പത്തനംതിട്ട: വെള്ളപ്പൊക്ക സമയത്ത് രക്ഷാപ്രവർത്തനത്തിൽ സജീവമായിരുന്ന ഓഫ് റോഡ് ജീപ്പിന് മോട്ടോർ വാഹന വകുപ്പ് പിഴ ചുമത്തിയ നടപടിയിൽ പ്രതികരണവുമായി അബിൻ വർക്കി എം.എൽ.എ. ആറന്മുള ക്ഷേത്രപരിസരത്ത് വെള്ളമുയർന്ന ഘട്ടത്തിൽ ഓഫ് റോഡ് വാഹനം ഉപയോഗിച്ചാണ് ദമ്പതികൾ രക്ഷാദൗത്യം നടത്തിയതെന്ന് അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
തുടർച്ചയായി നാല് ദിവസത്തോളം ഇവർ ഈ വാഹനം ഉപയോഗിച്ച് രക്ഷാപ്രവർത്തനം നടത്തിയിരുന്നു. തുടർന്ന് അവശ്യസാധനങ്ങൾ വാങ്ങാനായി അടൂരിലെത്തിയ വേളയിലാണ് എം.വി.ഡി വാഹനം തടഞ്ഞുനിർത്തി പിഴ ഈടാക്കിയത്. നാടെങ്ങും വെള്ളപ്പൊക്ക ദുരിതത്തിലാണ്ട സമയത്ത്, വെള്ളം കയറാത്ത അടൂർ ടൗണിൽ വെച്ച് ഇത്തരമൊരു പരിശോധന നടത്തിയത് ഒട്ടും ഔചിത്യമില്ലാത്ത നടപടിയാണെന്ന് എം.എൽ.എ ചൂണ്ടിക്കാട്ടി. അന്ന് ചുമത്തിയ 5,250 രൂപയുടെ പിഴ യൂത്ത് കോൺഗ്രസ് നിയോജകമണ്ഡലം കമ്മിറ്റിയാണ് അടച്ചുതീർത്തത്. വാഹനത്തിൽ അധികമായി ഘടിപ്പിച്ചിരുന്ന ലൈറ്റുകൾ അഴിച്ചുമാറ്റിയ ശേഷം അതിന്റെ ദൃശ്യങ്ങൾ എം.വി.ഡിക്ക് അയച്ചുകൊടുക്കുകയും സംഭവം ഗതാഗത മന്ത്രിയുടെ ശ്രദ്ധയിൽപ്പെടുത്തുകയും ചെയ്തിരുന്നു. എന്നാൽ, നേരത്തെ പിഴയടച്ച് തീർപ്പാക്കിയ വിഷയത്തിൽ ഇപ്പോൾ വീണ്ടും കൂടുതൽ തുക ഈടാക്കാൻ കോടതി ഉത്തരവുണ്ടായിരിക്കുകയാണ്. അതേസമയം, ഹൈക്കോടതിയുടെ ഈ വിധിയെ പൂർണ്ണമായി ബഹുമാനിക്കുന്നുവെന്നും അദ്ദേഹം കുറിച്ചു.
ഓഗസ്റ്റ് ഒന്നിന് ആറന്മുള വള്ളസദ്യയിൽ പങ്കെടുക്കാനെത്തിയ ഹൈക്കോടതിയിലെ ഉന്നത വ്യക്തികളുടെ കുടുംബാംഗങ്ങൾ പ്രളയത്തിൽ കുടുങ്ങിയപ്പോൾ അവരെ സുരക്ഷിത സ്ഥാനത്തേക്ക് മാറ്റിയത് ഇതേ ഓഫ് റോഡ് വാഹനത്തിലാണ്. ദുരന്തമുഖത്ത് ആളുകളെ രക്ഷപ്പെടുത്തുന്ന നേരത്ത് വാഹനത്തിലെ ലൈറ്റുകളുടെ എണ്ണമോ നിയമപരമായ സങ്കീർണ്ണതകളോ ആരുടെയും ചിന്തയിൽ ഉണ്ടായിരുന്നില്ലെന്ന് അബിൻ വർക്കി ഓർമ്മിപ്പിച്ചു. ആറന്മുളയിൽ ജീവൻ പണയംവെച്ച് രക്ഷാപ്രവർത്തനം നടത്തിയവരെ സംരക്ഷിക്കാൻ പ്രദേശത്തെ ജനപ്രതിനിധിയെന്ന നിലയിൽ താൻ മുന്നിലുണ്ടാകും. സമൂഹമാധ്യമങ്ങളിൽ ആരെല്ലാം അപവാദങ്ങൾ പ്രചരിപ്പിച്ചാലും ദുരിതബാധിതർക്ക് തുണയായ അമൽ, ആർദ്ര എന്നീ ദമ്പതികൾക്കൊപ്പം ഉറച്ചുനിൽക്കുമെന്നും എം.എൽ.എ വ്യക്തമാക്കി.
