കോട്ടയം: മതേതര മൂല്യങ്ങൾ സംരക്ഷിക്കുന്നതിൽ വിട്ടുവീഴ്ചയില്ലാത്ത നിലപാടുകൾ സ്വീകരിച്ചിട്ടുള്ള വ്യക്തിത്വമാണ് എൻ.എസ്.എസ് ജനറൽ സെക്രട്ടറി ജി. സുകുമാരൻ നായരെന്ന് സ്പീക്കർ തിരുവഞ്ചൂർ രാധാകൃഷ്ണൻ. പള്ളം കരയോഗം സംഘടിപ്പിച്ച സ്വീകരണ ചടങ്ങിൽ സംസാരിക്കുകയായിരുന്നു അദ്ദേഹം. സ്വന്തം സമുദായത്തിന്റെ സാമൂഹികവും സാമ്പത്തികവുമായ മുന്നേറ്റത്തിനായി അക്ഷീണം പ്രവർത്തിക്കുമ്പോഴും ഇതര ജനവിഭാഗങ്ങളുടെ താല്പര്യങ്ങൾക്ക് അത് ഒരുതരത്തിലും വിഘാതമാകാതിരിക്കാൻ അദ്ദേഹം പ്രത്യേക ജാഗ്രത പുലർത്തിയിട്ടുണ്ടെന്ന് സ്പീക്കർ ചൂണ്ടിക്കാട്ടി.
വ്യക്തിപരമായ നേട്ടങ്ങൾക്കോ ലാഭത്തിനോ വേണ്ടി അദ്ദേഹം ഒരിക്കലും തന്റെ പദവി ഉപയോഗിച്ചിട്ടില്ലെന്നും ഛിദ്രശക്തികളെ എൻ.എസ്.എസിൽ നിന്ന് എക്കാലത്തും അകറ്റിനിർത്താൻ അദ്ദേഹം നേതൃത്വം നൽകിയെന്നും തിരുവഞ്ചൂർ പറഞ്ഞു. കേരളത്തിന്റെ സാമൂഹിക ഐക്യം തകർക്കാനുള്ള ഏത് ശ്രമങ്ങളെയും അദ്ദേഹം ശക്തമായി പ്രതിരോധിച്ചിട്ടുണ്ട്. സുകുമാരൻ നായർ അമരത്തിരുന്ന കാലയളവിലാണ് എൻ.എസ്.എസിന്റെ ആസ്തികളിൽ പതിന്മടങ്ങ് വർധനവുണ്ടായത്. വിവിധ സ്ഥാപനങ്ങൾ പടുത്തുയർത്തുന്നതിലും അവയെ കൃത്യമായി പരിപാലിക്കുന്നതിലും അസാധാരണമായ വൈദഗ്ധ്യമാണ് അദ്ദേഹം കാഴ്ചവെച്ചത്. നമ്മുടെ കാലഘട്ടം ആവശ്യപ്പെടുന്ന ശക്തമായ നേതൃത്വമാണ് അദ്ദേഹം സമുദായത്തിനും സമൂഹത്തിനും നൽകിയിട്ടുള്ളതെന്നും തിരുവഞ്ചൂർ രാധാകൃഷ്ണൻ വ്യക്തമാക്കി.
