കൊച്ചി: സംസ്ഥാനത്ത് കടുത്ത വൈദ്യുതി ക്ഷാമം നിലനിൽക്കുന്നതിനിടെ എറണാകുളം തൃപ്പൂണിത്തുറയിൽ സാമൂഹിക വിരുദ്ധരുടെ അക്രമം മൂലം വൈദ്യുതി വിതരണം തടസ്സപ്പെട്ടു. കിടങ്ങ്, വെള്ളക്കിനാവ് പ്രദേശങ്ങളിലെ രണ്ട് ട്രാൻസ്ഫോർമറുകളിൽ നിന്നുമാണ് ഫ്യൂസ് ഊരിമാറ്റിയത്. ഇതേത്തുടർന്ന് ഒന്നര മണിക്കൂറിലധികം സമയം പ്രദേശമാകെ ഇരുട്ടിലായി. സംഭവത്തിൽ കെ.എസ്.ഇ.ബി അധികൃതർ പോലീസിനെ സമീപിച്ച് പരാതി നൽകിയിട്ടുണ്ട്. ലോഡ്ഷെഡ്ഡിംഗ് സമയക്രമം കഴിഞ്ഞിട്ടും വൈദ്യുതി തിരിച്ചെത്താതിരുന്നതോടെ നാട്ടുകാർ ബോർഡിൽ വിവരമറിയിക്കുകയായിരുന്നു. തുടർന്ന് ജീവനക്കാരെത്തി നടത്തിയ പരിശോധനയിലാണ് അട്ടിമറി വ്യക്തമായത്.
വെള്ളക്കിനാവിലെ ട്രാൻസ്ഫോർമറിന്റെ ഫ്യൂസ് ഊരി സമീപത്തെ തോട്ടിലേക്ക് വലിച്ചെറിഞ്ഞ നിലയിലും, രണ്ടാമത്തേത് അടിച്ച് തകർത്ത നിലയിലുമായിരുന്നു. തുടർന്ന് ഉദ്യോഗസ്ഥർ പുതിയ സംവിധാനമൊരുക്കി വൈദ്യുതി പുനഃസ്ഥാപിച്ചു. ഇതിനുമുൻപും പറവൂരിൽ സമാനമായ അതിക്രമം അരങ്ങേറുകയും പോലീസ് കേസെടുക്കുകയും ചെയ്തിരുന്നു. കഴിഞ്ഞ ദിവസങ്ങളിൽ അടൂർ നെടുംകുളഞ്ഞിയിലും ട്രാൻസ്ഫോർമർ ഫ്യൂസ് ഊരിമാറ്റിയ സംഭവത്തിൽ കെ.എസ്.ഇ.ബി പോലീസിൽ പരാതി സമർപ്പിച്ചിരുന്നു.
ഇതിനിടെ, കടുത്ത പ്രതിസന്ധിക്കിടയിലും കൽപ്പറ്റ നഗരത്തിൽ പകൽ വെളിച്ചത്തിൽ വഴിവിളക്കുകൾ തെളിഞ്ഞുനിന്ന് വൈദ്യുതി ദുരുപയോഗം ചെയ്യുന്നതിന്റെ ദൃശ്യങ്ങൾ പുറത്തുവന്നു. ചുങ്കം ജംഗ്ഷൻ സ്കൂൾ മുതൽ അയ്യപ്പക്ഷേത്രം വരെയുള്ള റോഡരികിലെ എട്ട് തെരുവ് വിളക്കുകളാണ് കഴിഞ്ഞ ഏതാനും ആഴ്ചകളായി പട്ടാപകലും പ്രകാശിക്കുന്നത്. എന്നാൽ പകൽ സമയങ്ങളിൽ കത്തുന്ന ഈ വിളക്കുകൾ രാത്രിയിൽ തെളിയാറില്ലെന്ന് പ്രദേശവാസികൾ കുറ്റപ്പെടുത്തുന്നു. വിവരം അറിയിച്ചപ്പോൾ നഗരസഭയോട് പറയാനാണ് കെ.എസ്.ഇ.ബി ഉദ്യോഗസ്ഥർ നിർദ്ദേശിച്ചതെന്നും ഇതുവരെ യാതൊരു പരിഹാര നടപടിയും ഉണ്ടായിട്ടില്ലെന്നും നാട്ടുകാർ പറഞ്ഞു. സമാനരീതിയിൽ പത്തനംതിട്ടയിലും പകൽസമയത്ത് തെരുവ് വിളക്കുകൾ അണയ്ക്കാതെ കിടക്കുന്ന സംഭവങ്ങൾ റിപ്പോർട്ട് ചെയ്തിട്ടുണ്ട്.
