ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ കോൺഗ്രസ് ഉയർത്തുന്ന വിമർശനങ്ങളെ കണക്കുകൾ ഉദ്ധരിച്ച് തള്ളി ബിജെപി ദേശീയ വക്താവ് പ്രദീപ് ഭണ്ഡാരി. നിലവിലെ കമ്മീഷണറുടെ കാലയളവിനേക്കാൾ ഉയർന്ന വിജയശതമാനം എൻഡിഎ നേടിയത് യുപിഎ സർക്കാർ നിയമിച്ച തിരഞ്ഞെടുപ്പ് കമ്മീഷണറുടെ കാലത്താണെന്നും, രാഹുൽ ഗാന്ധിയുടെ യുക്തിപ്രകാരം അന്ന് സോണിയ ഗാന്ധി ബിജെപിക്ക് വേണ്ടി വോട്ട് കൊള്ള നടത്തുകയായിരുന്നോ എന്നും അദ്ദേഹം പരിഹസിച്ചു. എക്സ് പോസ്റ്റിലൂടെയായിരുന്നു ഭണ്ഡാരിയുടെ പ്രതികരണം.
കോൺഗ്രസ് നേതൃത്വത്തിലുള്ള രണ്ടാം യുപിഎ സർക്കാരിന്റെ ഭരണകാലത്ത് രാജ്യത്തിന്റെ 18-ാമത് മുഖ്യ തിരഞ്ഞെടുപ്പ് കമ്മീഷണറായി പ്രവർത്തിച്ച വി.എസ്. സമ്പത്തിന്റെ കാലാവധിയെയാണ് ഭണ്ഡാരി പരാമർശിച്ചത്. 2012 ജൂൺ 11 മുതൽ 2015 ജനുവരി 15 വരെ സമ്പത്ത് ചുമതലയിലിരുന്ന കാലയളവിൽ നടന്ന തിരഞ്ഞെടുപ്പുകളിൽ 75 ശതമാനമായിരുന്നു എൻഡിഎയുടെ വിജയനിരക്ക്.
എന്നാൽ ഗ്യാനേഷ് കുമാർ തിരഞ്ഞെടുപ്പ് കമ്മീഷണറായ ഘട്ടത്തിൽ ബിജെപിയുടെയും എൻഡിഎ മുന്നണിയുടെയും വിജയശതമാനം 66 ശതമാനമായി കുറയുകയാണുണ്ടായതെന്ന് അദ്ദേഹം വ്യക്തമാക്കി. ഗ്യാനേഷ് കുമാറിന്റെ കാലത്തെ എൻഡിഎയുടെ വിജയനിരക്ക് സമ്പത്തിന്റെ കാലത്തേതിനേക്കാൾ കുറവാണെന്നിരിക്കെ, തിരഞ്ഞെടുപ്പ് കമ്മീഷണർ പക്ഷപാതപരമായി പ്രവർത്തിക്കുന്നുവെന്ന രാഹുൽ ഗാന്ധിയുടെ വാദം അടിസ്ഥാനരഹിതമാണെന്ന് ബിജെപി വക്താവ് ചൂണ്ടിക്കാട്ടി.
