മലപ്പുറം: വിദ്യാഭ്യാസ മന്ത്രി എൻ. ഷംസുദ്ദീന്റെ പേഴ്സണൽ സ്റ്റാഫിലേക്ക് ജമാഅത്തെ ഇസ്ലാമി നേതാവിനെ ഉൾപ്പെടുത്തിയ നടപടിക്കെതിരെ എം.എസ്.എഫ് രംഗത്ത്. ഈ നിയമനം അടിയന്തരമായി റദ്ദാക്കണമെന്ന് ആവശ്യപ്പെട്ട് എം.എസ്.എഫ് കൊണ്ടോട്ടി മണ്ഡലം കമ്മിറ്റി പ്രമേയം പാസാക്കി. പാർട്ടിക്കായി പ്രവർത്തിച്ചവരെ ഭരണം ലഭിച്ചതിനു ശേഷം പൂർണ്ണമായി വിസ്മരിക്കുകയാണെന്ന് പ്രമേയത്തിലൂടെ സംഘടന കുറ്റപ്പെടുത്തി. മന്ത്രിമാരുടെ പേഴ്സണൽ സ്റ്റാഫ് ഉൾപ്പെടെയുള്ള ചുമതലകളിലേക്ക് പാർട്ടിയുടെയും പോഷക സംഘടനകളുടെയും സജീവ പ്രവർത്തകരെ പരിഗണിക്കാതിരിക്കുന്നത് അണികൾക്കിടയിൽ കടുത്ത നിരാശയ്ക്കും വേദനയ്ക്കും വഴിവെച്ചിട്ടുണ്ടെന്നും പ്രമേയത്തിൽ വ്യക്തമാക്കുന്നു.
പാർട്ടിക്കുവേണ്ടി നിലകൊണ്ടവരെ അധികാരത്തിലേറിയ ശേഷം അവഗണിക്കുന്നത് പ്രവർത്തകരുടെ ആത്മവീര്യത്തെ തകർക്കുന്നതാണെന്ന് എം.എസ്.എഫ് വിമർശിച്ചു. വിദ്യാഭ്യാസ മന്ത്രിയുടെ ഓഫീസിലെ ഓഫീസ് അറ്റൻഡന്റ് തസ്തികയിലേക്ക് ജമാഅത്തെ ഇസ്ലാമി നേതാവിന് നിയമനം നൽകിയത് വിദ്യാർത്ഥി സംഘടനയിലെ പ്രവർത്തകർക്കിടയിൽ കടുത്ത മാനസിക പ്രയാസത്തിനും അമർഷത്തിനും ഇടയാക്കിയിട്ടുണ്ട്. പാർട്ടിക്കും പോഷക ഘടകങ്ങൾക്കുമായി ആത്മാർത്ഥതയോടെ രംഗത്തുണ്ടായിരുന്ന അർഹരായവർക്ക് മുൻഗണന നൽകുന്ന സമീപനമാണ് സ്വീകരിക്കേണ്ടത്. പ്രതികൂല സാഹചര്യങ്ങളിൽ പോലും പ്രസ്ഥാനത്തിന്റെ ആശയങ്ങളും നിലപാടുകളും ജനങ്ങളിലെത്തിക്കാൻ മുന്നിൽ നിന്ന യുവതലമുറയാണ് പാർട്ടിയുടെ യഥാർത്ഥ കരുത്തെന്ന് എം.എസ്.എഫ് പ്രമേയത്തിലൂടെ ഓർമ്മിപ്പിച്ചു.
