പ്രയാഗ്‌രാജ്: ഝാൻസിയിലെ കന്റോൺമെന്റ് ബോർഡിന്റെ ഭൂമിയിൽ അനധികൃതമായി നിർമ്മിച്ച ക്ഷേത്രം നീക്കം ചെയ്യുന്ന കാര്യത്തിൽ നാല് ആഴ്ചയ്ക്കുള്ളിൽ അന്തിമ തീരുമാനമെടുക്കാൻ പ്രതിരോധ മന്ത്രാലയത്തോട് അലഹബാദ് ഹൈക്കോടതി നിർദേശിച്ചു. ഗൗരവ് അഗർവാൾ സമർപ്പിച്ച റിട്ട് ഹർജി പരിഗണിച്ച ജസ്റ്റിസ് അജിത് കുമാർ, ജസ്റ്റിസ് ഗരിമ പ്രസാദ് എന്നിവരടങ്ങിയ ഡിവിഷൻ ബെഞ്ചാണ് ഈ ഉത്തരവ് പുറപ്പെടുവിച്ചത്.
വിഷയത്തിൽ പ്രതിരോധ മന്ത്രാലയത്തിൽ നിന്ന് ആവശ്യമായ മറുപടി തേടാനും അടുത്ത സിറ്റിങ്ങിനകം റിപ്പോർട്ട് സമർപ്പിക്കാനും അഡീഷണൽ സോളിസിറ്റർ ജനറൽ എസ്.പി. സിങ്ങിനോട് കോടതി ആവശ്യപ്പെട്ടിട്ടുണ്ട്. കേസിൽ അടുത്ത വാദം ഡിസംബർ ഒമ്പതിന് നടക്കുമെന്ന് ബെഞ്ച് വ്യക്തമാക്കി.
അനുമതി ലഭിക്കുന്നതിനായി ഹർജിക്കാരന്റെ കത്ത് പൂനെയിലെ ഡിഫൻസ് എസ്റ്റേറ്റ്സ് സൗത്ത് കമാൻഡ് പ്രിൻസിപ്പൽ ഡയറക്ടർ, പ്രതിരോധ മന്ത്രാലയത്തിന് കീഴിലുള്ള ഡിഫൻസ് പ്രോപ്പർട്ടീസ് ഡയറക്ടർ ജനറലിന് കൈമാറിയതായി വാദത്തിനിടെ കോടതിയെ അറിയിച്ചു. 1971-ലെ പൊതുസ്ഥലങ്ങളിലെ അനധികൃത കൈയേറ്റം ഒഴിപ്പിക്കൽ നിയമത്തിലെ (Public Premises Act) അഞ്ചാം വകുപ്പ് പ്രകാരം ക്ഷേത്രനിർമ്മിതി അനധികൃതമാണെന്ന് കണ്ടെത്തി അത് നീക്കം ചെയ്യാൻ ഓഗസ്റ്റ് 21-ന് സംസ്ഥാന ഉദ്യോഗസ്ഥൻ അന്തിമ ഉത്തരവ് പുറപ്പെടുവിച്ചിരുന്നതായി എതിർകക്ഷികളുടെ അഭിഭാഷകൻ നേരത്തെ കോടതിയെ ബോധിപ്പിച്ചിരുന്നു.
