മകൾ വീണ ടി, പി.എ. മുഹമ്മദ് റിയാസ് എന്നിവർക്കെതിരെ കേസ് രജിസ്റ്റർ ചെയ്യണമെന്നായിരുന്നു കത്തിലെ ആവശ്യം. വീണ മുഖേന പിണറായി വിജയൻ സി.എം.ആർ.എല്ലിൽ നിന്ന് 3.28 കോടി രൂപ കൈക്കൂലിയായി വാങ്ങിയെന്നാണ് ഇ.ഡിയുടെ പ്രധാന ആരോപണം. ഈ കൈക്കൂലിത്തുക മുഹമ്മദ് റിയാസ് വീണയിലൂടെയും സ്വന്തം സുഹൃത്തുക്കൾ വഴിയും ദുബായിലേക്ക് കടത്തി. പണം കൈപ്പറ്റുന്നതിലും കടത്തുന്നതിലും പിതാവായ പിണറായി വിജയനും ഭർത്താവ് റിയാസിനും വീണ എല്ലാ സഹായങ്ങളും നൽകിയെന്നും കത്തിൽ പരാമർശിക്കുന്നു.
ഈ ഇടപാടുകൾക്കായി എക്സാലോജിക് സൊല്യൂഷൻസിന്റെ വാഹനം ഉപയോഗിച്ചുവെന്നും സി.എം.ആർ.എൽ മാനേജിംഗ് ഡയറക്ടറാണ് പണം നൽകിയതെന്നും വ്യക്തമാക്കുന്നുണ്ട്. സി.എം.ആർ.എല്ലിന്റെ മുൻ ചീഫ് ഫിനാൻഷ്യൽ ഓഫീസർ പി. സുരേഷ് കുമാർ പണമിടപാടുകൾക്ക് സഹായം നൽകി. ഇതിനുപുറമെ, അനധികൃത പണം സ്വീകരിക്കുന്നതിനും മറ്റുള്ളവർക്ക് എത്തിക്കുന്നതിനും വീണയെയും റിയാസിനെയും ഷൈജൽ, പി. നിഖിൽ, ഹസ്സൻ വാരിഷ്, ഫൈസാജ് വി.പി, നന്ദുലാൽ എം എന്നിവർ സഹായിച്ചതായും ഇ.ഡിയുടെ കത്തിൽ അക്കമിട്ടു നിരത്തിയിരുന്നു.
