കൊച്ചി: കേരളത്തിലെ നദികളുടെ ആഴം വർദ്ധിപ്പിക്കേണ്ടത് അത്യന്താപേക്ഷിതമാണെന്ന് ഉപരാഷ്ട്രപതി സി.പി. രാധാകൃഷ്ണൻ. സംസ്ഥാനത്ത് പ്രളയക്കെടുതികൾ ആവർത്തിക്കുകയാണെന്നും നഗരപ്രദേശങ്ങളെപ്പോലും ഇത് സാരമായി ബാധിക്കുന്നുണ്ടെന്നും അദ്ദേഹം ഓർമ്മിപ്പിച്ചു. പുഴകളിൽ നിന്ന് മണൽ യഥാസമയം നീക്കം ചെയ്യാത്തതാണ് ഈ ദുരവസ്ഥയ്ക്ക് പ്രധാന കാരണമെന്ന് അദ്ദേഹം ചൂണ്ടിക്കാട്ടി. വിഷയത്തിൽ കോടതി ഉത്തരവുകളാണ് തടസ്സമാകുന്നതെങ്കിൽ യാഥാർത്ഥ്യങ്ങൾ കോടതിയെ ബോധ്യപ്പെടുത്താൻ തയ്യാറാകണമെന്നും, അന്ധമായ പരിസ്ഥിതി വാദങ്ങൾക്ക് പിന്നാലെ പോകരുതെന്നും അദ്ദേഹം അഭിപ്രായപ്പെട്ടു. എല്ലാ വിഷയങ്ങളിലും രാഷ്ട്രീയം കലർത്തുന്നത് ഒഴിവാക്കണമെന്നും അദ്ദേഹം ആവശ്യപ്പെട്ടു.
പുഴകളിലെ സ്വാഭാവിക സംഭരണശേഷി ഇടിയുന്നതാണ് ജലനിരപ്പ് ഉയരാൻ ഇടയാക്കുന്നത്. നദികളുടെ ആഴം കൂട്ടിയില്ലെങ്കിൽ അധികജലം എങ്ങനെ ഒഴുകിപ്പോകുമെന്നും, അത്തരം നടപടികളെ എതിർക്കുന്നവർ ഇതിന് കൃത്യമായ മറുപടി നൽകണമെന്നും അദ്ദേഹം പറഞ്ഞു. അമിതമായ പരിസ്ഥിതി ഭ്രാന്ത് കാണിക്കാതെ, പ്രകൃതി സംരക്ഷണത്തോടൊപ്പം നാടിന്റെ വികസനവും ഉറപ്പുവരുത്തുകയാണ് വേണ്ടത്. മുൻകാല കണക്കുകൂട്ടലുകളെല്ലാം തെറ്റിക്കുന്ന തരത്തിലുള്ള കനത്ത മഴയാണ് നിലവിൽ പെയ്യുന്നതെന്നും ഉപരാഷ്ട്രപതി വിശദീകരിച്ചു.
ദ്വിദിന സന്ദർശനത്തിന്റെ ഭാഗമായി കേരളത്തിലെത്തിയ ഉപരാഷ്ട്രപതിക്ക് കൊച്ചി അന്താരാഷ്ട്ര വിമാനത്താവളത്തിൽ ഊഷ്മള സ്വീകരണം നൽകി. ഇന്ത്യൻ നാവികസേനയുടെ പ്രത്യേക വിമാനത്തിലെത്തിയ അദ്ദേഹത്തെ ഗവർണർ രാജേന്ദ്ര ആർലേക്കർ, ഉന്നതവിദ്യാഭ്യാസ മന്ത്രി റോജി എം. ജോൺ എന്നിവർ ചേർന്ന് സ്വീകരിച്ചു. കൊച്ചിയിലെ ചടങ്ങുകൾക്ക് ശേഷം ആലപ്പുഴയിലേക്ക് തിരിച്ച അദ്ദേഹം തിരുവനന്തപുരം, കൊച്ചി, ലക്ഷദ്വീപ് എന്നിവിടങ്ങളിലെ വിവിധ പൊതുപരിപാടികളിലും പങ്കെടുക്കും.
