തൃശൂർ: ഏഴ് കോളേജ് വിദ്യാർത്ഥികളുൾപ്പെടെ എട്ടുപേരുടെ ദാരുണ അന്ത്യത്തിനിടയാക്കിയ വാഹനാപകടത്തിന് പിന്നിൽ അതീവ ഗുരുതരമായ അനാസ്ഥയെന്ന് ചൂണ്ടിക്കാണിക്കപ്പെടുന്നു. കയ്പമംഗലത്ത് ദേശീയപാത നവീകരണം നടക്കുന്ന ഭാഗത്തെ അതിവേഗ ട്രാക്കിൽ ഉത്തരവാദിത്തമില്ലാതെ നിർത്തിയിട്ടിരുന്ന ലോറിയുടെ പിൻഭാഗത്തേക്ക് വിദ്യാർത്ഥികൾ സഞ്ചരിച്ചിരുന്ന കാർ പാഞ്ഞുകയറുകയായിരുന്നു. വാഹനങ്ങൾ തിരിച്ചുവിടുന്നത് സംബന്ധിച്ച ഡൈവേർഷൻ മുന്നറിയിപ്പ് ബോർഡിനെ മറയ്ക്കുന്ന വിധത്തിലാണ് ചരക്കുലോറി പാർക്ക് ചെയ്തിരുന്നത്; അതിനാൽ തന്നെ കാർ ഓടിച്ചിരുന്നയാൾക്ക് ബോർഡ് കാണാൻ കഴിഞ്ഞിട്ടുണ്ടാകില്ലെന്നാണ് പ്രാഥമിക നിഗമനം. ലോറി അശ്രദ്ധമായി നിർത്തിയിട്ടതാണ് ഈ വൻ ദുരന്തത്തിന് ഇടയാക്കിയതെന്ന് കൊടുങ്ങല്ലൂർ ഡിവൈ.എസ്.പി രതീഷ് വ്യക്തമാക്കി.
സംഭവം നടക്കുമ്പോൾ മൂന്ന് ലോറികളാണ് ആ ഭാഗത്തുണ്ടായിരുന്നത്. അപകടം നടന്നയുടൻ മറ്റ് രണ്ട് ലോറികളും അവിടെനിന്ന് മാറ്റുകയായിരുന്നു. അപകടത്തിൽപ്പെട്ട ലോറിയുടെ ഡ്രൈവർ സംഭവസ്ഥലത്തുനിന്ന് ഓടിരക്ഷപ്പെട്ടതായി പോലീസ് അറിയിച്ചു. ഡൈവേർഷൻ ബോർഡിന് തൊട്ടുമുന്നിലായാണ് ഈ വാഹനം നിർത്തിയിട്ടിരുന്നത്. മുൻപും നിരന്തരം അപകടങ്ങൾ നടക്കുന്ന പ്രദേശമാണിതെന്നും, കരിമ്പട്ടികയിൽ ഉൾപ്പെട്ട നിർമ്മാണക്കമ്പനിയെയാണ് ദേശീയപാത പണി ഏൽപ്പിച്ചിരിക്കുന്നതെന്നും നാട്ടുകാർ കുറ്റപ്പെടുത്തി. വിഷയത്തിൽ ദേശീയപാത അതോറിറ്റിയുടെ ഭാഗത്തുനിന്ന് വൻ വീഴ്ചയാണ് ഉണ്ടായിട്ടുള്ളതെന്നും പ്രദേശവാസികൾ ആരോപിച്ചു.
അർദ്ധരാത്രി 12 മണിയോടെയാണ് കയ്പമംഗലത്ത് ഈ ദാരുണസംഭവം അരങ്ങേറിയത്. തമിഴ്നാട് രജിസ്ട്രേഷനിലുള്ള കാറിലായിരുന്നു ഡിണ്ടിഗൽ സ്വദേശികളായ വിദ്യാർത്ഥികളുടെ യാത്ര. മരണപ്പെട്ടവരിൽ അഞ്ച് പേരെയാണ് നിലവിൽ തിരിച്ചറിഞ്ഞിട്ടുള്ളത്. സേലം സ്വദേശി വിശ്വം (20), ഡിണ്ടിഗൽ സ്വദേശി സൂര്യ (20), മധുര സ്വദേശി സന്തോഷ് (20), മധുര സ്വദേശി പ്രസന്ന, ഡിണ്ടിഗൽ സ്വദേശി യുവസഞ്ജിത് (20) എന്നിവരാണ് തിരിച്ചറിയപ്പെട്ടവർ. ഇവർ പി.എസ്.എൻ.എ എഞ്ചിനീയറിംഗ് കോളേജിലെ വിദ്യാർത്ഥികളാണ്. ഇടിയുടെ ആഘാതത്തിൽ കാർ പൂർണ്ണമായും തകർന്നുപോയി. ഗുരുവായൂർ ദർശനം കഴിഞ്ഞ് കൊടുങ്ങല്ലൂർ ഭാഗത്തേക്ക് മടങ്ങുകയായിരുന്നു ഈ സംഘം.
ഇൻക്വസ്റ്റ് നടപടികൾ പുരോഗമിക്കുകയാണെന്നും അവ പൂർത്തിയാകുന്ന മുറയ്ക്ക് രാവിലെ ഒമ്പത് മണിയോടെ മൃതദേഹങ്ങളുടെ പോസ്റ്റ്മോർട്ടം ആരംഭിക്കുമെന്നും മെഡിക്കൽ കോളേജ് സൂപ്രണ്ട് അറിയിച്ചു.
