തിരുവനന്തപുരം: കേരളത്തിൽ വിദ്യാർത്ഥി പ്രക്ഷോഭങ്ങളെ പോലീസ് സേനയെ ഉപയോഗിച്ച് അടിച്ചമർത്തുകയാണെന്ന് ചൂണ്ടിക്കാട്ടി എ.ഐ.സി.സി അധ്യക്ഷൻ മല്ലികാർജുൻ ഖർഗെയ്ക്ക് കത്തയച്ച് പ്രതിപക്ഷ നേതാവ് പിണറായി വിജയൻ. കേരള സർവകലാശാലയിലേക്ക് എസ്.എഫ്.ഐ നടത്തിയ മാർച്ചിന് നേരെ അരങ്ങേറിയ ക്രൂരമായ പോലീസ് നടപടിയിൽ കടുത്ത പ്രതിഷേധം രേഖപ്പെടുത്തിയാണ് കത്ത് നൽകിയിട്ടുള്ളത്.
വന്ദേമാതരം പൂർണ്ണരൂപത്തിൽ നിർബന്ധപൂർവ്വം പാടിക്കുന്നത് സംഘപരിവാർ അജണ്ടയുടെ ഭാഗമാണെന്ന് കത്തിൽ ചൂണ്ടിക്കാണിക്കുന്നു. സംസ്ഥാനത്തെ യു.ഡി.എഫ് സർക്കാർ സംഘപരിവാർ താല്പര്യങ്ങൾക്ക് മുന്നിൽ കീഴടങ്ങുകയാണ്. വനിതാ പോലീസുകാരുടെ സാന്നിധ്യമില്ലാതെ പുരുഷ പോലീസുകാരാണ് പെൺകുട്ടികളെ വളഞ്ഞിട്ട് ആക്രമിച്ചതെന്നും കത്തിൽ അദ്ദേഹം ആരോപിച്ചു. ദേശീയതലത്തിൽ കോൺഗ്രസ് സ്വീകരിക്കുന്ന സമീപനങ്ങൾക്ക് വിരുദ്ധമായാണ് കേരളത്തിലെ പാർട്ടി ഘടകം പ്രവർത്തിക്കുന്നത്. സർവകലാശാലാ ഭരണത്തിൽ ഗവർണറുടെ ഇടപെടലുകൾക്ക് വഴിപ്പെടുകയാണ് സർക്കാർ ചെയ്തത്. വിഷയത്തിൽ എ.ഐ.സി.സി അധ്യക്ഷൻ നേരിട്ട് ഇടപെട്ട് കേരള നേതൃത്വത്തിന്റെ തെറ്റായ നയങ്ങൾ തിരുത്തണമെന്നും കത്തിലൂടെ അദ്ദേഹം ആവശ്യപ്പെട്ടു.
ഡൽഹിയിൽ അരങ്ങേറിയ വിദ്യാർത്ഥി പ്രക്ഷോഭത്തിന് നേരെ പോലീസ് അതിക്രമമുണ്ടായപ്പോൾ കോൺഗ്രസ് കേന്ദ്ര നേതൃത്വം വിദ്യാർത്ഥികൾക്ക് അനുകൂലമായ നിലപാടെടുത്ത പശ്ചാത്തലത്തിലാണ്, കേരളത്തിൽ ഭരണം കയ്യാളുന്ന കോൺഗ്രസ് സർക്കാരിന്റെ ഇരട്ടത്താപ്പ് തുറന്നുകാട്ടപ്പെടുന്നത്. കേരള സർവകലാശാലയിൽ വന്ദേമാതരം നിർബന്ധപൂർവ്വം പൂർണ്ണമായി ആലപിച്ചതിനെതിരെയായിരുന്നു എസ്.എഫ്.ഐയുടെ പ്രതിഷേധ മാർച്ച്. ഈ മാർച്ചിന് നേരെയുണ്ടായ പോലീസ് ലാത്തിച്ചാർജ്ജിൽ നിരവധി വിദ്യാർത്ഥികൾക്ക് ഗുരുതരമായി പരിക്കേറ്റിരുന്നു. എസ്.എഫ്.ഐ സംസ്ഥാന സെക്രട്ടറിയേറ്റ് അംഗം വൈഷ്ണവിയുടെ കണ്ണിന് താഴെ പരിക്കേറ്റ് ചോരയൊലിക്കുന്ന കാഴ്ച വ്യാപക പ്രതിഷേധത്തിന് വഴിവെച്ചു. ഇതിൽ പ്രതിഷേധിച്ച് സെക്രട്ടറിയേറ്റിലേക്ക് നടത്തിയ മാർച്ചിലും വിദ്യാർത്ഥികൾക്കെതിരെ പോലീസ് ബലപ്രയോഗം നടത്തി.
സംസ്ഥാന സെക്രട്ടറി പി.എസ്. സഞ്ജീവിന് ഉൾപ്പെടെ ലാത്തിയടിയേൽക്കുകയും ദേഹാസ്വാസ്ഥ്യം അനുഭവപ്പെട്ടതിനെത്തുടർന്ന് ആശുപത്രിയിൽ പ്രവേശിപ്പിക്കുകയും ചെയ്തു. കൂടാതെ, അന്നേ ദിവസം മാർച്ചിൽ പങ്കെടുക്കാതിരുന്ന വൈഷ്ണവിയെ ഉൾപ്പെടെ പ്രതിപ്പട്ടികയിൽ ചേർത്ത പോലീസിന്റെ നടപടി വലിയ വിമർശനങ്ങൾക്ക് ഇടയാക്കിയിരുന്നു. ഇതിന് പിന്നാലെ അന്ന് രാത്രി ആശുപത്രിയിൽ കടന്നുകയറി എസ്.എഫ്.ഐ സംസ്ഥാന ജോയിന്റ് സെക്രട്ടറി എസ്.കെ. ആദർശ് അടക്കമുള്ള നേതാക്കളെ പോലീസ് കസ്റ്റഡിയിലെടുത്തതും വിവാദമായിരുന്നു. ഡൽഹിയിൽ പെല്ലറ്റ് ഏറ്റ് പരിക്കേറ്റ വിദ്യാർത്ഥിക്കായി രാഹുൽ ഗാന്ധി നേരിട്ട് തെരുവിലിറങ്ങി സമരം ചെയ്യുമ്പോൾ, സ്വന്തം പാർട്ടി ഭരിക്കുന്ന സംസ്ഥാനത്ത് വിദ്യാർത്ഥി സമരങ്ങളോട് കാട്ടുന്ന ഈ വൈരുദ്ധ്യം പിണറായി കത്തിൽ എടുത്തുപറയുന്നു. സംസ്ഥാന സർക്കാർ കേന്ദ്രത്തിന്റെ പാതയിലാണ് നീങ്ങുന്നതെന്ന് അദ്ദേഹം നേരത്തെയും ആരോപിച്ചിരുന്നു.
