ന്യൂഡൽഹി: ലോക്സഭാ പ്രതിപക്ഷ നേതാവ് രാഹുൽ ഗാന്ധിക്ക് പ്രധാനമന്ത്രിയാകാനുള്ള അവസരം ഒരിക്കലും ഉണ്ടാകില്ലെന്നും, അടുത്ത അഞ്ച് വർഷവും പ്രതിപക്ഷത്തിരിക്കാൻ അദ്ദേഹം സജ്ജമാകണമെന്നും കേന്ദ്ര ആഭ്യന്തരമന്ത്രി അമിത് ഷാ. പ്രധാനമന്ത്രിയാകാനാണ് ആഗ്രഹമെങ്കിൽ ജീവിതകാലം മുഴുവൻ മോക്ക് പാർലമെന്റിൽ ഇരിക്കാമെന്നും, രാഹുലിന്റെ 'സ്നേഹത്തിന്റെ കടയിൽ' വെറുപ്പല്ലാതെ മറ്റൊന്നുമില്ലെന്നും അദ്ദേഹം പരിഹസിച്ചു. ചണ്ഡിഗഡിൽ നടന്ന ഔദ്യോഗിക പരിപാടിയിൽ സംസാരിക്കുകയായിരുന്നു അമിത് ഷാ.
ഇൻഡ്യ സഖ്യം സംഘടിപ്പിച്ച 'ചലോ ദില്ലി' റാലിക്കെതിരെയും ആഭ്യന്തരമന്ത്രി രൂക്ഷവിമർശനം ഉന്നയിച്ചു. കോൺഗ്രസ് നേതൃത്വത്തിൽ അരങ്ങേറിയ 1984-ലെ സിഖ് വിരുദ്ധ കലാപത്തിന് സാക്ഷ്യം വഹിച്ച അതേ ദിനത്തിൽ തന്നെ റാലി സംഘടിപ്പിച്ചത് ഇരകളുടെ മുറിവിൽ ഉപ്പ് പുരട്ടുന്നതിന് തുല്യമാണെന്ന് അദ്ദേഹം കുറ്റപ്പെടുത്തി. ഈ ദിവസം റാലി നടത്തരുതെന്ന് പത്രസമ്മേളനം നടത്തി അഭ്യർത്ഥിച്ചിരുന്നുവെന്നും, വിദേശത്തുനിന്ന് ലഭിച്ച നിർദ്ദേശപ്രകാരമാണ് അവർ ഇതേ ദിവസം തന്നെ തെരഞ്ഞെടുത്തതെന്നും ഷാ ആരോപിച്ചു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ വസതിയിൽ ഇൻഡ്യ മുന്നണി ജനകീയ വിചാരണ നടത്തിയതിന് പിന്നാലെയാണ് രാഹുൽ ഗാന്ധിയെ ലക്ഷ്യമിട്ട് അമിത് ഷാ രംഗത്തെത്തിയത്.
