ഹൈദരാബാദ്: ശക്തമായ രാഷ്ട്രീയ നിലപാടുകൾ പരസ്യമായി പ്രകടിപ്പിച്ചതിന്റെ പേരിൽ നടൻ പ്രകാശ് രാജിന് നിരവധി സിനിമകളും പരസ്യചിത്രങ്ങളും നഷ്ടപ്പെട്ടതായി ഭാര്യ പോണി വർമ. ചില സിനിമകളിൽ അഡ്വാൻസ് തുക ലഭിച്ചതിന് ശേഷമാണ് കരാറുകൾ റദ്ദാക്കപ്പെട്ടതെന്നും തെലുങ്ക് സിനിമാ മേഖലയിൽ നിന്ന് പലവട്ടം വിലക്കുകൾ നേരിടേണ്ടി വന്നിട്ടുണ്ടെന്നും ദി ഇന്ത്യൻ എക്‌സ്പ്രസിന് നൽകിയ അഭിമുഖത്തിൽ അവർ വ്യക്തമാക്കി.
തുറന്നുപറച്ചിലുകൾ കാരണം ചലച്ചിത്ര രംഗത്തെ പല പ്രമുഖരുമായുള്ള അദ്ദേഹത്തിന്റെ വ്യക്തിബന്ധങ്ങളിൽ വിള്ളൽ വീഴുകയും ചെയ്തു. മുൻപ് അദ്ദേഹത്തിന്റെ ഈ തുറന്ന രീതികൾ കുടുംബത്തിൽ കടുത്ത ആശങ്ക സൃഷ്ടിച്ചിരുന്നു; എന്നാൽ മാധ്യമപ്രവർത്തക ഗൗരി ലങ്കേഷിന്റെ കൊലപാതകത്തിന് ശേഷമാണ് ആ ഭയം മാറിയതെന്നും, ഒരു സ്ത്രീയായിരുന്നിട്ടും അവൾ സ്വന്തം അഭിപ്രായം പറഞ്ഞെങ്കിൽ താനും ഇനിയും സംസാരിക്കുമെന്ന് പറഞ്ഞ് കൂടുതൽ കരുത്തോടെ നിലപാടുകളിൽ ഉറച്ചുനിൽക്കുകയാണ് അദ്ദേഹം ചെയ്തതെന്നും അവർ ഓർത്തെടുത്തു.
ഡൽഹി പ്രക്ഷോഭത്തിനിടയിലെ ലാത്തിച്ചാർജ്ജും പെല്ലറ്റ് വെടിവെയ്പ്പും വലിയ ആശങ്ക ഉണ്ടാക്കിയിരുന്നുവെങ്കിലും സ്വന്തം വിശ്വാസങ്ങളിൽ നൂറ് ശതമാനം ആത്മവിശ്വാസത്തോടെ മുന്നോട്ടുപോകുന്ന പ്രകൃതമാണ് പ്രകാശിന്റേത്. വിമർശനങ്ങളും ആരോപണങ്ങളും നേരിടേണ്ടി വരുമ്പോഴും ആരോടും പകയോ വിദ്വേഷമോ അദ്ദേഹം വെച്ചുപുലർത്താറില്ലെന്നും, ഒരു അഭിനേതാവ് എന്നതിലുപരി സ്വന്തം നിലപാടുകളിലെ ഈ ധീരത മൂലമാണ് പലരും അദ്ദേഹത്തെ ഇഷ്ടപ്പെടുന്നതെന്നും പോണി കൂട്ടിച്ചേർത്തു.
