ഡൽഹി: യു.ജി.സി നെറ്റ് പരീക്ഷയുടെ ഉത്തരസൂചികയിൽ പിഴവുണ്ടെന്ന പരാതിയിൽ, നാല് ചോദ്യങ്ങളുടെ ഉത്തരങ്ങൾ മൂന്നാഴ്ചയ്ക്കുള്ളിൽ വിദഗ്ധ സമിതി പുനഃപരിശോധിച്ച് റിപ്പോർട്ട് നൽകണമെന്ന് ഡൽഹി ഹൈക്കോടതി ഉത്തരവിട്ടു. ഉത്തരസൂചികയിലെ പിഴവുകൾ ചൂണ്ടിക്കാട്ടി സമർപ്പിച്ച അഞ്ച് ഹർജികൾ പരിഗണിച്ച ജസ്റ്റിസ് ജസ്മീത് സിംഗ് അധ്യക്ഷനായ ബെഞ്ചാണ് ഈ നിർദേശം നൽകിയത്.
ഉത്തരസൂചിക അടിസ്ഥാനമാക്കിയാണ് മാർക്ക് തീരുമാനിക്കുന്നതെന്നും, ഒരു മാർക്ക് പോലും ഉദ്യോഗാർത്ഥികളുടെ മെറിറ്റിനെയും റാങ്കിംഗിനെയും യോഗ്യതയെയും വലിയ രീതിയിൽ ബാധിക്കുമെന്നതിനാൽ വിഷയത്തിൽ വേഗത്തിലുള്ള പരിശോധന അനിവാര്യമാണെന്നും കോടതി നിരീക്ഷിച്ചു.
ജൂൺ 22 മുതൽ ജൂൺ 30 വരെ നടന്ന യു.ജി.സി നെറ്റ് പരീക്ഷ ഏകദേശം 7,27,506 ഉദ്യോഗാർത്ഥികളാണ് എഴുതിയിരുന്നത്; ഓഗസ്റ്റിൽ ഫലം പ്രസിദ്ധീകരിച്ചതിന് പിന്നാലെയാണ് ഉത്തരസൂചികയിലെ പിഴവുകൾ സംബന്ധിച്ച ആരോപണം ഉയർന്നത്.
