തിരുവനന്തപുരം: നിക്ഷിപ്ത താത്പര്യങ്ങൾ മുൻനിർത്തി സർക്കാരിനെ ലക്ഷ്യംവെച്ചുള്ള കടന്നാക്രമണങ്ങളെ അർഹിക്കുന്ന അവജ്ഞയോടെ തള്ളിക്കളയുമെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. സർക്കാരിലെ മുഖ്യമന്ത്രിയോ മന്ത്രിമാരോ ആരുംതന്നെ വിമർശനങ്ങൾക്ക് അതീതരല്ലെന്നും ഉയരുന്ന വിമർശനങ്ങളെ സഹിഷ്ണുതയോടെയാണ് സമീപിക്കുന്നതെന്നും അദ്ദേഹം പറഞ്ഞു. ചൂണ്ടിക്കാണിക്കുന്ന വിഷയങ്ങളിൽ വസ്തുതയുണ്ടെങ്കിൽ തിരുത്തൽ നടപടികൾ സ്വീകരിക്കാൻ സർക്കാരിന് ഒരു മടിയുമില്ല.
എന്നാൽ, മുൻവിധികളോടെ സർക്കാരിന്റെ പ്രതിച്ഛായ തകർക്കാനും വളഞ്ഞിട്ടാക്രമിക്കാനും നടത്തുന്ന നീക്കങ്ങൾ അംഗീകരിക്കില്ല. ഭരണമേറ്റ് മൂന്ന് മാസം തികയുന്നതിന് മുൻപുതന്നെ ചില മാധ്യമങ്ങളെ കൂട്ടുപിടിച്ച് ഒരു പ്രത്യേക വിഭാഗം സർക്കാരിനെ അപകീർത്തിപ്പെടുത്താൻ ശ്രമങ്ങൾ നടത്തി. എന്നാൽ ഈ ആരോപണങ്ങൾക്കൊന്നും ഒരു ദിവസത്തെ ആയുസ് പോലും ഉണ്ടായിരുന്നില്ല. മാധ്യമ വാർത്തകൾ സർക്കാരിന്റെ സമ്മർദ്ദം മൂലം സോഷ്യൽ മീഡിയയിൽ നിന്ന് നീക്കം ചെയ്തുവെന്നത് തികച്ചും അടിസ്ഥാനരഹിതമായ പ്രചാരണമായിരുന്നു. വിഷയത്തിൽ സർക്കാരിന് യാതൊരു പങ്കുമില്ലെന്ന് മെറ്റ തന്നെ ഔദ്യോഗികമായി വ്യക്തമാക്കിയതോടെ വ്യാജവാർത്തകൾ ചമച്ചവർക്ക് ഇനി എന്താണ് പറയാനുള്ളതെന്നും അദ്ദേഹം ചോദിച്ചു.
പ്രതിഷേധിക്കുന്ന ജനങ്ങളെയോ സംഘടനകളെയോ സർക്കാർ ശത്രുപക്ഷത്തല്ല കാണുന്നത്. എല്ലാവരുടെയും ആവശ്യങ്ങൾ തുറന്ന മനസ്സോടെ കേൾക്കുമെന്നും പ്രശ്നപരിഹാരത്തിനായി സാധ്യമായതെല്ലാം ചെയ്യുമെന്നും വ്യക്തമാക്കിയ മുഖ്യമന്ത്രി, അതേസമയം യാതൊരു സമ്മർദ്ദ തന്ത്രങ്ങൾക്കും മുൻപിൽ ഭരണകൂടം കീഴടങ്ങില്ലെന്നും തുറന്നടിച്ചു. സർക്കാരിന്റെ 100 ദിന പൂർത്തീകരണത്തോടനുബന്ധിച്ച് പ്രസിദ്ധീകരിച്ച ലേഖനത്തിലാണ് മുഖ്യമന്ത്രി കാര്യങ്ങൾ വിശദീകരിച്ചത്.
