:
കോഴിക്കോട്: സ്ത്രീവിരുദ്ധ പരാമർശങ്ങളടങ്ങിയ സമസ്ത കാന്തപുരം വിഭാഗത്തിന്റെ സർക്കുലറിനെതിരെ സാംസ്കാരിക മേഖലയിൽ പ്രതിഷേധം കനക്കുന്നതിനിടെ, വിമർശനവുമായി കോളേജ് അധ്യാപികയും എഴുത്തുകാരിയുമായ ശബ്നം നൂർജഹാൻ. കേരളത്തിലെ മുസ്ലിം സമുദായത്തിൽ ഏറ്റവും യാഥാസ്ഥിതികരും സ്ത്രീവിരുദ്ധരുമായ വിഭാഗം കാന്തപുരം എ.പി. അബൂബക്കർ മുസ്ലിയാരുടെ നേതൃത്വത്തിലുള്ള വിഭാഗമാണെന്ന് ശബ്നം തന്റെ ഫേസ്ബുക്ക് കുറിപ്പിൽ ചൂണ്ടിക്കാട്ടി. സ്ത്രീത്വത്തെ അടച്ചാക്ഷേപിക്കുന്ന തരത്തിലുള്ള നിലപാടുകൾ നിരന്തരം പുറപ്പെടുവിച്ച് കാന്തപുരം മലയാളികളെ പരസ്യമായി വെല്ലുവിളിക്കുകയാണെന്ന് അവർ കുറ്റപ്പെടുത്തി.
1970-കളിൽ പെട്രോഡോളർ വരുമാനത്തിന്റെ കരുത്തിൽ സൗദി അറേബ്യ ആഗോളതലത്തിൽ വഹാബി-സലഫി ആശയങ്ങൾ പ്രചരിപ്പിക്കാൻ പദ്ധതികൾ തയ്യാറാക്കിയതോടെയാണ് കേരളത്തിലും ഈ ധാര ശക്തമായത്. ഈജിപ്ഷ്യൻ സ്വാധീനമുള്ളവർക്കും പുതിയ ചിന്താഗതിക്കാർക്കും ധനസഹായം ലഭിച്ചതോടെ പ്രസ്ഥാനം പടർന്നുപന്തലിച്ചു. ഇതിനോടുള്ള പ്രതികരണമായാണ് പരമ്പരാഗത മുസ്ലിം ധാരയ്ക്കുള്ളിൽ വഴിപിരിയലുകൾ ഉണ്ടായത്. പരമ്പരാഗത സൂഫി സംസ്കാരം പിന്തുടർന്നിരുന്ന സമസ്തയുടെ പ്രതിരോധത്തിന് വീര്യം പോരെന്ന വാദമുയർത്തി കാന്തപുരത്തിന്റെ കീഴിൽ പുതിയൊരു വിഭാഗം ഉദയം ചെയ്തു. മതം പ്രചരിപ്പിക്കാൻ സൗദി പണമൊഴുക്കിയപ്പോൾ, വിശ്വാസത്തെ സാമ്പത്തിക നേട്ടമാക്കി മാറ്റാനുള്ള തന്ത്രമാണ് കാന്തപുരം ആവിഷ്കരിച്ചതെന്ന് ശബ്നം അഭിപ്രായപ്പെട്ടു.
തീവ്ര മതാശയങ്ങളിലൂടെ വൻതോതിൽ പണം സമാഹരിച്ച് ഈ വിഭാഗം തങ്ങളുടെ ഘടനയെ കോർപ്പറേറ്റ് ശൈലിയിലേക്ക് പരിവർത്തിപ്പിച്ചു. രാജ്യത്തിനകത്തും വിദേശത്തുമായി ഫ്രാഞ്ചൈസി മാതൃകയിൽ ശാഖകൾ തുറന്ന് വലിയ സാമ്പത്തിക-അധികാര സമുച്ചയങ്ങൾ നിർമ്മിച്ചു. തിരുശേഷിപ്പുകളുടെയും കേശത്തിന്റെയും പേരിലുള്ള ഫണ്ട് ശേഖരണവും ഇതിന്റെ ഭാഗമായിരുന്നു. ഇതിന്റെ തുടർച്ചയായാണ് കോർപ്പറേറ്റ് ഇസ്ലാമിന്റെ കേന്ദ്രമായ 'മർക്കസ് നോളജ് സിറ്റി'യെയും, പ്രസ്ഥാന നായകന്റെ അന്ത്യവിശ്രമ കേന്ദ്രത്തെയും ഭാവിയിലെ വൻ തീർത്ഥാടന-വാണിജ്യ കേന്ദ്രമാക്കി വളർത്താനുള്ള തന്ത്രങ്ങൾ അണിയറയിൽ ഒരുങ്ങുന്നത്. ഈ സംവിധാനത്തെ ആധുനിക രീതിയിൽ വ്യാവസായികമാക്കുന്നതിൽ കോർപ്പറേറ്റ് ചിന്താഗതിക്കാരനായ കാന്തപുരത്തിന്റെ മകൻ ഹക്കീം അസ്ഹരിയുടെ സ്വാധീനം വളരെ വലുതാണെന്നും അവർ പറഞ്ഞു.
കാന്തപുരം വിഭാഗത്തിന്റെ കാഴ്ചപ്പാടുകൾക്ക് താലിബാൻ രീതികളോട് വലിയ ചേർച്ചയുണ്ട്. ശരീരം മുഴുവൻ മൂടുന്ന വസ്ത്രധാരണ രീതി അടിച്ചേൽപ്പിക്കാനും ജീവിതത്തിലെ സമസ്ത മേഖലകളിലും ലിംഗപരമായ വിവേചനം ഉറപ്പിക്കാനും ഇവർ മുന്നിൽ നിൽക്കുന്നു. മുൻപ് സ്ത്രീകൾക്ക് വിദ്യാഭ്യാസം പാടേ വിലക്കിയിരുന്ന ഇവർ, ഇപ്പോൾ ചില ഇളവുകൾ അനുവദിച്ചിട്ടുണ്ടെങ്കിലും അതെല്ലാം കടുത്ത നിരീക്ഷണങ്ങൾക്കും വേലിക്കെട്ടുകൾക്കും അകത്തു മാത്രമാണ്. പൊതുരംഗത്തോ പൊതുപ്രവർത്തനങ്ങളിലോ പങ്കാളികളാകാനുള്ള വിലക്ക് ഇപ്പോഴും തുടരുന്നു. പുരുഷകേന്ദ്രീകൃത ലോകത്ത് സ്ത്രീകളെ വെറുമൊരു ഉപഭോഗവസ്തുവായി മാത്രമാണ് ഇവർ കാണുന്നത്. പങ്കാളിക്ക് ആർത്തവമുണ്ടാകുമ്പോൾ പുരുഷന് മറ്റൊരു വിവാഹം കഴിക്കാമെന്ന് വിധി പുറപ്പെടുവിച്ച 'ഗ്രാൻഡ് മുഫ്തി' തന്നെയാണ് ഈ സ്ത്രീവിരുദ്ധ കോർപ്പറേറ്റ് ഇസ്ലാമിക മാതൃകയ്ക്ക് അടിത്തറയിട്ടതെന്നും ശബ്നം ഓർമ്മിപ്പിച്ചു.
കേരളത്തിൽ ഇത്രയധികം സ്ത്രീവിരുദ്ധമായ മറ്റൊരിടം 'നോളജ് സിറ്റി' പോലെ വേറെയുണ്ടാകില്ലെന്ന് അവർ ആരോപിച്ചു. പൊതുവേദികളിൽ സ്ത്രീകൾക്ക് വിലക്കുള്ള, ഹിജാബും നിഖാബുമില്ലാതെ പ്രവേശിക്കാൻ അദൃശ്യ തടസ്സങ്ങളുള്ള ഇത്തരം തടവറകളെ വിദ്യാഭ്യാസ സ്ഥാപനങ്ങളെന്ന് വിളിക്കുന്നത് സമൂഹത്തിന് തന്നെ ലജ്ജാകരമാണ്. കഴിഞ്ഞ എട്ട് വർഷമായി നടത്തുന്ന കവിയരങ്ങുകളിൽ സ്ത്രീകളെ പങ്കെടുപ്പിച്ചിരുന്നില്ല. അഞ്ച് വർഷത്തിന് ശേഷം പ്രതിഷേധങ്ങൾ ഉയർന്നപ്പോൾ സ്ത്രീകൾക്കായി പ്രത്യേക വേദി ഒരുക്കി ഒത്തുതീർപ്പിന് ശ്രമിക്കുകയാണുണ്ടായത്. ഇത്തരം സ്ത്രീകളെ അകറ്റിനിർത്തുന്ന വേദികളിൽ വർഷങ്ങളായി പ്രമുഖ സാംസ്കാരിക നായകർ പങ്കെടുക്കുന്നത് അപമാനകരമാണെന്നും ആ കവികൾ കേരളീയ പൊതുസമൂഹത്തോട് മാപ്പ് പറയണമെന്നും അവർ ആവശ്യപ്പെട്ടു. സംഘടനകളിലും പള്ളികളിലും സ്ത്രീകൾക്ക് പ്രവേശനമില്ലെങ്കിലും, രാത്രികാല ഓൺലൈൻ പ്രാർത്ഥനകളിലൂടെ സാധുക്കളായ സ്ത്രീകളുടെ പണം പിരിച്ചെടുക്കുന്ന ചൂഷണം തടസ്സമില്ലാതെ നടക്കുന്നുണ്ടെന്നും ശബ്നം ചൂണ്ടിക്കാട്ടി.
ഇസ്ലാമിക ആഘോഷ പരിപാടികളിൽ സ്ത്രീകളെ പൊതുയിടങ്ങളിൽ കൊണ്ടുവരരുതെന്നും പ്രദർശിപ്പിക്കരുതെന്നുമായിരുന്നു കാന്തപുരം വിഭാഗം പുറത്തിറക്കിയ സർക്കുലർ. അന്യപുരുഷന്മാർ കൂടുന്ന വേദികളിലേക്ക് സ്ത്രീകളെ വിടരുതെന്നും ആഘോഷങ്ങൾ അതിരുവിടുന്നത് തടയണമെന്നും കാന്തപുരം അബൂബക്കർ മുസ്ലിയാർ ആഹ്വാനം ചെയ്തിരുന്നു. നബിദിന പരിപാടികളിൽ സ്ത്രീകൾ പങ്കെടുത്തത് ചില കേന്ദ്രങ്ങളിൽ വിമർശനങ്ങൾക്ക് ഇടയാക്കിയ പശ്ചാത്തലത്തിലാണ് മഹല്ലുകൾക്കും മദ്രസകൾക്കും സമസ്ത കാന്തപുരം വിഭാഗം ഈ കർശന നിർദ്ദേശം നൽകിയത്. ആഘോഷങ്ങൾ അതിരുകടക്കരുതെന്നും മഹല്ല് ഭാരവാഹികൾ ഇക്കാര്യത്തിൽ ജാഗ്രത കാട്ടണമെന്നും കാന്തപുരം വ്യക്തമാക്കിയിരുന്നു.
