കൊൽക്കത്ത: പശ്ചിമ ബംഗാളിൽ രാഷ്ട്രീയ പ്രസക്തി നഷ്ടപ്പെട്ട പ്രതിപക്ഷം നിലനിൽപ്പിനായി കോൺഗ്രസിനെയും സിപിഐഎമ്മിനെയും ആശ്രയിക്കുകയാണെന്ന് മുഖ്യമന്ത്രി സുവേന്ദു അധികാരി. തൃണമൂൽ കോൺഗ്രസ് രൂപീകരിക്കാൻ ഉപേക്ഷിച്ച അതേ കോൺഗ്രസിന്റെ കാലിൽ വീഴാനാണ് മുൻ മുഖ്യമന്ത്രി ഇപ്പോൾ ശ്രമിക്കുന്നതെന്നും, ബംഗാളിൽ ഇനി ഒന്നും ചെയ്യാനില്ലാത്തതിനാൽ കൊൽക്കത്ത വിട്ട് ഡൽഹിയിൽ തമ്പടിക്കാനാണ് അവരുടെ നീക്കമെന്നും ദക്ഷിണ 24 പർഗാനാസ് ജില്ലയിലെ ബറുയിപുരിൽ നടന്ന പൊതുയോഗത്തിൽ അദ്ദേഹം പരിഹസിച്ചു. മുൻപ് രണ്ടുതവണ പരാജയപ്പെടുത്തിയിട്ടുണ്ടെന്നും ധൈര്യമുണ്ടെങ്കിൽ വീണ്ടും തിരഞ്ഞെടുപ്പിൽ മത്സരിക്കാൻ മുന്നോട്ടുവന്നാൽ ഒരിക്കൽക്കൂടി മമതയെ തോൽപ്പിക്കുമെന്നും അദ്ദേഹം വെല്ലുവിളിച്ചു.
ഡയമണ്ട് ഹാർബർ എംപിയായ അഭിഷേക് ബാനർജിയെ 2029-ലെ ലോക്‌സഭാ തിരഞ്ഞെടുപ്പിൽ തനിക്കെതിരെ നേരിട്ട് മത്സരിക്കാനും മുഖ്യമന്ത്രി വെല്ലുവിളിച്ചു. സ്വതന്ത്രമായി പഞ്ചായത്ത് തിരഞ്ഞെടുപ്പ് പോലും നടത്താൻ അനുവദിക്കാതെ ദക്ഷിണ 24 പർഗാനാസിനെ സ്വന്തം ജന്മിത്തമായാണ് അഭിഷേക് കൈകാര്യം ചെയ്തതെന്നും, 2029-ൽ മത്സരിച്ചാൽ അഭിഷേകിന് ലഭിച്ച ഭൂരിപക്ഷത്തേക്കാൾ ഒരു വോട്ടെങ്കിലും അധിക ഭൂരിപക്ഷത്തിൽ താൻ അദ്ദേഹത്തെ പരാജയപ്പെടുത്തുമെന്നും സുവേന്ദു അധികാരി പറഞ്ഞു. മുൻപ് 400-ഓളം ദുർഗാപൂജകൾക്ക് തൃണമൂൽ നേതാക്കൾക്ക് ക്ഷണം ലഭിച്ചിരുന്നിടത്ത് ഇപ്പോൾ അമ്മായിയെയും അനന്തരവനെയും ആരും പരിപാടികളിലേക്ക് ക്ഷണിക്കുന്നില്ലെന്നും രാഷ്ട്രീയ ബാധ്യതയായ ഇവർക്കെതിരെ അഴിമതിക്കേസുകളിൽ ഉടൻ കടുത്ത നടപടിയുണ്ടാകുമെന്നും അദ്ദേഹം കൂട്ടിച്ചേർത്തു.
തിരഞ്ഞെടുപ്പിന് ശേഷമുണ്ടായ അക്രമങ്ങളിൽ ഇരയായവർ ഇതുവരെ പരാതി നൽകിയിട്ടില്ലെങ്കിൽ ഇപ്പോൾ പോലീസിനെ സമീപിക്കണമെന്ന് ആഭ്യന്തര വകുപ്പിന്റെ ചുമതലയുള്ള മുഖ്യമന്ത്രി വ്യക്തമാക്കി. അനധികൃതമായി കൈവശപ്പെടുത്തിയ ഭൂമി തിരിച്ചുപിടിച്ച് പട്ടികജാതി, പട്ടികവർഗ വിഭാഗങ്ങൾ ഉൾപ്പെടെയുള്ള പാവപ്പെട്ടവർക്ക് വിതരണം ചെയ്യുമെന്നും, അനുമതിയില്ലാത്ത കന്നുകാലി അറവുശാലകൾ പൂർണ്ണമായും അടച്ചുപൂട്ടുമെന്നും അന്നപൂർണ യോജന പദ്ധതിയുടെ ആനുകൂല്യങ്ങൾ അർഹരിലേക്ക് കൃത്യമായി എത്തിക്കുമെന്നും പ്രഖ്യാപിച്ച അദ്ദേഹം, സിപിഐഎമ്മിനെ ജനാധിപത്യപരമായി നേരിടാൻ ബിജെപി പ്രവർത്തകരോട് ആഹ്വാനം ചെയ്തു.
