തിരുവനന്തപുരം: ജില്ലയിൽ കെ.എസ്.ആർ.ടി.സിയുടെ പ്രിയദർശിനി ബസുകൾക്ക് നേരെ അജ്ഞാതരുടെ അക്രമം. ഇന്നലെ രാത്രി ഇരുചക്രവാഹനത്തിലെത്തിയ രണ്ടുപേർ അടങ്ങുന്ന സംഘമാണ് കല്ലേറ് നടത്തിയത്. വെഞ്ഞാറമൂട്, കിളിമാനൂർ ഡിപ്പോകളുടെ കീഴിലുള്ളതും തിരുവനന്തപുരം, മെഡിക്കൽ കോളേജ് റൂട്ടുകളിൽ സർവീസ് നടത്തുന്നതുമായ ബസുകളുടെ ചില്ലുകളാണ് തകർത്തത്. പാങ്ങോട് പോലീസ് സ്റ്റേഷൻ അതിർത്തിയിലെ പരപ്പിൽ ജങ്ഷനിൽ രാത്രി നിർത്തിയിട്ടിരുന്ന (സ്റ്റേ ബസുകൾ) വാഹനങ്ങൾക്ക് നേരെയായിരുന്നു ആക്രമണം. അക്രമത്തിന് പിന്നിലെ ചേതോവികാരം വ്യക്തമായിട്ടില്ലെന്നും സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ടെന്നും അധികൃതർ അറിയിച്ചു.