തിരുവനന്തപുരം: വരുംകാലങ്ങളിൽ തിരഞ്ഞെടുപ്പുകളിൽ തിരിച്ചടിയുണ്ടായാൽ അതിന്റെ പൂർണ്ണ ഉത്തരവാദിത്തം നേതാക്കൾ തന്നെ ഏറ്റെടുക്കണമെന്ന് സി.പി.ഐ.എം നേതൃത്വത്തിന്റെ കർശന നിർദ്ദേശം. തീരുമാനങ്ങളിൽ പിഴവ് സംഭവിച്ചാൽ അതിന്റെ പഴി കമ്മിറ്റികളുടെ മേൽ കെട്ടിവെച്ച് ഒഴിഞ്ഞുമാറാൻ സാധിക്കില്ലെന്ന് പാർട്ടി വ്യക്തമാക്കുന്നു. ഉടൻ നടക്കാനിരിക്കുന്ന വിപുലമായ സംസ്ഥാന കമ്മിറ്റി യോഗത്തിനായി തയ്യാറാക്കിയ രേഖയിലാണ് ഈ നിർദ്ദേശങ്ങൾ ഉൾപ്പെടുത്തിയിരിക്കുന്നത്.
നേതാക്കൾ പൊതുജനങ്ങളോടും പാർട്ടി അണികളോടും എളിമയോടെ പെരുമാറണമെന്നും, പ്രസംഗങ്ങൾ കാമ്പുള്ളതും കാര്യമാത്രപ്രസക്തവുമാകണമെന്നും രേഖയിൽ പ്രത്യേകം നിഷ്കർഷിക്കുന്നുണ്ട്. മുൻപ് തളിപ്പറമ്പിൽ പി.കെ. ശ്യാമള പരാജയപ്പെട്ടപ്പോൾ, സ്ഥാനാർത്ഥിയെ തീരുമാനിച്ചത് ജില്ലാ കമ്മിറ്റിയാണെന്നായിരുന്നു എം.വി. ഗോവിന്ദന്റെ ന്യായീകരണം. എന്നാൽ തളിപ്പറമ്പിലും പയ്യന്നൂരിലും സ്ഥാനാർത്ഥി നിർണ്ണയത്തിൽ ഗുരുതര പാളിച്ചകൾ സംഭവിച്ചതായി കേന്ദ്ര കമ്മിറ്റി തന്നെ കണ്ടെത്തിയതായാണ് പുറത്തുവന്ന വിവരങ്ങൾ.
നേതൃത്വത്തിന്റെ വീഴ്ചയാണ് പരാജയത്തിന് കാരണമെന്ന് ബ്രാഞ്ച് തലം മുതൽ സംസ്ഥാന കമ്മിറ്റി വരെയുള്ള താഴേത്തട്ടിലെ പ്രവർത്തകർ ചൂണ്ടിക്കാട്ടിയിരുന്നു. എന്നാൽ തളിപ്പറമ്പിലും പയ്യന്നൂരിലും സംഘടിപ്പിച്ച രാഷ്ട്രീയ വിശദീകരണ യോഗങ്ങളിൽ സംസാരിക്കവെ, വോട്ടർമാർക്കും അനുഭാവികൾക്കും തെറ്റിദ്ധാരണ ഉണ്ടായെന്ന തരത്തിൽ മുൻ മുഖ്യമന്ത്രി പിണറായി വിജയൻ നടത്തിയ പരാമർശം വലിയ വിവാദങ്ങൾക്ക് വഴിവെച്ചു. തെറ്റുകൾ കണ്ടെത്തി തിരുത്താൻ ഉദ്ദേശിച്ചുള്ള വിപുലമായ സംസ്ഥാന സമിതിക്ക് മുന്നോടിയായി, തോൽവിയുടെ ഭാരം സ്വന്തം ചുമലിൽ നിന്ന് മാറ്റാനുള്ള നീക്കങ്ങളാണ് നടക്കുന്നതെന്ന ആക്ഷേപവും ഉയരുന്നുണ്ട്.
വിഷയത്തിൽ നേതാക്കൾക്കിടയിലുള്ള അഭിപ്രായവ്യത്യാസങ്ങൾ വിഭാഗീയ ചർച്ചകളിലേക്ക് വരെ നീങ്ങിയിട്ടുണ്ട്. പരാജയത്തിൽ നേതൃത്വത്തിന് വീഴ്ച പറ്റിയെന്നും തിരുത്തൽ നടപടികൾ അനിവാര്യമാണെന്നും തോമസ് ഐസക്കും പി. ജയരാജനും ഉൾപ്പെടെയുള്ളവർ വാദിക്കുമ്പോൾ, പിണറായി വിജയന്റെ നിലപാടിനൊപ്പം നിൽക്കുന്ന സമീപനമാണ് എം.വി. ഗോവിന്ദനും സജി ചെറിയാനും സ്വീകരിച്ചത്. നാളെയും മറ്റന്നാളുമായി കോഴിക്കോട് വെച്ചാണ് സി.പി.ഐ.എമ്മിന്റെ നിർണ്ണായകമായ വിപുല സംസ്ഥാന കമ്മിറ്റി യോഗം ചേരുന്നത്.
