ന്യൂഡൽഹി: സർക്കാർ ക്ഷേമപദ്ധതികൾ ലഭിക്കുന്നതിന് വോട്ടർ തിരിച്ചറിയൽ കാർഡ് നിർബന്ധമാക്കാൻ ബിജെപി നീക്കം നടത്തുകയാണെന്ന ഗുരുതര ആരോപണവുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. ആധാർ കാർഡിന് പകരം വോട്ടർ ഐഡി കാർഡ് മാനദണ്ഡമാക്കുമെന്ന കേന്ദ്ര പഞ്ചായത്തീരാജ് മന്ത്രി രാജീവ് രഞ്ജൻ സിങ്ങിന്റെ വീഡിയോ പങ്കുവെച്ചാണ് എക്‌സിലൂടെ രാഹുൽ കേന്ദ്ര സർക്കാരിനെതിരെ രംഗത്തെത്തിയത്. വോട്ട് കൊള്ളയടിക്കുന്നതിനപ്പുറം ജനങ്ങളുടെ പൗരാവകാശങ്ങൾ തന്നെ കവർന്നെടുക്കുന്ന ഗൂഢാലോചനയാണിതെന്നും അദ്ദേഹം കുറ്റപ്പെടുത്തി.
എസ്ഐആർ (SIR) നടപടികളുടെ മറവിൽ ദശലക്ഷക്കണക്കിന് ആളുകളെയാണ് വോട്ടർ പട്ടികയിൽനിന്ന് ഇതിനകം ഒഴിവാക്കിയതെന്ന് രാഹുൽ ചൂണ്ടിക്കാട്ടി. ഭരണകൂടത്തോട് വിയോജിക്കുന്നവരുടെ പേരുകൾ മാത്രം ലക്ഷ്യമിട്ട് നീക്കം ചെയ്യുകയാണ്. വോട്ടവകാശം നിഷേധിക്കപ്പെടുന്നതിലൂടെ പൗരന്മാർക്ക് അവരുടെ ഭരണഘടനാപരമായ അവകാശങ്ങളും നഷ്ടപ്പെടും. ഇത് തിരഞ്ഞെടുപ്പ് അട്ടിമറിച്ച് അധികാരത്തിൽ തുടരാനുള്ള സ്ഥിരം സംവിധാനമാണെന്നും രാഹുൽ വിമർശിച്ചു.
റേഷൻ, പെൻഷൻ, വിദ്യാർത്ഥി സ്കോളർഷിപ്പുകൾ, സംവരണം എന്നിവയ്ക്കും വോട്ടർ ഐഡി നിർബന്ധമാക്കുമോ എന്ന് ചോദിച്ച അദ്ദേഹം, രാജ്യത്തെ ജനങ്ങളെ 'അദൃശ്യ പൗരന്മാർ' ആക്കി മാറ്റാനാണ് കേന്ദ്രം ശ്രമിക്കുന്നതെന്നും കുറ്റപ്പെടുത്തി. പാവപ്പെട്ടവരുടെ പെൻഷൻ വോട്ടർ ഐഡിയുമായി ബന്ധിപ്പിക്കരുത്; വോട്ട് എന്നത് ജനങ്ങളുടെ അവകാശമാണെന്നും ക്ഷേമ ആനുകൂല്യങ്ങൾക്കുള്ള വ്യവസ്ഥയല്ലെന്നും അദ്ദേഹം ഓർമ്മിപ്പിച്ചു. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ ഈ വോട്ട് മോഷണത്തിൽ ബിജെപിയുമായി ഒത്തുകളിക്കുകയാണെന്ന് ആരോപിച്ച രാഹുൽ, തിരഞ്ഞെടുപ്പ് കമ്മീഷന്റെ നിഷ്പക്ഷതയെയും രൂക്ഷമായി വിമർശിച്ചു.
