കണ്ണൂർ: കണ്ണൂർ സെൻട്രൽ ജയിലിൽ കാപ്പ തടവുകാർ പരസ്പരം ഏറ്റുമുട്ടി. വാക്കുതർക്കത്തെത്തുടർന്നുണ്ടായ അക്രമത്തിൽ കോട്ടയം സ്വദേശിയായ മനു എന്ന തടവുകാരന് കുത്തേറ്റു. ഗുരുതരമായി പരിക്കേറ്റ ഇയാളെ വിദഗ്ദ്ധ ചികിത്സയ്ക്കായി പരിയാരം മെഡിക്കൽ കോളേജ് ആശുപത്രിയിലേക്ക് മാറ്റി. എറണാകുളം സ്വദേശിയായ അപ്പു എന്നയാളാണ് മനുവിനെ ആക്രമിച്ചത്.
അതേസമയം, കണ്ണൂർ സ്പെഷ്യൽ സബ് ജയിലിൽ ഒരു തടവുകാരന്റെ ആക്രമണത്തിൽ ജയിൽ ഉദ്യോഗസ്ഥന് പരിക്കേറ്റു. പീഡനക്കേസിലെ വിചാരണത്തടവുകാരനായ സുഹൈൽ എന്നയാളാണ് അസിസ്റ്റന്റ് പ്രിസൺ ഓഫീസർ ചിൽനേഷ് ചന്ദ്രനെ മർദ്ദിച്ചത്. സംഭവത്തിൽ അസിസ്റ്റന്റ് സൂപ്രണ്ട് നൽകിയ പരാതിയുടെ അടിസ്ഥാനത്തിൽ കണ്ണൂർ ടൗൺ പോലീസ് പ്രതിക്കെതിരെ കേസ് രജിസ്റ്റർ ചെയ്ത് അന്വേഷണം ആരംഭിച്ചു.
