ആലപ്പുഴ: സി.പി.ഐ.എമ്മിനെ താറടിച്ചു കാണിക്കാൻ രാഷ്ട്രീയ എതിരാളികൾ കഠിനശ്രമം നടത്തുകയാണെന്ന് പാർട്ടി പോളിറ്റ് ബ്യൂറോ അംഗവും പ്രതിപക്ഷ നേതാവുമായ പിണറായി വിജയൻ. പാർട്ടിയുടെ ജനകീയ വിശ്വാസ്യത ഇല്ലാതാക്കാൻ ആർക്കും കഴിയില്ലെന്ന് അദ്ദേഹം വ്യക്തമാക്കി. ഒപ്പമുണ്ടായിരുന്നവരെ പണംകൊടുത്ത് വാങ്ങാൻ ശ്രമങ്ങൾ നടക്കുന്നുണ്ട്; കാലം മാറിയപ്പോൾ ചിലരെ സ്വാധീനിക്കാൻ അവർക്ക് സാധിച്ചു. അങ്ങനെ പാർട്ടിയെ ചതിച്ചവർ എതിരാളികൾക്ക് ആയുധമായി മാറുകയാണ് ഉണ്ടായത്. എന്നാൽ ഇതുകൊണ്ടൊന്നും പ്രസ്ഥാനത്തെ തളർത്താനാവില്ല. പരവതാനി വിരിച്ച പാതയിലൂടെ നടന്നു വളർന്ന ഒന്നല്ല സി.പി.ഐ.എം; പുന്നപ്ര-വയലാർ സമരഭൂമിയിലൂടെ ചോര ഒഴുക്കി കടന്നുവന്ന പാർട്ടിയാണ്. അതിന്റെ പോരാട്ട ചരിത്രം ഓരോ സഖാക്കൾക്കും വ്യക്തമായി ഓർമ്മയുണ്ടാകുമെന്നും അദ്ദേഹം പറഞ്ഞു.
സി.എം.ആർ.എൽ-എക്സാലോജിക് സാമ്പത്തിക വിവാദത്തിലും അദ്ദേഹം വിശദമായ മറുപടി നൽകി. 'മകൾ വീണ ഐ.ടി മേഖലയിൽ ജോലിചെയ്യുന്ന യുവതിയാണ്. പഠനം പൂർത്തിയാക്കി ലോകപ്രശസ്തമായ ഒറാക്കിൾ കമ്പനിയിലാണ് അവൾ ആദ്യം ജോലി ചെയ്തത്. വിവാഹത്തോടെ ആ ജോലിയിൽ തുടരാൻ കഴിയാതെ പോവുകയും വിദേശത്തടക്കം പോയി പിന്നീട് ജോലി ചെയ്യുകയും ചെയ്തു. അവിടെത്തന്നെ തുടർന്നിരുന്നെങ്കിൽ ഉയർന്ന ശമ്പളം വാങ്ങുന്ന പദവിയിലേക്ക് അവൾ എത്തുമായിരുന്നു. തുടർന്നാണ് സ്വന്തമായി സംരംഭം തുടങ്ങാൻ ശ്രമിക്കുകയും പ്രവർത്തനം ആരംഭിക്കുകയും ചെയ്തത്. ആ കമ്പനി നിരവധി സ്ഥാപനങ്ങൾക്ക് ഐ.ടി സേവനങ്ങൾ നൽകിയിട്ടുണ്ട്. അങ്ങനെ നൽകിയ സേവനങ്ങളുടെ ഭാഗമായാണ് സി.എം.ആർ.എൽ കമ്പനിയുമായുള്ള ഇടപാടും' എന്ന് അദ്ദേഹം വ്യക്തമാക്കി.
സി.എം.ആർ.എൽ പണം നൽകിയത് കൃത്യമായ രേഖകളുടെ അടിസ്ഥാനത്തിലാണെന്നും വാങ്ങിയ തുകയ്ക്ക് കൃത്യമായി നികുതി അടച്ചിട്ടുണ്ടെന്നും പിണറായി വിജയൻ ചൂണ്ടിക്കാട്ടി. ഒരു സ്ഥാപനത്തിന് ഔദ്യോഗികമായി നൽകിയ സേവനത്തിന് പ്രതിഫലമായി ലഭിച്ച വരുമാനത്തെയാണ് ഒരു ഘട്ടത്തിൽ വിവാദ ആരോപണമാക്കിയത്. ആ സമയത്തൊന്നും മുഹമ്മദ് റിയാസ് വീണയുടെ ഭർത്താവല്ല; പിന്നീടാണ് അവർ വിവാഹിതരായത്. എന്നാൽ ആ പണം വീണ തനിക്ക് വേണ്ടിയാണ് വാങ്ങിയതെന്നാണ് ഇപ്പോൾ പറയുന്നത്. ആ തുക വീണ പിന്നീട് റിയാസ് വഴി വിദേശത്തേക്ക് കടത്തിയെന്നാണ് ഇ.ഡിയുടെ പുതിയ കണ്ടെത്തൽ. വർഷങ്ങൾക്ക് മുൻപ് നൽകിയ സേവനത്തിന് കമ്പനിക്ക് കിട്ടിയ പണം വർഷങ്ങൾക്ക് ശേഷം ഭർത്താവായി വന്ന റിയാസിനായി കാത്തുവെച്ചു എന്നാണ് അന്വേഷണ ഏജൻസി സമർത്ഥിക്കുന്നത്. എല്ലാ രേഖകളോടെയും കൈപ്പറ്റിയ വരുമാനത്തെക്കുറിച്ചാണ് ഈ കെട്ടുകഥകൾ. എത്ര ലജ്ജാകരമായ സമീപനമാണിതെന്നും, എന്തോ വലിയ കാര്യം കണ്ടെത്തിയ മട്ടിൽ 'ഇതാ കിട്ടിപ്പോയി' എന്ന് ഒരു കേന്ദ്ര ഏജൻസി വിളിച്ചുപറയുന്നത് വിചിത്രമാണെന്നും അദ്ദേഹം പരിഹസിച്ചു.
മാസപ്പടി കേസിൽ ഇ.ഡിയുടെ നീക്കങ്ങളെ രാഷ്ട്രീയമായും നിയമപരമായും നേരിടുമെന്ന് അദ്ദേഹം പ്രഖ്യാപിച്ചു. ഏതുവിധേനയും തന്നെ കുറ്റപ്പെടുത്തുക മാത്രമാണ് ഇ.ഡിയുടെ ലക്ഷ്യം. അവരെ നിയന്ത്രിക്കുന്ന രാഷ്ട്രീയ യജമാനന്മാർ പറയുന്നതിനനുസരിച്ചാണ് അവർ പ്രവർത്തിക്കുന്നത്. തനിക്കെതിരെയുള്ള ഇത്തരം വേട്ടയാടലുകൾക്ക് വലിയ പഴക്കമുണ്ട്. തന്നെ ഇല്ലാതാക്കാൻ മോഹിക്കുന്ന ശക്തികളൊന്നും അതിനുതക്കവിധം വളർന്നിട്ടില്ല. രാഷ്ട്രീയ നീക്കങ്ങളെ രാഷ്ട്രീയമായും നിയമപരമായതിനെ നിയമവഴികളിലൂടെയും ചെറുക്കും.
താൻ നയിച്ച ജീവിതം ഈ നാടിനും ജനങ്ങൾക്കും നന്നായി അറിയാമെന്നും പിണറായി വിജയൻ ഓർമ്മിപ്പിച്ചു. തന്നോടുള്ള വ്യക്തിവിദ്വേഷവും പകയും തീർക്കാൻ വാർത്തകൾ അച്ചടിച്ച് നിരത്തിയാലൊന്നും തകർന്നുപോകുന്നതല്ല തന്റെ പൊതുജീവിതമെന്നും അദ്ദേഹം കൂട്ടിച്ചേർത്തു.
