ആലപ്പുഴ: വീട് വെച്ചുനൽകാമെന്ന ഉറപ്പിൽ കെ.എസ്.യു-എം.എസ്.എഫ് യൂണിയൻ പ്രതിനിധികൾ തന്നെ ചതിച്ചുവെന്ന വെളിപ്പെടുത്തലുമായി കോളേജ് വിദ്യാർത്ഥിനി. യൂണിയൻ ഭാരവാഹികളുടെ വാക്ക് വിശ്വസിച്ച് ആഭരണങ്ങൾ വിറ്റും കടം വാങ്ങിയുമാണ് സ്ഥലം വാങ്ങിയത്. ലൈഫ് പദ്ധതിയിൽ നേരത്തെ അപേക്ഷ നൽകിയിരുന്നെങ്കിലും യൂണിയൻ നിർദ്ദേശപ്രകാരം അത് പിൻവലിക്കേണ്ടി വന്നു. എന്നാൽ ഒടുവിൽ തന്നെ വഞ്ചിക്കുകയാണുണ്ടായതെന്ന് കായംകുളം എം.എസ്.എം കോളേജിലെ മൂന്നാം വർഷ വിദ്യാർത്ഥിനി പരാതിപ്പെടുന്നു.
കോളേജിലെ 2024-ലെ യൂണിയൻ ഭരണസമിതിക്കെതിരെയാണ് ഈ ആക്ഷേപം ഉയർന്നിരിക്കുന്നത്. കെ.എസ്.യു, എം.എസ്.എഫ് സഖ്യമായ യു.ഡി.എസ്.എഫാണ് അന്ന് കാമ്പസ് ഭരിച്ചിരുന്നത്. രണ്ട് വർഷങ്ങൾക്ക് മുൻപ് എൻ.കെ. പ്രേമചന്ദ്രൻ എം.പിയാണ് നിർദ്ദിഷ്ട വീടിന്റെ തറക്കല്ലിടൽ കർമ്മം നിർവ്വഹിച്ചത്. പദ്ധതി സ്പോൺസർ ചെയ്ത വ്യക്തി പിന്മാറിയതാണ് തടസ്സത്തിന് കാരണമെന്നും വരാനിരിക്കുന്ന ഡിസംബറിനകം പകരം സ്പോൺസറെ കണ്ടെത്തുമെന്നുമാണ് നിലവിൽ ഭാരവാഹികൾ നൽകുന്ന മറുപടി. അതേസമയം, കെ.എസ്.യു - എം.എസ്.എഫ് ജില്ലാ കമ്മിറ്റികൾ ഈ സങ്കീർണ്ണ വിഷയത്തിൽ നിരുത്തരവാദപരമായ സമീപനമാണ് കാട്ടുന്നതെന്നും പെൺകുട്ടി ചൂണ്ടിക്കാട്ടുന്നു.
യൂണിയൻ തെരഞ്ഞെടുപ്പിൽ യു.ഡി.എസ്.എഫ് പുറത്തിറക്കിയ പ്രകടന പത്രികയിലൂടെയാണ് 'സഹപാഠിക്കൊരു വീട്' എന്ന പദ്ധതി പ്രഖ്യാപിച്ചത്. വാടകവീട്ടിൽ കഴിഞ്ഞിരുന്ന ചവറ സ്വദേശിനിയായ മത്സ്യത്തൊഴിലാളി കുടുംബത്തിലെ ഈ വിദ്യാർത്ഥിനിക്ക് സ്വന്തമായി പാർപ്പിടം ഒരുക്കുമെന്നായിരുന്നു വാഗ്ദാനം. ഇതിന്റെ അടിസ്ഥാനത്തിലാണ് സ്വർണ്ണാഭരണങ്ങൾ വിറ്റും കടമെടുത്തും ബന്ധുവിന്റെ ഭൂമി ഇവർ വാങ്ങിയത്. തുടർന്ന് നടന്ന തറക്കല്ലിടൽ പരിപാടിയിൽ പ്രാദേശിക കോൺഗ്രസ്-മുസ്ലിം ലീഗ് നേതാക്കളും സന്നിഹിതരായിരുന്നു. എന്നാൽ ഇപ്പോൾ ഇവരാരും കൃത്യമായ ഒരു വിശദീകരണവും നൽകുന്നില്ലെന്ന് കുടുംബം ആരോപിക്കുന്നു. പലവിധ കാരണങ്ങൾ പറഞ്ഞ് തീയതി നീട്ടിക്കൊണ്ടുപോവുകയാണ് ഇവർ ചെയ്യുന്നത്. ഒരേസമയം രണ്ട് വീടുകൾക്കുള്ള നടപടികൾ മുന്നോട്ട് കൊണ്ടുപോകുന്നത് സാങ്കേതിക തടസ്സങ്ങൾക്ക് കാരണമാകുമെന്ന് ധരിപ്പിച്ചാണ് യൂണിയൻ ഭാരവാഹികൾ ഇടപെട്ട് ഇവരുടെ ലൈഫ് ഭവന പദ്ധതി അപേക്ഷ റദ്ദാക്കിച്ചത്.
