തിരുവനന്തപുരം: കേരള-തമിഴ്നാട് അതിർത്തിവഴിയുള്ള അനധികൃത റേഷൻ ധാന്യക്കടത്ത് തടയാൻ സിവിൽ സപ്ലൈസ് വകുപ്പ് പരിശോധനകൾ ഊർജ്ജിതമാക്കി. തിരുവനന്തപുരം പാറശ്ശാല കാരാളിയിൽ നടത്തിയ അപ്രതീക്ഷിത പരിശോധനയിൽ വീട്ടിനുള്ളിൽ ഒളിപ്പിച്ചുവെച്ച നിലയിൽ വലിയ തോതിൽ റേഷൻ അരി ശേഖരം പിടികൂടി. 'സുരേഖ' എന്ന ബ്രാൻഡിന്റെ ചാക്കുകളിലാക്കി അടുക്കളയിലും ബാത്ത്റൂമിലുമായാണ് ഇവ സൂക്ഷിച്ചിരുന്നത്. ഇവിടെ നിന്നും 199 ചാക്ക് റേഷൻ അരിയും 4 ചാക്ക് ഗോതമ്പും ഉദ്യോഗസ്ഥർ പിടിച്ചെടുത്തു. ഈ വീട് ആരുടേതാണെന്നോ പിടിച്ചെടുത്ത ധാന്യശേഖരം ആര് എത്തിച്ചതാണെന്നോ ഇതുവരെ തിരിച്ചറിഞ്ഞിട്ടില്ല. വലിയൊരു മാഫിയാ സംഘം ഇതിന് പിന്നിൽ പ്രവർത്തിക്കുന്നതായാണ് സൂചന. കഴിഞ്ഞ ഒരാഴ്ചയ്ക്കിടെ എട്ട് ഗോഡൗണുകളിൽ നടത്തിയ റെയ്ഡുകളിലായി ആകെ 62 ടൺ അരിയും നാല് ടൺ ഗോതമ്പും പിടിച്ചെടുത്തിട്ടുണ്ട്.റേഷൻ തിരിമറി നടത്തുന്ന കരിഞ്ചന്തക്കാരെ പിടികൂടാൻ കേസ് രജിസ്റ്റർ ചെയ്ത് അന്വേഷണം ഊർജ്ജിതമാക്കുമെന്നും അതിർത്തി ചെക്ക്പോസ്റ്റുകളിൽ പരിശോധന കർശനമാക്കുമെന്നും മന്ത്രി അനൂപ് ജേക്കബ് വ്യക്തമാക്കി.