തിരുവനന്തപുരം: ബിവറേജസ് കോർപ്പറേഷൻ (ബെവ്‌കോ) ജീവനക്കാർക്കുള്ള ഈ വർഷത്തെ ഓണം ബോണസ് പ്രഖ്യാപിച്ചു. ഇത്തവണയും ഒരു ലക്ഷം രൂപയിലധികമാണ് ബോണസ് തുക നിശ്ചയിച്ചിരിക്കുന്നത്. പരമാവധി ബോണസായി 1,05,000 രൂപയാണ് വിതരണം ചെയ്യുക. കഴിഞ്ഞ തവണത്തേക്കാൾ 2,500 രൂപയുടെ വർധനവാണ് ഇത്തവണ രേഖപ്പെടുത്തിയത്. ഇതിനുപുറമെ, ജീവനക്കാർക്ക് 50,000 രൂപ വരെ അഡ്വാൻസായി നൽകാനും എക്സൈസ് മന്ത്രിയുടെ സാന്നിധ്യത്തിൽ ചേർന്ന യോഗത്തിൽ തീരുമാനമായി.

എംപ്ലോയ്‌മെന്റ് എക്സ്ചേഞ്ച് വഴിയെത്തിയ ജീവനക്കാരുടെ ബോണസ് തുകയിൽ 250 രൂപയുടെ വർധന വരുത്തി 6,250 രൂപയാക്കി ഉയർത്തിയിട്ടുണ്ട്. സ്വീപ്പർ തസ്തികയിലുള്ളവർക്ക് 6,750 രൂപയും, കോർപ്പറേഷന്റെ ഹെഡ് ഓഫീസിലും വെയർഹൗസുകളിലും ജോലി ചെയ്യുന്ന സെക്യൂരിറ്റി ജീവനക്കാർക്ക് 13,000 രൂപയും വീതം ലഭിക്കും. കഴിഞ്ഞ വർഷവും ബെവ്‌കോയിലെ സ്ഥിരം ജീവനക്കാർക്ക് മികച്ച ബോണസ് വിഹിതമാണ് ഓണത്തിന് ലഭ്യമായിരുന്നത്; 1,02,500 രൂപയായിരുന്നു അന്ന് സ്ഥിരം ജീവനക്കാർക്ക് വിതരണം ചെയ്തത്.