കൊച്ചി: കേരള സർവകലാശാലയിൽ എസ്.എഫ്.ഐ നടത്തിയ പ്രതിഷേധ സമരവുമായി ബന്ധപ്പെട്ട് രജിസ്ട്രാറുടെ പരാതിയിൽ പോലീസ് കേസെടുത്തു. എസ്.എഫ്.ഐ സംസ്ഥാന സെക്രട്ടറി പി.എസ്. സഞ്ജീവ്, പ്രസിഡന്റ് എം. ശിവപ്രസാദ് ഉൾപ്പെടെ പത്ത് പേർക്കെതിരെയും കണ്ടാലറിയാവുന്ന 50 ഓളം പേർക്കെതിരെയുമാണ് പോലീസ് നടപടി സ്വീകരിച്ചിരിക്കുന്നത്.
സർവകലാശാലാ ആസ്ഥാനത്തേക്ക് അതിക്രമിച്ചു കടന്ന സംഘം, ഓഫീസിലെ ജീവനക്കാരെയും പൊതുജനങ്ങളെയും തടഞ്ഞുവെച്ചതായും അസഭ്യവാക്കുകൾ വിളിച്ച് സഞ്ചാരസ്വാതന്ത്ര്യം തടസ്സപ്പെടുത്തിയതായും പരാതിയിലുണ്ട്. ഇതിനുപുറമെ, പടക്കം പൊട്ടിച്ച് പൊതുജനങ്ങൾക്ക് ശല്യം സൃഷ്ടിച്ചുവെന്നതടക്കമുള്ള കുറ്റങ്ങൾ ചുമത്തിയാണ് പോലീസ് കേസ് രജിസ്റ്റർ ചെയ്തിട്ടുള്ളത്.
