ചെന്നൈ: കോൺഗ്രസ് വിശ്വസിക്കാൻ കൊള്ളാത്ത പാർട്ടിയാണെന്നും പുതിയ മേച്ചിൽപ്പുറങ്ങൾ കാണുമ്പോൾ സഖ്യകക്ഷികളെ ഉപേക്ഷിക്കുന്നവരാണ് അവരെന്നും തമിഴ്നാട് മുഖ്യമന്ത്രി സി. ജോസഫ് വിജയ്‌യോട് ബി.ജെ.പി ദേശീയ വൈസ് പ്രസിഡന്റ് റാം മാധവ്. ആറ് മാസം മുമ്പ് കോൺഗ്രസ് സഖ്യം വിട്ടപ്പോൾ ഡി.എം.കെ അധ്യക്ഷൻ എം.കെ. സ്റ്റാലിനുണ്ടായ അനുഭവം വൈകാതെ വിജയ്ക്കും ഉണ്ടാകുമെന്ന് തമിഴ്നാടിന്റെ ചുമതലയുള്ള ബി.ജെ.പി ദേശീയ നേതാവ് മുന്നറിയിപ്പ് നൽകി.
ഇന്ന് തമിഴ്നാട് സർക്കാർ കോൺഗ്രസിനെ ആശ്രയിക്കുകയാണെന്നും, എന്നാൽ സ്വന്തമായി ഒന്നുമില്ലാത്ത കോൺഗ്രസ് മറ്റ് പാർട്ടികളുടെ തണലിലാണ് വളരുന്നതെന്നും റാം മാധവ് വിമർശിച്ചു. ഇന്ദിരാ ഗാന്ധിയെ ദേശീയ രാഷ്ട്രീയത്തിന്റെ മുഖമാക്കുന്നതിൽ പ്രധാന പങ്കുവഹിച്ച പെരുംതലൈവർ കാമരാജറെ പോലും കോൺഗ്രസ് ഒതുക്കുകയായിരുന്നുവെന്നും, അരാജകത്വവും നുണകളും പ്രചരിപ്പിക്കുന്ന പാർട്ടിയെയാണ് ഇവിടുത്തെ നേതൃത്വം പിന്തുണയ്ക്കുന്നതെന്നും അദ്ദേഹം ആരോപിച്ചു.
അതേസമയം, തമിഴ്നാട്ടിൽ ടി.വി.കെയെ അധികാരത്തിലേറ്റാൻ ബി.ജെ.പി ശ്രമിച്ചുവെന്ന ആരോപണങ്ങൾ തള്ളിക്കളഞ്ഞ റാം മാധവ്, ഭരണകക്ഷിയായ ടി.വി.കെയെ രാഷ്ട്രീയ എതിരാളിയായി കണ്ട് പോരാട്ടം തുടരുമെന്ന് വ്യക്തമാക്കി. ബാഹ്യ പിന്തുണയുടെ അടിസ്ഥാനത്തിലാണ് ടി.വി.കെ വിജയിച്ചതെന്ന് പറയുന്നത് തമിഴ്നാട്ടിലെ ജനങ്ങളെയും അവരുടെ രാഷ്ട്രീയ വിവേചനബുദ്ധിയെയും അപമാനിക്കുന്നതിന് തുല്യമാണെന്നും, ഡി.എം.കെയെയും എ.ഐ.എ.ഡി.എം.കെയെയും പരാജയപ്പെടുത്തി ടി.വി.കെ നേടിയ വിജയം ഇന്ത്യയിലെ തിരഞ്ഞെടുപ്പ് പ്രക്രിയ നീതിയുക്തമാണെന്നതിന്റെ തെളിവാണെന്നും അദ്ദേഹം ചൂണ്ടിക്കാട്ടി.
മുഖ്യ തിരഞ്ഞെടുപ്പ് കമ്മീഷണർക്കും തിരഞ്ഞെടുപ്പ് കമ്മീഷനുമെതിരെ കോൺഗ്രസും രാഹുൽ ഗാന്ധിയും നടത്തുന്ന പ്രതിഷേധങ്ങളുടെ യഥാർത്ഥ ലക്ഷ്യം പ്രധാനമന്ത്രി നരേന്ദ്ര മോദിയാണെന്നും റാം മാധവ് കൂട്ടിച്ചേർത്തു.
