കോഴിക്കോട്: പാർട്ടിക്കുള്ളിലെ വീഴ്ചകളും കുറവുകളും സ്വയംവിമർശനപരമായി തിരുത്തുമെന്നും ഉയർന്നുവന്ന വിമർശനങ്ങൾ ഗൗരവമായി പരിശോധിക്കുമെന്നും സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ. മാറുന്ന പുതിയ രാഷ്ട്രീയ കാലാവസ്ഥയിൽ സംഘടനാ പ്രവർത്തനം ഏത് രീതിയിൽ മുന്നോട്ടു കൊണ്ടുപോകണമെന്നാണ് നിലവിൽ കൂടിയാലോചിക്കുന്നത്. കേരളത്തിന്റെ മണ്ണിൽ സ്വാധീനമുറപ്പിക്കാൻ ബി.ജെ.പി കഠിനശ്രമം നടത്തുമ്പോൾ, മറുവശത്ത് വലതുപക്ഷ രാഷ്ട്രീയശക്തികൾ ആധിപത്യം സ്ഥാപിക്കാനാണ് തുനിയുന്നത്. മുൻ തെരഞ്ഞെടുപ്പിലെ തിരിച്ചടികൾ സംബന്ധിച്ച് സംസ്ഥാന-കേന്ദ്ര കമ്മിറ്റികൾ കണ്ടെത്തിയ വിഷയങ്ങൾക്ക് എങ്ങനെ ശാശ്വത പരിഹാരം കാണാമെന്ന് വിപുലീകൃത സംസ്ഥാന സമിതി പരിശോധിക്കുമെന്ന് അദ്ദേഹം പറഞ്ഞു. സംസ്ഥാന സെക്രട്ടേറിയറ്റ് തയ്യാറാക്കിയ കരട് രേഖയിൽ സംസ്ഥാന സമിതി മാറ്റങ്ങൾ വരുത്തിയിട്ടുണ്ടെന്നും അദ്ദേഹം വ്യക്തമാക്കി.
മുസ്ലിം ലീഗിന്റെ രാഷ്ട്രീയ നിലപാടുകൾക്കെതിരെയും എം.വി. ഗോവിന്ദൻ രൂക്ഷവിമർശനം നടത്തി. ഭരണത്തിൽ അധികാരപങ്കാളിത്തം ഉറപ്പാക്കാൻ വർഗ്ഗീയ ശക്തികളുമായി കൂട്ടുകൂടാൻ പോലും ലീഗിന് മടിയില്ല. ന്യൂനപക്ഷങ്ങളുടെ സംരക്ഷകരെന്ന് അവകാശപ്പെടുമ്പോഴും വർഗ്ഗീയ കക്ഷികളുമായി സന്ധിചെയ്യുന്ന നയമാണ് അവരുടേത്. പി.എം. ശ്രീ സ്കൂൾ വിഷയത്തിലടക്കം ഈ ഇരട്ടത്താപ്പ് പ്രകടമാണെന്നും അദ്ദേഹം കുറ്റപ്പെടുത്തി.
സംഘടനാപരമായ പോരായ്മകൾ പരിഹരിക്കാൻ ആഴത്തിലുള്ള ഇടപെടലുകൾ അനിവാര്യമാണ്. താഴേത്തട്ടിൽ പ്രാദേശികതലം വരെ ഇത്തരം തിരുത്തൽ നടപടികൾ ഉറപ്പാക്കും. പാർട്ടി അംഗങ്ങളുടെ രാഷ്ട്രീയ-സൈദ്ധാന്തിക നിലവാരം ഉയർത്തേണ്ടതുണ്ടെന്നാണ് പാർട്ടിയുടെ കൃത്യമായ വിലയിരുത്തലെന്നും സംസ്ഥാന സെക്രട്ടറി വ്യക്തമാക്കി.
വിപുലീകൃത സംസ്ഥാന സമിതി യോഗത്തിനെതിരെ ഉയർന്ന ആക്ഷേപങ്ങൾക്കും പാർട്ടി സെക്രട്ടറി മറുപടി നൽകി. ഈ സമ്മേളനം സംഘടനാ ഭരണഘടനാപരമാണോയെന്ന ചോദ്യങ്ങൾക്ക് പ്രസക്തിയില്ലെന്നും ഇത്തരം വിപുലമായ ആഭ്യന്തര ചർച്ചകൾ നടത്താൻ പാർട്ടി ഭരണഘടന പൂർണ്ണ അധികാരം നൽകുന്നുണ്ടെന്നും അദ്ദേഹം ചൂണ്ടിക്കാട്ടി. പ്രാദേശികമായ പരാതികൾ പരിഹരിക്കുന്നതിൽ ഇനിമുതൽ സംസ്ഥാന സമിതി നേരിട്ട് പങ്കാളികളാകും. പ്രശ്നപരിഹാരത്തിനായി സംസ്ഥാന നേതൃത്വം നേരിട്ട് കീഴ്ഘടകങ്ങളിലേക്ക് ഇറങ്ങും. സംസ്ഥാന കമ്മിറ്റിക്ക് ലഭിക്കുന്ന പരാതികൾ ജില്ലാ കമ്മിറ്റികൾക്ക് കൈമാറുന്ന നിലവിലെ രീതി വേണ്ടത്ര ഫലപ്രദമാകുന്നില്ലെന്ന് കണ്ടാണ് ഈ തീരുമാനം.
പിണറായി വിജയനെതിരെയുള്ള എൻഫോഴ്സ്മെന്റ് ഡയറക്ടറേറ്റിന്റെ നീക്കം പാർട്ടിയെത്തന്നെ തകർക്കാനുള്ള ഗൂഢശ്രമത്തിന്റെ ഭാഗമാണെന്നും എം.വി. ഗോവിന്ദൻ പറഞ്ഞു. സംഘടനയിൽ കാതലായ പ്രായോഗിക മാറ്റങ്ങൾ നടപ്പിലാക്കും. സംഘടനാപരമായ അഴിച്ചുപണികൾ ഉണ്ടാകുമെങ്കിലും നിലവിലുള്ള കമ്മിറ്റികളുടെ പൂർണ്ണ പുനഃസംഘടന ഉണ്ടാവില്ലെന്നും അദ്ദേഹം കൂട്ടിച്ചേർത്തു.
