ന്യൂഡൽഹി: എസ്ഐആറുമായി (SIR) ബന്ധപ്പെട്ട വിഷയത്തിൽ താനുമായി തുറന്ന സംവാദത്തിന് പ്രധാനമന്ത്രി നരേന്ദ്ര മോദിയെ ബോധ്യപ്പെടുത്താൻ കേന്ദ്ര ആഭ്യന്തര മന്ത്രി അമിത് ഷായെ വെല്ലുവിളിച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. എസ്ഐആർ ചർച്ചകളെക്കുറിച്ച് അമിത് ഷാ മുൻപ് നടത്തിയ വ്യത്യസ്ത നിലപാടുകൾ വ്യക്തമാക്കുന്ന വീഡിയോ ദൃശ്യങ്ങൾ സമൂഹമാധ്യമമായ എക്സിൽ പങ്കുവെച്ചുകൊണ്ടായിരുന്നു അദ്ദേഹത്തിന്റെ പ്രതികരണം.
മോദിയെ ആശയക്കുഴപ്പത്തിലാക്കാതെ എവിടെവെച്ചും ഏതുസമയത്തും ഒരു തുറന്ന ചർച്ചയ്ക്ക് തയ്യാറാക്കാൻ അമിത് ഷായോട് രാഹുൽ ആവശ്യപ്പെട്ടു. വോട്ട് തട്ടിപ്പിനെക്കുറിച്ചുള്ള ചോദ്യത്തിന് മറുപടിയായി, വിഷയം സ്വതന്ത്ര സ്ഥാപനമായ തിരഞ്ഞെടുപ്പ് കമ്മീഷന്റെ പരിധിയിലാണെന്നും പാർലമെന്റിൽ ചർച്ച ചെയ്യില്ലെന്നും കഴിഞ്ഞ ഡിസംബർ 10-ന് അമിത് ഷാ പറഞ്ഞ ദൃശ്യങ്ങളാണ് രാഹുൽ പുറത്തുവിട്ടതിൽ ഒന്ന്.
എന്നാൽ, ഹരിയാനയിലെ കർണാലിൽ നടന്ന റാലിയിൽ എസ്ഐആർ ചർച്ചയ്ക്കായി പ്രത്യേക പാർലമെന്റ് സമ്മേളനം വിളിക്കാൻ തയ്യാറാണെന്ന് അമിത് ഷാ നിലപാട് മാറ്റിയതായി രാഹുൽ ചൂണ്ടിക്കാട്ടി. രാഹുൽ ഗാന്ധിയുടെ ആരോപണങ്ങളിൽ സത്യമുണ്ടെങ്കിൽ സഭയ്ക്കുള്ളിൽ നേർക്കുനേർ ചർച്ച ചെയ്യാമെന്നും മറുപടികൾ താങ്ങാനാവാതെ പ്രതിപക്ഷത്തിന് ഓടിപ്പോകേണ്ടി വരുമെന്നുമായിരുന്നു കർണാലിൽ അമിത് ഷായുടെ പ്രസംഗം.
