കണ്ണൂർ: സി.പി.ഐ.എം കണ്ണൂർ ജില്ലാ സെക്രട്ടറി കെ.കെ. രാഗേഷിനെ രൂക്ഷമായ ഭാഷയിൽ പരിഹസിച്ച് മന്ത്രി കെ. മുരളീധരൻ. രാഗേഷിന്റെ സാന്നിധ്യം കാരണമാണ് കണ്ണൂർ ജില്ലയിൽ യു.ഡി.എഫിന് അധികമായി രണ്ട് നിയമസഭാ സീറ്റുകൾ ലഭിച്ചതെന്നും, അതിനാൽ അദ്ദേഹം ജില്ലാ സെക്രട്ടറി പദവിയിൽ തന്നെ തുടരണമെന്നും മുരളീധരൻ പരിഹാസരൂപേണ പറഞ്ഞു. സ്വന്തം പാർട്ടിക്ക് പോലും ആവശ്യമില്ലാത്ത ഒരു ജില്ലാ സെക്രട്ടറിയായി രാഗേഷ് മാറിയിരിക്കുകയാണെന്നും അദ്ദേഹം ആരോപിച്ചു.
കാന്തപുരം എ.പി. അബൂബക്കർ മുസ്ലിയാർ സ്വീകരിച്ച സ്ത്രീവിരുദ്ധ നിലപാടുകളോടും ആരോഗ്യമന്ത്രി വിയോജിപ്പ് പ്രകടിപ്പിച്ചു. സമൂഹത്തിൽ സ്ത്രീകൾ കൈവരിച്ച വളർച്ചയെ വിസ്മരിക്കരുതെന്ന് വ്യക്തമാക്കിയ അദ്ദേഹം, പേരാമ്പ്രയിൽ തെരഞ്ഞെടുക്കപ്പെട്ടത് ഒരു മുസ്ലിം വനിതയാണെന്ന വസ്തുതയും ചൂണ്ടിക്കാട്ടി. ഇത് കാലം കൊണ്ടുവന്ന മാറ്റമാണെന്നും സ്ത്രീസമൂഹത്തിന്റെ ശാക്തീകരണവും മുന്നേറ്റവും ഉൾക്കൊള്ളാൻ എല്ലാവരും തയ്യാറാകണമെന്നും അദ്ദേഹം ആവശ്യപ്പെട്ടു.
പ്രതിപക്ഷ നേതാവ് പിണറായി വിജയന്റെ ശൈലിയെയും മന്ത്രി വിമർശിച്ചു. ഓണക്കാലത്ത് പോലും ജനപ്രതിനിധികളെ അധിക്ഷേപിച്ചു നടക്കുകയാണ് പിണറായി വിജയനെന്നും, വിജയിപ്പിച്ച വോട്ടർമാരെപ്പോലും അദ്ദേഹം മോശമായി സംസാരിക്കുന്നുവെന്നും മുരളീധരൻ കുറ്റപ്പെടുത്തി.
സ്വകാര്യ ആരോഗ്യ സ്ഥാപനങ്ങളാണെന്ന കാരണത്താൽ തോന്നിയപോലെ പ്രവർത്തിക്കാൻ അനുവദിക്കില്ലെന്നും ആരോഗ്യമന്ത്രി വ്യക്തമാക്കി. പൊതുമേഖലയിലെ സർക്കാർ ആശുപത്രികളെ തകർക്കുക എന്നതാണ് പല സ്വകാര്യ ആശുപത്രികളുടെയും അജണ്ടയെന്ന് ആരോപിച്ച അദ്ദേഹം, ഇത്തരം സ്വകാര്യ ആശുപത്രികളിൽ 60 ശതമാനത്തോളം വിദേശ നിക്ഷേപമാണുള്ളതെന്നും അവിടെ ചികിത്സ തേടുന്നവർ കൂടുതൽ ജാഗ്രത പുലർത്തണമെന്നും ഓർമ്മിപ്പിച്ചു.
