മലപ്പുറം: മുഖ്യമന്ത്രി വി.ഡി. സതീശനെതിരെ സമസ്തയുടെ മുഖപത്രത്തിൽ വന്ന എഡിറ്റോറിയലിനെ രൂക്ഷമായി തള്ളിപ്പറഞ്ഞ് കെ.പി. നൗഷാദ് അലി എം.എൽ.എ. സുപ്രഭാതം പത്രത്തിൽ പ്രസിദ്ധീകരിച്ച മുഖപ്രസംഗം സമസ്തയ്ക്ക് ഒരിക്കലും യോജിക്കാൻ സാധിക്കാത്തതാണെന്ന് അദ്ദേഹം വ്യക്തമാക്കി. പൊതുനേതാക്കളെ അപകീർത്തിപ്പെടുത്തുന്ന സമീപനം സമസ്തയ്ക്കില്ലെന്നും ആക്ഷേപഹാസ്യങ്ങൾ കുത്തിനിറയ്ക്കാനുള്ള വേദിയല്ല മുഖപ്രസംഗമെന്നും എം.എൽ.എ കുറ്റപ്പെടുത്തി. സി.പി.ഐ.എമ്മിനോട് ചായ്വുള്ള ചില വ്യക്തികൾ തങ്ങളുടെ രാജഭക്തി കാണിക്കാൻ നടത്തുന്ന ശ്രമമാണിതെന്നും അദ്ദേഹം ആരോപിച്ചു.
'ഒരു മുഖപ്രസംഗത്തിൽ ആക്ഷേപഹാസ്യങ്ങൾ അടിച്ചേൽപ്പിക്കുന്നത് മാധ്യമധർമ്മമല്ല, അത് തികച്ചും അനുചിതമായ പ്രവർത്തനരീതിയാണ്. സി.പി.ഐ.എം ആഭിമുഖ്യമുള്ള ചിലർ തങ്ങളുടെ വിധേയത്വം പ്രകടിപ്പിക്കാൻ ശ്രമിക്കുകയാണ് ഇവിടെ. സമസ്ത എന്ന പ്രസ്ഥാനത്തിനകത്ത് സി.പി.ഐ.എമ്മിന് യാതൊരു സ്ലീപ്പർ സെല്ലുകളുമില്ല. എന്നാൽ സുപ്രഭാതം പത്രത്തിന്റെ സ്ഥാപനത്തിനുള്ളിൽ അത്തരം ചില ആളുകൾ പ്രവർത്തിക്കുന്നുണ്ടാകാം. രാഷ്ട്രീയ യജമാനന്മാരുടെ പ്രീതി നേടിയെടുക്കാനാണ് ഇത്തരത്തിലുള്ള മുഖപ്രസംഗങ്ങൾ പടച്ചുവിടുന്നത്', കെ.പി. നൗഷാദ് അലി തുറന്നടിച്ചു.
'മര്യാദയ്ക്ക് സംസാരിക്കണം' എന്ന തലക്കെട്ടോടെയായിരുന്നു കഴിഞ്ഞ ദിവസം സുപ്രഭാതത്തിൽ വിവാദ എഡിറ്റോറിയൽ വന്നത്. കാന്തപുരം എ.പി. അബൂബക്കർ മുസ്ലിയാരെ തള്ളിക്കൊണ്ട് മുഖ്യമന്ത്രി വി.ഡി. സതീശൻ നടത്തിയ പരാമർശങ്ങൾക്കെതിരെയായിരുന്നു ഈ മുഖപ്രസംഗം. മുഖ്യമന്ത്രിയുടെ നിലപാട് കുരുടൻ ആനയെ കണ്ടതുപോലെയാണെന്നായിരുന്നു പത്രത്തിലെ പ്രധാന ആക്ഷേപം. വി.ഡി. സതീശനെതിരെ കടുത്ത വിമർശനങ്ങൾ തൊടുത്തുവിട്ട മുഖപ്രസംഗത്തിൽ രമേശ് ചെന്നിത്തലയെ പ്രശംസിക്കുകയും ചെയ്തിരുന്നു.
