കോഴിക്കോട്: സി.പി.ഐ.എം വിപുലീകൃത സംസ്ഥാന കമ്മിറ്റിയിലെ പൊതുചർച്ചയിൽ പാർട്ടി നേതൃത്വത്തിന് നേരെ കടുത്ത വിമർശനങ്ങളുയർത്തി പ്രതിനിധികൾ. വെള്ളാപ്പള്ളി നടേശനോട് കാട്ടിയ മൃദുസമീപനം പ്രസ്ഥാനത്തിന് വലിയ അപമാനമുണ്ടാക്കിയെന്ന് അംഗങ്ങൾ കുറ്റപ്പെടുത്തി. സംസ്ഥാന നേതൃത്വത്തിന്റെ ഭാഗത്തുനിന്നുണ്ടായത് ഗുരുതരമായ പിഴവുകളാണ്. വ്യക്തിപരമായ കടന്നാക്രമണങ്ങളിലേക്ക് ചർച്ചകൾ ഒതുക്കരുതെന്ന് ജില്ലാ സെക്രട്ടേറിയറ്റുകൾ വിളിച്ച് നിർദ്ദേശിച്ചിരുന്നെങ്കിലും, ആ മുന്നറിയിപ്പുകൾ മറികടന്നാണ് പ്രതിനിധികൾ നേതൃത്വത്തിനെതിരെ തിരിഞ്ഞത്.
തിരുവനന്തപുരത്ത് വി. ജോയിയെ ജില്ലാ സെക്രട്ടറിയായി നിലനിർത്തിയ തീരുമാനത്തെയും പ്രതിനിധികൾ ചോദ്യം ചെയ്തു. ജോയിയുടെ സംഘടനാപ്രവർത്തനത്തിൽ അതൃപ്തിയില്ലെങ്കിലും, ഒരു എം.എൽ.എയെത്തന്നെ ജില്ലാ സെക്രട്ടറി സ്ഥാനത്ത് തുടരാൻ അനുവദിച്ചതിനെ തൃശ്ശൂർ ജില്ലാ സെക്രട്ടേറിയറ്റ് നിശിതമായി വിമർശിച്ചു. തലസ്ഥാനത്ത് പാർട്ടിയെ നയിക്കാൻ മറ്റാരുമില്ലേയെന്നും എന്ത് മാനദണ്ഡത്തിന്റെ അടിസ്ഥാനത്തിലാണ് ഈ ഇളവെന്നും ചോദ്യമുയർന്നു. സംസ്ഥാനത്തെവിടെയും ജനപ്രതിനിധികളായവർ ജില്ലാ സെക്രട്ടറിമാരായി തുടരുന്നില്ലെന്നിരിക്കെ തിരുവനന്തപുരത്ത് മാത്രം എന്തിനാണ് ഇത്തരമൊരു പ്രത്യേക പരിഗണനയെന്ന് അവർ ചോദിച്ചു.
തളിപ്പറമ്പിലെയും പയ്യന്നൂരിലെയും തിരഞ്ഞെടുപ്പ് പരാജയങ്ങളെ പാർട്ടി ഒരേ പ്രാധാന്യത്തോടെ കണ്ടിരുന്നെങ്കിലും, വിപുലീകൃത സംസ്ഥാന സമിതിയിൽ ചർച്ചയ്ക്കുവെച്ച രേഖയിൽ തളിപ്പറമ്പിലെ തോൽവി മനഃപൂർവ്വം ഒഴിവാക്കിയെന്ന ആക്ഷേപവും ശക്തമായി. പയ്യന്നൂരിലെ വീഴ്ച മാത്രമാണ് രേഖയിൽ പരാമർശിച്ചിട്ടുള്ളത്. രണ്ട് മണ്ഡലങ്ങളിലെയും പരാജയത്തിൽ നേതൃത്വത്തിന് പാളിച്ചകൾ പറ്റിയെന്ന് സംസ്ഥാന-കേന്ദ്ര കമ്മിറ്റി റിപ്പോർട്ടുകൾ നേരത്തെ ചൂണ്ടിക്കാണിച്ചിരുന്നു. സംസ്ഥാന സെക്രട്ടറി എം.വി. ഗോവിന്ദന്റെ ഭാര്യ പി.കെ. ശ്യാമളയായിരുന്നു തളിപ്പറമ്പിലെ സ്ഥാനാർത്ഥി. ഇതെങ്ങനെയുള്ള നേതൃത്വമാണെന്ന് ചോദിച്ച അംഗങ്ങൾ, ബി.ജെ.പി ഡീൽ ആരോപണങ്ങൾ പ്രതിരോധിക്കുന്നതിലും സാമുദായിക സംഘടനകളോടുള്ള സമീപനത്തിലും വ്യക്തത പുലർത്താൻ സാധിച്ചില്ലെന്നും കുറ്റപ്പെടുത്തി.
യഥാർത്ഥ വീഴ്ചകൾ തുറന്നുപറയാൻ തിരുത്തൽ രേഖ തയ്യാറായിട്ടില്ലെന്നാണ് പ്രധാന ആക്ഷേപം. തെറ്റുകൾ കൃത്യമായി എണ്ണിപ്പറഞ്ഞ കേന്ദ്ര കമ്മിറ്റി റിപ്പോർട്ടിന്റെ ഗൗരവം പോലും സംസ്ഥാന സമിതി തയ്യാറാക്കിയ ഈ കരട് രേഖയ്ക്കില്ലെന്ന് പ്രതിനിധികൾ ആഞ്ഞടിച്ചു. കേന്ദ്ര നേതൃത്വം നിർദ്ദേശിച്ച ശൈലിയിലുള്ള ആഴത്തിലുള്ള സ്വയംവിമർശനം രേഖയിലില്ലെന്നും, തയ്യാറാക്കിയ റിപ്പോർട്ട് തീർത്തും ദുർബലമാണെന്നും അംഗങ്ങൾ വ്യക്തമാക്കി.
അതേസമയം, സംസ്ഥാന കമ്മിറ്റി അംഗങ്ങൾ വരുന്ന നവംബർ മാസത്തിനകം തങ്ങളുടെ സ്വത്തുവിവരങ്ങൾ പാർട്ടിയെ കൃത്യമായി അറിയിക്കണമെന്ന നിർണ്ണായക തീരുമാനവും യോഗത്തിൽ കൈക്കൊണ്ടു. ക്രമേണ ജില്ലാ, ഏരിയ കമ്മിറ്റി അംഗങ്ങൾക്കും ഈ വ്യവസ്ഥ നിർബന്ധമാക്കും. അംഗത്വം പുതുക്കുന്ന വേളകളിൽ സ്വത്ത് വിവരങ്ങൾ പാർട്ടി തലത്തിൽ സൂക്ഷ്മപരിശോധനയ്ക്ക് വിധേയമാക്കും. നേതാക്കൾ സാമ്പത്തിക വായ്പകൾ എടുക്കുമ്പോൾ പോലും മുൻകൂട്ടി പാർട്ടിയെ ധരിപ്പിക്കണം. സംഘടനയ്ക്കുള്ളിലെ സാമ്പത്തിക തിരിമറികൾക്ക് തടയിടാനാണ് ഈ കർശന മാനദണ്ഡങ്ങൾ.
വിപുലീകൃത സംസ്ഥാന സമിതിയുടെ സമാപന ദിവസം പാർട്ടിയുടെ രാഷ്ട്രീയശക്തി തെളിയിക്കാനുള്ള ഒരുക്കത്തിലാണ് സി.പി.ഐ.എം. ഇതിന്റെ ഭാഗമായി നാളെ ഒന്നര ലക്ഷം പേരെ അണിനിരത്തി വൻ പൊതുറാലി സംഘടിപ്പിക്കും. സി.പി.ഐ.എം ജനറൽ സെക്രട്ടറി എം.എ. ബേബി മഹാസമ്മേളനം ഉദ്ഘാടനം ചെയ്യും; പ്രതിപക്ഷ നേതാവ് പിണറായി വിജയനും ചടങ്ങിൽ പ്രസംഗിക്കും. തങ്ങളുടെ ബഹുജന സ്വാധീനത്തിന് യാതൊരു കോട്ടവും സംഭവിച്ചിട്ടില്ലെന്ന് ഉറപ്പിക്കാനാണ് പാർട്ടി ശ്രമിക്കുന്നത്. ഇതിന്റെ മുന്നോടിയായി കോഴിക്കോട് കടപ്പുറത്തും റാലി കടന്നുപോകുന്ന വഴികളിലും വിപുലമായ സന്നാഹങ്ങളാണ് ഏർപ്പെടുത്തിയിട്ടുള്ളത്. ജില്ലയിലുടനീളം നേതാക്കളുടെ സാന്നിധ്യത്തിൽ കുടുംബയോഗങ്ങൾ നേരത്തെ പൂർത്തിയാക്കിയിരുന്നു. മഹാറാലിയുടെ പശ്ചാത്തലത്തിൽ കോഴിക്കോട് നഗരത്തിൽ വിപുലമായ ഗതാഗത നിയന്ത്രണങ്ങളും ഏർപ്പെടുത്തിയിട്ടുണ്ട്.
